24 нче апрель көнне, Казан (Идел буе ) федераль университеты, филология һәм мәдәниятара  багланышлар  институты, МКУ “Татарстан республикасы Саба   муниципаль  районы Башкарма комитетының  мәгариф  идарәсе“, МБГБУ “Сәләтле балалар өчен урта гомуми  белем мәктәп-интернаты”  берлегендә “Филология, тарих, мәдәният –яңа  караш” I зонакүләм фәнни-гамәли конференция булды.

Конференциядә мәктәбебез укучылары уңышлы гына чыгыш ясадылар. 9 нчы сыйныф укучысы Гүзәл Кәримова  (җитәкчесе: Д.Г.Галимуллина) – II урын , 10 нчы сыйныф укучысы Айдар Гайфуллин (җитәкчесе: М.М.Галявиева ) - III урынга  лаек булдылар. Аларны зур уңышлары белән  котлыйбыз!

1 -19 апрельдә сәләтле балалар интернат- мәктәбендә «Филология, культура, история: новый взгляд» дип аталган  I зона фәнни – практик конференциясенең  читтән торып үткәрелгән туры узды.  9 нчы сыйныф укучысы Кәримова Г. һәм 10 нчы сыйныф укучысы Гайфуллин А. ның эшләре икенче турга үтте. 

22 апрель көнне мәктәбебездә 9 нчы сыйныф укучыларының әти-әниләре белән ” БДИ буенча апелляциягә бирү һәм аның тикшерү тәртибе белән таныштыру” дигән темага җыелыш үтте. Сыйныф җитәкчесе Дания Гайфетдиновна 29 апель көнне дәүләт имтиханнарын татар теле фәне белән башлап җибәрүләрен әти-әниләргә җиткерде. Кабаттан үзенең киңәшләрен әйтте. Апелляциягә бирү тәртибен бәйнә-бәйнә аңлатты. Җыелышта әти-әниләр тулы составта катнашты.

22 апрель – Бөтендөнья Җир көне. Шушы уңайдан эзтабар отрядлары белән “Рәхмәт сиңа, Җир-анабыз, безгә байлык бирәсең” дигән темага чара узды. Аның максаты: укучыларның экологтк белемнәрен тирәнәйтү, табигатькә гуманлы мөнәсәбәт, тереклек өчен җаваплылык хисе тәрбияләү, табигать кочагында үз-үзеңне тоту кагыйдәләрен искә төшерү иде. Чара күңелле уеннар, җырлар белән үрелеп барды.

Бүген,  21 апрель көнне, “Иммунитетны  ныгыту”  атналыгы  кысаларында  Юлбат авыл  җирлеге фельдшеры  белән очрашу  булып  узды. Укучыларга, иммун  системаны  ныгыту һәм  саклау  максатыннан,  ясала  торган прививкалар  хакында  тулы, кирәкле  мәгълүмат бирелде.

Бүген, башлангыч  сыйныф  укучылары  “Тылсымлы кәгазь серләре” түгәрәгендә кунакта булдылар. Гөлсинә Раяновна җитәкчелегендә бишенче сыйныф укучыларының  башкарган эшләнмәләрен  күреп сокландылар.Чынлап та, гади генә кәгазь битеннән бәйләм-бәйләм гөл-чәчәкләр, нәфис эшләнмәләр ясарга,өй бизәге булырлык матурлык тудырырга мөмкин икәнлегенә ышандылар.

  Укучыларыбызга, “Табигать патшалыгына сәяхәт” исемендәге экологик танып белү уены да ошады.

Мәктәбебездә башлангыч сыйныфлар атналыгы дәвам итә. Бүген  “Кара урманнар чакыра” спорт  уены узды. “Ерткычлар” һәм “Үлән ашаучылар ” командасы үзара ярышып төрле биремнәр үтәделәр. Үзләренең җитезлекләрен, кыюлыкларын күрсәттеләр.

16, 17 нче апрель көннәрендә Балалар иҗат үзәгендә “Сәләтле балачак - өметле киләчәк” конкурс – фестиваленең “Вокал”,“Театр”,“Фольклор” номинацияләре үткәрелде. Бәйгенең төп бурычлары һәм максатлары булып үсеп килүче яшь буынны сәнгать ягыннан үстерү, активлаштыру, гореф-гадәтләрне сәнгати яктан камилләштерү, балалар театр сәнгатен яктырту иде. “Вокал-соло” номинациясендә – 23 чыгыш, “Уен кораллары ансамбле” номинациясендә – 7 чыгыш, “Вокал ансамбле” номинациясендә – 3 чыгыш, “Театр”,“Фольклор” номинациясендә 9 чыгыш каралды. Әлеге конкурста мәктәбебез укучыларының да уңышлары бар.  “Вокал-соло” номинациясендә 5 нче сыйныф укучысы Мансуров Райнур III урын, 10 нчы сыйныф укучысы  Рахимуллина Резидә II урын алдылар. “Театр” һәм “Фольклор”  номинацияләрендә Фатхриева Райхана Ханафиновна җитәкчелегендәге  театр коллективы III урынга лаек булды .

Бүген БДИын оештыручы укытучыларның укулары оештырылды. Мәктәбебездән 8 укытучы укуларда катнашты.