Мәктәбебездә гөрләп Яңа ел бәйрәмнәре узды. Бәйрәм оешкан төстә, күтәренке рухта алып барылды. Укучыларыбыз чирек нәтиҗәләре буенча Рәхмәт хатлары алдылар, үзләренең һөнәрләрен күрсәттеләр, чыршы тирәсендә әйлән-бәйлән уйнадылар. Яңа еллар яңа уңышлар, бәхет-шатлыклар китерсен!

24 нче декабрь көнне  Саба гимназиясендә волейбол  ярышының зона ярышы үтте. Безнең мәктәпнең егетләр командасы  уенда катнашып  2 нче урынны алды. Аларны уңышлары белән котлыйбыз. Финал ярышында аларга  уңышлар елмайсын.

Мәктәбебез  горурлыгы – Мансуров Райнур  бүген,  ягъни 24 декабрь көнне, Мәскәүгә Президент   елкасына китте. 25е көнне алар Рәсәй башкаласы Мәскәүнең истәлекле урыннары белән танышып йөриячәкләр,  ә 26 декабрь – Чыршы бәйрәмендә кунакта булачаклар. Райнурга күңелле яллар телибез. Бу тантана аны яңа иҗат уңышларына  рухландырсын дигән теләктә калабыз. Хәерле юллар сиңа, Райнур!

22 декабрьдә әти-әниләр җыелышы узды. Җыелышта түбәндәге темаларга чыгышлар тыңланды: “Шәхес тәрбияләүдә гаилә һәм мәктәп бердәмлеге.” , “Суицид һәм аны булдырмау юллары “.  9,11 классларга январь аенда булачак репетицион тестированиеләр тәртибе турында мәгълүмат бирелде.

Бүген мәктәпкә Кыш бабай белән Кар кызы килде. Алар барлык укучыларга, укытучыларга, хезмәткәрләргә Яңа ел күчтәнәчләре тараттылар. Шулай ук Татарстан Республикасы президенты Р.Н.Миннихановның котлау открыткалары тапшырылды.

Мәктәбебезнең алдынгы укучылары - 11 сыйныфтан Рахимуллина Резеда һәм Шакирзянова Ләйлә, 21 декабр ь   көнне Казан шәһәрендә үткәрелгән чыршы бәйрәмендә катнаштылар. Бу бәйрәмдә катнашу аларның уку һәм сәнгать өлкәсендә алган уңышлары нәтиҗәсе. 

     Мәктәптә Яңа ел бәйрәменә әзерлек эшләре башланды.Укучылар стенгазеталар чыгаралар, рәсемнәр ясыйлар, бәйрәмгә концерт номерлары әзерлиләр. Ә иң күңеллесе-бу көннәрдә барлык укучылар һәм укытучылар да дәресләрдән соң мәктәп янында кардан сыннар ясыйлар. Яңа ел килеп җиткәнен һәркем түземсезләнеп көтә.

19 декабрь көнне мәктәбебезнең 10 сыйныф укучысы Каримова Гүзәл  һәм инглиз теле укытучысы Мәҗитова Рәмзия Габдрәүф кызы Идел буе дәүләт физик тәрбия, спорт һәм туризм академиясенә IV ачык региональ “Learn to win” конкурсында катнашып , финалга үткән конкурсантларны бүләкләү тантанасына  бардылар. Шахмат-шашка уеннары остасы Гүзәл бу конкурска үзенең “Мой кумир” дигән видео-ролигын тәкъдим иткән иде. Аның бу эше иң яхшы эшләр исемлегенә кертелде . Гүзәл “Диплом призера” һәм кыйммәтле бүләккә лаек булды, шулай ук җитәкче укытучыга да  “Рәхмәт хаты” бирелде. Аларны бу уңышлары белән котлыйбыз!

13 декабрьдан мәктәбебездә физика атналыгы бара. 18 декабрь көнне башлангыч сыйныф укучылары белән физик  экспериментлар үткәрелде. 19 декабрь көнне 5-6 сыйныф укучылары "Табигатьнең гаҗәеп күренешләре" белән таныштылар. 7-11 сыйныф укучыларына кроссвордлар чишәргә тәкъдим ителде. Алар кроссвордларны  мәктәп сайтының "Год физики"  кертелмәсеннән ала алалар.

Мәктәбебезнең 4 нче сыйныф укучылары  “Ромашка”балалар бакчасына йөрүче нәни дуслары белән һәрвакыт аралашып торалар.  Ә бу атнада исә  алар,  Ләбиб Леронның “Тәпәләй белән Чәпәләй”әсәрен күчтәнәч итеп, балалар хозурына җиткерделәр. Әлеге театраль күренеш “Театр дөньясында “ дип аталган дәрестән тыш эшчәнлек шөгылендә әзерләнде. Нәни дусларының шат йөзләрен күрү 4 нче сыйныф укучыларын бик сөендерде. Тәрбиячеләрнең рәхмәт сүзләре дә “артистлар” ның  күңеленә сары май булып ятты.