Ел саен район күләмендә экологик юнәлештә “Парклар маршы” дип аталган зур чара үткәрелә. Чарага алдан  төрле номинациядә конкурслар үткәрелә. Рәсем ясау,  шигырь , сочинениеләр язу, табигатьнең матур, могҗизалы урыннарын фотога төшерү буенча үткәрелгән  әлеге чарага безнең укучыларыбызның эшләре дә  җибәрелгән иде. Анда Шарипова Гөлнурның сочинениесе III урынны алды һәм бик матур йомшак уенчык белән бүләкләнде.

25 нче май көнне укучылар һәм укытучылар коллективы  ярминкә оештырдылар. Ярминкәдә авыл халкына тормыш  - көнкүреш  товарлары тәкъдим ителде. Товарларның  бәяләре дә  чагыштырмача бик арзан иде. Һәммә кеше бик теләп һәм ошатып булган товарларны алып бетерделәр. Ярминкәдән кергән  5000 сум акча Изге Болгар җиренә ярдәм итү өчен җибәреләчәк

25 апрель көнне ярминкәдән соң укучылар  еллык эшкә нәтиҗә ясап, иҗат  отчет концерты куйдылар. Концертны барлык матур эшләренең нәтиҗәләре белән таныштырып, матур җыр – биюләр белән бәйләп алып бардылар. Концерт барлык кешегә дә бик ошады, тамашачы мәктәп коллективына зур рәхмәтләрен җиткереп таралыштылар.

Район мәктәпләреннән лидерлар булган  бер төркем укучылар Төркиягә киттеләр. Бу бәхет безнең укучыбыз Шарипова Гөлнурга да елмайды

21 май көнне мәктәпнең укытучылар һәм укучылар коллективы өмәгә чыктылар. Мәктәп, мәчет, һәйкәл тирәсен чүп – чардан чистартып, тирә – юньне  җыештырып куйдылар. Өмәдә барлык кеше дә бик актив катнашты һәм барысы да тырышып эшләделәр

Мәктәбебездә  төрле юнәлештә сәләтле укучыларыбыз шактый. Биючеләр, җырчылар, нәфис сүз осталары, каләм  тибрәтүче – шагыйрьләр.  Шулар арасында ел да   шигырь язучы  балаларның сәләтен тагын да үстерү максатыннан  “Алтын каләм” конкурсы үткәрелә.   Бу конкурска 5 сыйныф укучысы Латыйпова  Алсу һәм 10 сыйныф укучысы  Шарипова Гөлнурларның иҗатлары да җибәрелде

Габдулла Тукай иҗатына багышлап укучылар стена газеталары  чыгардылар. Газеталарга  укучылар үзләре дә,  Тукайга һәм аның иҗатына багышлап шигырьләр язганнар, аның  шигырьләре һәм  әкиятләре буенча рәсемнәр дә ясаганнар

19 нчы апрель көнне 1 – 4 сыйныф укучылары белән берлектә, озайтылган көн тәрбиячесе  Фәния Мансуровна  Тукай туган көнен искә алып, аның иҗатына багышлап бик матур чара үткәрде. Бәйрәмгә Тукай әкиятләре геройлары да кунакка килде.

Ниһаять, яңа мәктәпкә нигез салу өчен эш башланып китте. Бер төркем эшчеләр балчык казу, мәктәп өчен төзелеш материллары кайтару эшләре белән шөгыльләнәләр.

17 нче апрель көнне туган тел айлыгы кысаларында башлангыч сыйныф укучылары арасында әкиятләр сөйләү конкурсы үткәрелде. Мәктәп күләмендә үткәрелгән бу бәйгедә иң оста әкият сөйләүчеләр булып -  1 нче сыйныф укучысы Валиев Асаф, 2 нче сыйныф укучысы Гарифуллин Әнис, 3 нче сыйныф укучысы  Нурмиев Илшат һәм 4 нче сыйныф укучысы Шәйхетдинов Шамил билгеләнде.