8 нче октябрь көнне мәктәбебездә Республикакүләм семинар булып узды. Тәрбия эшләре буенча методистлар Балтач районы мәктәпләренең тәрбия өлкәсендә эш алымнары белән танышырга килделәр.Килгән кунаклар мәктәбебез һәм класстан тыш эшчәнлек белән таныштылар,үзләренең матур теләкләрен белдерделәр

Мәктәбебез бакчасында үскән уңышны җыю дәвам итә. Бүген бакчада үскән кәбестәгә чират җитте. Кәбестәләр бик яхшы үскән, витаминлы салатлар белән укучыларыбыз мәктәп ашхәнәсендә тукланырлар.

8 нче октябрь көнне мәдәният йортында Габдрахман Әпсәләмовның "Ак чәчәкләр" әсәре буенча эшләнгән премьера тәкъдим ителде. Бу премьера безнең күңелләрдә җылы хисләр генә калдырды.

5 нче октябрь көнне укучылар оешмасы Ветеран укытучыларыбызны бәйрәм белән котлап кайттылар. Әфәрин!

3 нче октябрь көнне бертөркем егетләр һәм кызларыбыз район күләм волейбол ярышында катнашып кайттылар. Егетләребезне 3 нче урын алу белән чын күңелдән котлыйбыз.

5 нче октябрь көнне мәктәбебезгә Укытучылар көне белән котларга “Ромашка” ясле бакча коллективы килде. Нәни дусларыбыз үзләренең шигырьләрен- җырларын бүләк иттеләр.

Мәктәбебездә укытучыңны котла акциясе үтте. Һәр укучы Укытучыларны профессиональ бәйрәмнәре белән ихластан тәбрикли алды.
Күзләреңдә очкын, ялкын,
Йөрәкләргә учак яктың,
Яраткан мөгаллимем.
Күңел тәрәзәләрен кактың
Саф чишмәләр булып актың,
Яраткан мөгаллимем.

5 нче октябрь көнне укучыларыбыз чәчәк бәйләмнәре тотып Укытучыларыбызны матур бәйрәмнәре белән котладылар.

2 нче октябрь көнне авылыбыз мәчетендә Корбан ашы булып узды.

Хөрмәтле укытучылар, хезмәт ветераннары!
Укытучылар көне уңаеннан Сезгә ихлас теләкләремне һәм лаеклы рәхмәт сүзләрен җиткерәм! Сезнең актив гражданлык позициясе, профессиональлек, укучыларга булган сизгер, игътибарлы мөнәсәбәтегез, фидакарь хезмәтегез бәя биреп бетергесез.
Балалар белән эшләү зур игътибарлылык һәм сабырлык таләп итә. Ә бу җиңелләрдән түгел. Алдыбызга зур җаваплылык – яшь буынга гыйлем һәм тәрбия бирү бурычы тора. Безнең кулда – ил язмышы, республикабызның киләчәге.
Татарстан мәктәпләрендә гаять зур интеллектуаль һәм иҗади потенциал тупланган. Безнең укытучыларыбыз – Россия мәгариф өлкәсендә һәрвакыт әйдәп баручылар. Хезмәтегездә уңышлы рәвештә алдынгы методикаларны, яңа технологияләрне куллану, эшне заман таләпләренә туры китереп оештыру югары нәтиҗәләр бирә. 2014 елда безнең Нурлат мәктәбеннән биология укытучысы Алла Николаевна Головенькинаның “Ел укытучысы” бөтенроссия конкурсында җиңү яулавы да – моның ачык мисалы.
Болар белән беррәттән, мәктәпләр, аеруча да авыл җирендә, яшь укытучыларны көтә. Бүген югары уку йортларын тәмамлаучы иң яхшы белгечләрне җәлеп итү буенча Хөкүмәтебез дәрәҗәсендә социаль ярдәм күрсәтү чаралары күрелә. Укытучы хезмәтен гомерлек һөнәр итеп сайлап, 1 сентябрьдә хезмәт юлын башлаган яшь мөгаллимнәргә аеруча рәхмәт сүзләрен җиткерәм.
Аерым җылы сүзләр белән күп еллар дәвамында республикабыз мәгарифенә фидакарьләрчә һәм чын күңелдән хезмәт күрсәткән, аның үсешенә бәяләп бетергесез өлеш керткән ветераннарыбызны һәм укытучы династиясе вәкилләрен котлыйсым килә.
Белем бирү - дөньяда иң борынгы һәм иң дәрәҗәле һөнәр. Белем алуны энә белән кое казуга тиңлибез, ә менә белем бирү – меңнәрчә бала күңелен шифалы сугаруга тиң. Һәм бу сәләт һәркемгә дә бирелми. Сез укытучы һөнәренең барлык серләрен дә камил беләсез һәм үз белемнәрегезне укучыларыгыз белән бүлешәсез. Узган уку елындагы әһәмиятле җиңүләрегез өчен рәхмәт Сезгә. Агымдагы елда да аларның аз булмаячагына ышанам. Татарстан укытучылары башкача эшли дә алмый. Министрлык исә, Сезнең Татарстан Республикасы мәгариф системасы үсешенә юнәлдерелгән иң кыю инновацион проектларыгызны һәрчак хуплаячак.
Барыгызга да сәламәтлек, күңел тынычлыгы, иҗади эзләнүләр, югары максатларга ирешүегезне, тырыш укучылар һәм һөнәри планнарыгызның гамәлгә ашуын телим!
Татарстан Республикасы Премьер-министры урынбасары –
Татарстан Республикасы мәгариф һәм фән министры Э.Н. Фәттахов