Бүген гимназиябез китапханәсендә 5В һәм 6В сыйныфы укучылары белән Җиңү көненә багышланган «Данлы батырлыкны оныту юк» истәлек дәресе уздырылды. Дәрестә Үзәк балалар китапханәсе хезмәткәре Татарстандагы Бөек Ватан сугышы еллары, Ленинград блокадасы, тормышны, якты кояшны, хуш исле чәчәкләр исен яраткан сугыш балалары тарихы турында сөйләде. Шулай ук Бөек Ватан сугышының куркыныч елларында фашизмга каршы көрәшкә өлкәннәр белән беррәттән подпольщиклар һәм партизаннар булып киткән гади мәктәп укучылары турында да сүз алып барылды. Укучылар герой-пионерларның тормышы һәм батырлыклары белән таныштылар. Вали Котик, Зина Портнова, Леня Голиков, Марат Казей турында күп кенә мәгълүмат белделәр. Чара презентация һәм видеофрагментлар белән үрелеп барды. Укучылар Бөек Ватан сугышында катнашкан туганнарының тарихларын сөйләделәр. Чара ахырында күргәзмәдән китаплар, шулай ук «Бабай медальләре» китаплар сериясе тәкъдим ителде.

Бүген 5А сыйныфында кунакта КНИТУның информатика һәм гамәли математика кафедрасы мөгаллиме Галимянова Әнисә Исмәгыйл кызы булды. Әлеге сыйныф сәгатендә укучылар “Интернетта иминлек кагыйдәләре” дигән темага фикер алыштылар. Әнисә Исмәгиловна укучыларга интернетта нинди куркынычсызлык кагыйдәләрен үтәргә, шәхси сайт яки битеңне ничек сакларга кирәклеге турында сөйләде.

Бөек Җиңү бәйрәме уңаеннан гимназиябез укучылары сугыш ветераннарының тыл хатыннарына һәм тыл ветераннарына Татарстан Республикасы Рәисе Рөстәм Миңнеханов һәм шәһәр мэры Илсур Метшин исеменнән рәхмәт сүзләре һәм бүләкләр тапшырдылар. Укучылар ветераннарга ныклы сәламәтлек, озын гомер, имин тормыш теләделәр һәм барысы өчен дә рәхмәтләрен белдерделәр.

3А сыйныфында кунакта Экология министрлыгының экологик агарту  һәм иҗтимагый оешмалар белән үзара хезмәттәшлек бүлегенең әйдәп баручы белгече Галимова Нәргизә Шәүкәт кызы булды. Әлеге сыйныф сәгате укучыларга экологик тәрбия бирү максатыннан үткәрелде. Укучылар "Эколята" дигән проект белән таныштылар, үзләренең фикерләрен җиткерделәр.

Бүген гимназиябез укучылары "Кожаный мяч"- футбол ярышында катнаштылар. Афәрин, егетләр!!!

Бүген гимназиябездә сәнгать мәктәбенең отчет концерты булып узды. Концерт программасында мәктәп укучылары да, педагоглар да катнашты.
2 сәгатькә сузылган бу чара тамашачыларны гына түгел, ә иң мөһиме, мәктәп укытучыларын да шатландырды, алар һәрвакыт үз укучыларының уңышлары һәм казанышлары өчен күп көч һәм энергия бирәләр.
Бу якты бәйрәмдә катнашучыларның барысы да музыканың гаҗәеп дөньясы белән очраштылар һәм сәнгатьнең кабатланмас дөньясына чумдылар.
Сәнгать мәктәбе коллективы тагын бер кат үзенең осталыгын, профессионализмын һәм педагогларның грамоталыгын, укучыларының сәләтле булуларын раслады.
 

Бүген 4 нче һәм 5 нче сыйныф укучылары Вахитов һәм Идел буе районнары арасында уздырылган җиңел атлетика буенча ярышта катнаштылар һәм зур җиңүләр белән кайттылар. Афәрин, укучылар!!!