23 февраль – Ватанны саклаучылар көне уңаеннан Бөрбаш урта мәктәбе укучылар һәм укытучылар коллективы авылыбызның барлык бабайларын, әтиләрен, ир – егетләрен әлеге күркәм бәйрәм белән котладылар. Укучыларыбыз һәр йортка кереп, аларны матур итеп   котлап, открыткалар бүләк иттеләр.

Район күләмендә үткәрелгән “Йолдызлык – 2012” җыр һәм бию фестивалендә укучыларыбыз чыгыш ясап кайттылар.

23 нче февраль көнне Бөрбаш хоккей мәйданчыгында эшмәкәр Галиуллин Илдар призына  мәктәп укучылары,авыл яшьләре һәм студентлар арасында хоккей ярышлары булып узды. I урынны студентлар командасы,  II урынны мәктәп укучылары командасы, III урынны авыл яшьләре командасы яулады. Афәрин, егетләр!

21 нче февраль көнне 9 нчы сыйныфларда Рөстәм Шайдуллович ачык тәрбия сәгате үткәрде. “Кеше – Җирнең гүзәл чәчәге” темасы астында үткән бу чарада кешедә булырга тиешле  уңай сыйфатлар хакында сүз алып барылды. Рөстәм Шәйдуллович төрле мәкальләр һәм әйтемнәр аша бу сыйфатларны укучыларга аңлата һәм аларның мәгънәсенә төшендерә алды. Ачык тәрбия сәгате бик уңышлы үтте.

22 нче февраль көнне  укучыларыбыз макулатура җыю өмәсе үткәрделәр. Өмәдә барлык укучылар да зур активлык күрсәтте. Һәр укучы үз вакытында, тиешле күләмдә макулатура алып килеп тапшырды. Бу эшне  мәктәбебезнең хуҗалык эшләре җитәкчесе Эльмира апалары белән, укучылар оешмасында хәтер һәм тәртип саклау  министрлары булып торган егетләребез  Шафигуллин Фаяз һәм Сафаргалиев Азатлар  башкарды.

21 нче февраль көнне Казан Федераль университетында укучыларның һәм студентларның III Республикакүләм конференциясе булып үтте. Анда 10 нчы сыйныф укучысы Шарипова Гөлнур “Татар әдәбиятында әдәби- эстетик эзләнүләр” секциясендә чыгыш ясап, “Иң яхшы доклад ясаучы укучы” исемен алып, Мактау грамотасы белән бүләкләнде. Җитәкчесе Г.И. Мифтахова да сертификатка лаек булды. Аларның ясаган чыгышы “Татар лингвокультурологиясе: проблемалар һәм перспективалар” җыентыгында басылып чыкты

Россия мәгарифе тәҗрибә мәйданын хәтерләтә. Даими рәвештә яңа укыту программалары, нанотехнологияләр һәм замананың башка модалы терминнарын кулланышка кертергә яраткан түрәләребезнең ничек үзләренең башы әйләнми диген!

БДИ авырткан башка тимер тарак булып кадалганы гына җитмәгән, инде электрон журнал дигәннәре гамәлгә кереп маташа. “Татарстан 2012 елда тулысынча электрон журналларга күчереп бетерү турында карар кабул иткән Россиянең бердәнбер төбәге”, - диде Татарстан фән һәм мәгариф министры Альберт Гыйльметдинов.
 

Район күләмендә башлангыч сыйныфлар арасында рус теле, математика һәм инглиз теле фәннәреннән олимпиадалар булып үтте. Безнең укучыларыбыз Гильметдинова Гүзәл, Нуретдинова Фирүзә олимпиадаларда катнашып, үзләрен сынап кайттылар

Иң яхшы вожатый конкурсы

18 нче февраль көнне булып узган “Аҗаган” ярышларында “Кызыллар” һәм “Яшелләр”командалары көч сынашты. Бу көнне иртәдән укучыларыбыз нык әзерлек белән, ашкынып мәктәпкә килделәр. Командирлар үз командалары белән ныклы әзерлек эшләре алып бардылар. Стройда йөрү, сугышчан җырлар башкару осталыкларын да күрсәттеләр. Командалар арасында төрле кызыклы  уен – ярышлар да уйнатылды. Төрле этапларны үтеп килгәннән соң “батырларыбыз” җылы учак янында тәмле ашлар белән сыйландылар. Ял итеп, көч җыйганнан соң, командалар арасында  кабат ярышлар башланып китте.