27 нче октябрь көнне башлангыч классларда әти – әниләр өчен җыелышлар үткәрелде. Әти – әниләргә класс җитәкчеләре балалары хакында сөйләделәр, каникул чорында балаларны куркыныч хәлләрдән саклау һәм аңлату өчен, балаларының иминлеген һәм сәламәтлеген саклау өчен инструктажларга куллар куйдылар. Мәктәп һәм әти – әниләр бердәм булып эшләгәндә уку һәм тәрбия өлкәсендәге эшләрнең нәтиҗәсе уңай булыр. Мәктәбебез укучыларының әти – әниләре җыелышларда һәрвакыт актив катнашалар, мәктәп тормышы, балаларның анда яшәеше белән бик кызыксыналар. Җыелышларда үзләренең теләкләрен белдерәләр, күңелләрендә булган фикерләрен уртага салып сөйләшәләр.

27 нче октябрь көнне мәктәбебездә 7,8,9,10,11 класслар өчен көзге бал кичәсе үткәрелде. Укучылар кичәгә алдан әзерләнделәр.Бәйрәмнең беренче өлеше төрле биремнәрдән торды. Көз кызы,серле букет, икмәк –табын күрке,көзге рәсем, тәмлә салат, иң оста шигырь сөйләүче номинацияләре билгеләнде. Бу бәйге нәтиҗәләре буенча класслар арасында урыннар бирелде,1 урында 10 класс, 2 урында 8, 11класслар, 3 урында 7, 9 класслар калды. Бәйрәмнең икенче өлеше ашханәдә дәвам итте. Укучыларыбыз үзләре ясаган салатлардан, пешергән икмәкттән, кабак бәлешләреннәң авыз иттеләр. Бәйрәм бик матур , өешкан төстә барды. Бәйрәмне әзерләргә ярдәм иткән мәктәп дирекциясенә, укытучыларга, поварларга,укучыларга зур рәхмәтебезне җиткерәсе килә.

27 нче октябрь көнне мәктәбебездә 4,6,8 нче класслар өчен татар теленнән мониторинг үткәрелде. Укучыларыбыз үз белемнәрен күрсәтә алдылар.

Декабрь аенда Россиянең 70 төбәгенең 19 мең мәктәбендә 4нче сыйныфта белем алучы 600 меңләп бала математика һәм рус теленнән сынау тикшерү эшләре башкарачак.
Россия мәгариф һәм фән өлкәсендә күзәтчелек буенча федераль хезмәт сайтында хәбәр ителгәнчә, киләчәктә бу төр эшләрне һәр уку елы азагында: 2016 елда 4нче сыфныфлар өчен, 2017нчедә 4нче һәм 5нче сыйныфларга уздыру планлаштырыла.
“Бөтенроссия тикшерү эшләре дәүләт йомгаклау аттестациясе түгел, төбәк һәм мәктәп дәрәҗәсендә үткәрелә, аларны моңа кадәр, традицион рәвештә, күп кенә төбәкләрдә һәм аерым мәктәпләрдә уздырылган еллык контроль эшләре белән чагыштырырга була”, -– дип билгеләп узган ведомство башлыгы Сергей Кравцов.
Бөтенроссия тикшерү эшләренең үзенчәлекләре булып вариантлар төзү, эшләрне үткәрү һәм бәяләү ысулларының бердәмлеге, шулай ук эшләрне бөтен ил мәктәп укучыларына бер үк вакытта башкару мөмкинлеге бирә торган заманча технологияләр санала.
Сынау эшләренең нәтиҗәләре әти-әниләргә балаларының белем алу траекториясен билгеләүдә файдалы булырга мөмкин. Шулай ук аларны төп белем алу этаплары йомгаклары буенча укучыларның әзерлек дәрәҗәсен бәяләү, мәктәпләрдә фәннәрне укытуны камилләштерү һәм төбәк белем бирү системаларын үстерү өчен файдаланып була.
Моннан тыш, проект Федераль дәүләт мәгариф стандартларын томышка ашыру нәтиҗәләрен мониторингларга ирек бирер, Россиядә бердәм белем бирү киңлеге булдыруга ярдәм итәр дип көтелә.

27 октябрь көнне мәктәбебездә "Укучыларның Интернет челтәрендә куркынычсызлыгы Россиякүләм дәресе" кысаларында 5-7 сыныфлар өчен "Интернет челтәрендә  куркынычсызлык" темасына дәресләр үткәрелде.

Дәресләрнең максаты, Интернет челтәрендә балалар куркынычсызлыгына җәмгыятьнең игътибарын җәлеп итү һәм укучыларның мәгълүмати технологияләр өлкәсендә белемнәрен үстерү. 

24 нче октябрь көнне бер төркем укучыларыбыз Пыжмара авылында “Кама” күмәк хуҗалыгы призына 2001-2002 нче елгылар өчен үткәрелгән армреслинг ярышында катнашып кайттылар. Укучыларыбыз бу ярышта алдынгы урыннарны яуладылар. Хисамутдинова Ралия, Галимова Әльфинә, Миннебаев Рәнис, Шайхутдинов Фәннүр 1 урын, Нурмухаметов Солтан 2 урын, Нуретдинов Нияз 3 урыннарны яулаулары белән чын күңелдән котлыйбыз,алдагы ярышларда да уңышларга ирешүләрен телибез. Афәрин!

Башлангыч классларда “Көзге рәсем” бәйгесе игълан ителде. Һәр класс укучысы бу бәйгегә тырышлык белән әзерләнә.Матур рәсемнәр класс почмакларын бизәп тора. Тиздән бу бәйгегә нәтиҗә ясалыр. Иң яхшы рәсем ясаучылар билгеләнер.

Укучыларыбыз һәр фәннән контроль эшләр эшлиләр. Аларга уңышлар телибез.

2015 елның 2 ноябреннән республика мәктәп укучыларының көзге каникуллары башлана. Каникул 8 ноябрьгә кадәр дәвам итәчәк. Исегезгә төшерәбез, 2015-2016 уку елына балаларга аларның гомере һәм сәламәтлеге куркынычсызлыгын тәэмин итүче оешкан ял булдыруга шартлар тудыру, каникуллар вакытында укучылар өчен үткәрелә торган чараларның бердәй планын гамәлгә ашыру максатыннан, шулай ук әти-әниләрнең күпсанлы сораулары буенча Татарстан Республикасы Мәгариф һәм фән министрлыгы тарафыннан каникуллар үткәрүнең бердәй вакыты тәкъдим ителгән иде. Закон буенча каникуллар үткәрү вакыты турындагы карар кабул итү хокукы аерым мәктәп администрацияләре карамагында. Шулай да, күпчелек ата-аналар фикеренчә, республиканың барлык мәктәпләрендә дә бер үк вакытта каникул булдыру балалар өчен дә, өлкәннәр өчен дә кулай.

Мәктәбебездә ОБЖ укытучысы Акбиров Рим Фаргатович тарафыннан классларда “Балаларның һәм яшүсмерләрнең боз өстендә үз-үзләрен тоту кагыйдәләре һәм саклану чаралары”темасы астында дәресләр үткәрелде.