15 нче февральдә Әфган сугышына багышланган класс сәгатьләре үтте. СССР гаскәрләренең Әфган җирләреннән чыгарылуына 22 ел үтсә дә, алар безнең хәтердән юылмый.

Укучыларыбыз төрле конкурсларда бик теләп катнашалар. "Универсиаданы каршылап!" социаль реклама республика бәйгесендә 5 класс укучысы Габделхакова Айгөлнең эше (җитәкчесе Габделхакова Г.Р.) 3 нче урынга лаек булды. Аңа Мәгариф Министрлыгының класстан тыш эшләр буенча республика үзәгенең Дипломы тапшырылды.

12 февраль көнне 6 класс укучылары арасында математика фәненнән район олимпиадасы үткәрелде. Укучыбыз Фатыйхов Салават (укытучысы Назирова Д.А.) I урынны яулады. Бүгенге көндә Салават 26 нчы февральдә узачак республика бәйгесенә әзерләнә. Без Салаватка ышанабыз!

  Кышның салкыннарына да карамыйча 3 класс укучылары (кл.җит.Кашапова Г.З.) әти - әниләрне мәктәпкә чакырдылар. "Без - сәламәт гаилә" исем астында күңелле эстафеталар үткәрделәр. Уеннар барышында гаиләләр үзләренең өлгерлекләрен, җитезлекләрен күрсәттеләр. Кичә истәлек бүләкләре тапшыру белән тәмамланды.

Быел кыш салкыннарга һәм ак карга юмарт булды. Ләкин бу кошлар өчен уңайсызлыклар тудырды. Алар үзләренә азык таба алмыйлар. II класс укучылары (класс җит. Зиннатова Э.Ш.) кошларга ярдәм итү максатыннан җимлекләр ясап элделәр.

Мәктәптә укучылар тарафыннан өлкәннәргә хезмәт ярдәме күрсәтелә. Әлеге ярдәм күрсәтүчеләрне "Волонтерлар" дип йөртәләр. 16 нчы февральдә 8 нче класс укучылары тарафыннан Мөхәммәдиева Фирдәүсә апага хуҗалык эшләре буенча физик ярдәм күрсәтелде. Аларга зур рәхмәт.

 "Проект" сүзе латин теленнән кергән. "Фикер, идея, план"- аның бер мәгънәсе. 16 нчы февраль көнне 3-4 нче класс укучылары башлангыч класс укытучысы Ханнанова А.С. белән проектлаштыруның нигезләре белән таныштылар. Әлеге укучылар мәктәптә үткәреләчәк "Минем укучым-минем горурлыгым" конкурсына әзерләнәләр.

Бүген патриот-шагыйрь Муса Җәлилнең тууына 105 ел. Шушы уңайдан мәктәбебездә күптөрле чаралар үткәрелде.  II класста "Муса Җәлил әсәрләрен яратабыз, укыйбыз!" дигән тәрбия сәгате үтте.