Мәктәптә патриотик тәрбия айлыгы дәвам итә. 12 нче февраль  көнне  мәктәбебезгә  Чернобыль афәтен үз җилкәләрендә татыган авылдашларыбыз Хафизов Нурмый һәм Ганиев Альбертлар абыйлар  белән очрашу үткәрелде. Алар үз чыгышларында   әлеге афәтнең  ни дәрәҗәдә  куркыныч булуын төшендереп гыйбрәт итеп алырлык  чыгышлар ясадылар, тыныч тормышның кадерен белеп яшәргә кирәклеген күп тапкырлар кабатладылар. 8 нче сыйныфлар белән үткәрелгән әлеге  әһәмиятле кичәне, тормыш иминлеге дәресләре мөгаллиме Рәфис Раифович  кызыклы һәм мавыктыргыч итеп алып барды.

Безнең мәктәбебездә 8 нче февраль көнне, яшь геройларны искә алу көне уңаеннан, 1-7 сыйныф укучылары арасында “Күңелле стартлар”уены үткәрелде. Укучылар ике командага бүленделәр.Һәр команданың капитаннары билгеләнде. Командалар бер-берсен сәламләгәннән соң, күңелле уеннар башланып китте.

Бүген барлык Юлбат мәктәбе укучылары, укытучылар коллективы  чаңгыга бастылар, мәктәп чаңгы трассасында үзләренең сәламәтлекләрен ныгыттылар.

        4 – 6 февраль көннәрендә районыбызда укытучылар спартакиадасы булып узды. Мәктәбебез укытучылары да ярышлардан читтә калмадылар. Чаңгы ярышы, шорт – трек, өстәл теннисы, турникта тартылу, идәннән этелү, дартс, шахмат, аркан тартышы төрләре буенча көч сынаштылар. Куанырлык нәтиҗәләрдә бар. Мәктәбебез директоры Нигъмәтҗанов Ф.Т., математика укытучысы Каримова Р.Р. лар шахмат буенча III урынны яуладылар. Район мәктәпләре арасында Юлбат урта мәктәбе 7 урында. Хезмәттә генә түгел, спортта да сынатмаучы мөгалимнәребезне уңышлары белән котлыйбыз.

       6, 7 февральдә  IV  сыйныфта  математика, рус теле, әйләнә – тирә дөнья , татар теле  фәннәреннән мониторинг үткәрелде. Шушы ук көннәрдә  IX, XI сыйныф укучылары сайлап алу фәннәре буенча Саба гимназиясендә БДИ форматында белемнәрен сынадылар. 

Юлбат мәктәбе укучылары сыйныф җитәкчеләре белән берлектә үзләренең сәламәтлекләрен ныгыту максатыннан дәресләрдән соң чаңгыда шуарга чыга. Алар табигать кочагында үзләренә матур тәэсирләр алып кайта.

 Юлбат урта мәктәбенең 8 нче сыйныф  укучысы Кәримова  Гүзәл, 24-28 нче  январь  көннәрендә  Казанда , Р.Нәҗметдинов  исемендәге шахмат-шашка мәктәбендә үткәрелгән республикакүләм бәйгедә катнашты. 16 яшькә кадәр булган  яшүсмерләр арасында үткәрелгән  халыкара  шашкада  I  урынны   яулады.  Зур  җиңүе өчен кубок, медаль, диплом, акчалата премия белән  бүләкләнде.  Хәзер инде Гүзәл  Мәскәүдә узачак тагы да зуррак, җаваплырак  бәйгегә әзерләнә. Аңа Бөтенроссия күләмендәге  ярышларда да  уңышлар телибез!

Юлбат урта гомуми белем бирү мәктәбендә техник персонал белән “Янгын куркынычы янаганда, ничек дөрес хәрәкәт итәргә?”, “Янгын сүндерү чараларын дөрес куллану” дигән темаларга әңгәмә һәм аңлату эшләре үткәрелде.

Укучылар, укытучылар һәм мәктәп хезмәткәрләре белән планнан тыш инструктаж үткәрелде.

31 январь көнне мәктәп күләмендә өйрәнү максатыннан эвакуация узды.

Юлбат урта гомуми белем бирү мәктәбендә янгыннарны кисәтү, булдырмау һәм янгын вакытында дөрес хәрәкәт итү максатыннан директор яны киңәшмәсендә атналык план корылды, һәр тармак җитәкчесенә бурычлар йөкләнде. Шул максаттан һәр сыйныфта аңлату һәм практик эшләр алып барыла.Укучылар үзләренең белемнәрен һәм күнекмәләрен тагын бер кат тикшереп карадылар. 31  январь көнне мәктәп күләмендә  эвакуация узачак.

 26 гыйнвар көнне, мәктәбебездә, чыгарылыш сыйныф укучылары һәм аларның әти-әниләре катнашында җыелыш үткәрелде. Уку-укыту эшләре буенча директор урынбасары Фәтхриева Р.Х.  укучыларны һәм әти-әниләрне 2013 нче елда ГИА һәм ЕГЭ үткәрү буенча Мәгариф бүлегеннән килгән приказ һәм нигезләмәләр белән таныштырды, февраль һәм март айларында үтәчәк "репетицион тестирование" тәртипләрен аңлатты. Җыелышта мәктәп директоры Нигъмәтҗанов Ф.Т. катнашты. Фәргать Тәлгатович консультацияләр, имтихан эшенә таләпләр, укучыларның кич йөрү мәсьәләләренә тукталды.