30 нчы сентябрь- Донецк Халык Республикасы, Луганск Халык Республикасы, Запорожье һәм Херсон өлкәләренең Россия Федерациясенә кушылу көне буларак билгеләп үтелә.
Әлеге истәлекле вакыйга уңаеннан өлкән сыйныф укучылары өчен "Бердәмлек көче" дип аталган махсус чара- патриотик сәгать оештырылды. Укучылар тарихи вакыйгалар буенча белемнәрен ныгыттылар.
Чаранын максаты: үсеп килүче буын арасында Ватанга мәхәббәт һәм аның тарихы өчен горурлык хисе тәрбияләү.

29 нчы сентябрь көнне 8Б һәм 9А сыйныфы укучылары сыйныф җитәкчеләре белән берлектә "Пушкин картасы" проекты кысаларында В. И. Ленин исемендәге мәдәният йортында "Музыкальный калейдоскоп" дип исемләнгән концерт карап кайттылар. Укучылар танылган җырларны заманча аранжировкада тыңладылар, яшь башкаручылар белән таныштылар, яхшы кәеф алдылар!

 26 нчы сентябрь көнне гимназиянең 9В һәм 10 нчы сыйныф укучылары укытучылары Розия Базаровна һәм Лиана Александровна җитәкчелегендә "Россия - минем тарихым" паркында тарихи күргәзмәдә булып кайттылар. Укучыларда илебез тарихы буенча дәрестән тыш өстәмә яңа мәгълүмат зур кызыксыну уятты.

25 нче сентябрь көнне "Татар сүзе" V халыкара нәфис сүз телевизион бәйгесенең гала- концерты булып узды. Әлеге масштаблы чарада гимназиянең 9А сыйныфы укучысы Галиев Кәрим "Проза" номинациясендә II урынга лаек булды. Афәрин, Кәрим! Кәримгә киләчәктә дә уңышлар теләп калабыз!

25 нче сентябрь көнне Шәүкәт Хәсән улы Биктимеров исемендәге Казан театр училищесы студентлары гимназиянең 1- 4 сыйныф укучылары өчен "Тукайлы балачак" дип аталган сәхнәләштерелгән тамаша күрсәттеләр.
Укучыларыбыз Габдулла Тукайның тормыш юлы һәм иҗаты белән таныштылар, геройларга ияреп Тукай дөньясына сәяхәт иттеләр. Тамаша татар халкының гимны булып саналган "Туган тел" җыры белән тәмамланды.
Шундый эчтәлекле чара оештырганнары өчен Казан театр училищесы студентларына һәм җитәкчеләренә бик зур рәхмәт!

Гимназия базасында эшләп килүче регби түгәрәгенә йөрүче укучыларыбыз "Осенний фестиваль РСШ по регби" дип исемләнгән ярышта катнаштылар һәм I урынга лаек булдылар. Афәрин, укучылар!
Балаларга һәм регби түгәрәге җитәкчесе Сатаров Кирилл Вадимовичка рәхмәтебезне белдерәбез!

22 нче сентябрь көнне гимназиядә дүшәмбе иртәсе традицион рәвештә Рәсәй һәм Татарстан флагларын күтәрүдән, гимннарны башкарудан башланып китте.
Тантанадан соң "Мөһим сөйләшүләр" дәресләр циклы дәвам итте. Укучылар белән "Атом сәнәгате хезмәткәрләре көне" дигән темага сөйләшүләр алып барылды. Дәреснең максатлары:
- атом тармагы үсешенә өлеш керткән галимнәргә карата горурлык хисе тәрбияләү;
- атом технологияләре белән бәйле фән һәм техниканың перспектив юнәлешләренә кызыксыну уяту.

20 нче сентябрь көнне Казан шәһәренең 35 нче лицеенда Әтиләр көненә багышланган спорт ярышы булып узды. Ярышта гимназиябезнең данын әтиле- уллы Фазуллиннар гаиләсе яклады. Алар барлык этапларда югары нәтиҗәләр күрсәттеләр һәм 4 нче урынга лаек булдылар!
"Югары күрсәткечләре, гимназиябез данын яклаганнары өчен Фазуллиннар гаиләсенә, җанатарларга зур рәхмәтләребезне белдерәбез!"- дип матур теләкләрен җиткерде гимназия директоры Гөлшат Әбүзәровна.

20 нче сентябрь көнне гимназиябез укучылары "Урам" паркында оештырылган "Милләтләр кроссы- 2025" масштаблы спорт чарасында катнаштылар. Шулай ук гимназия территориясендә дә укучылар белән көзге кросс үткәрелде.
Әлеге чаралар сәламәт яшәү рәвешен пропагандалау, җиңел атлетиканы популярлаштыру, балалар һәм өлкәннәрнең актив ялын оештыру максатыннан уздырыла.

Гимназиябездә тарихи вакыйга - “Алдынгылар хәрәкәте” нең беренчел бүлек советы рәисен сайлау узды.
417 сайлаучының тавышлары түбәндәгечә бирелгән:
1. Мәхмүтова Камилә - 320;
2. Галимәнова Мәликә - 86;
3. Бозылган бюллетеннәр - 11.
Шулай итеп, сайлауда күпчелек тавыш белән 10 нчы сыйныф укучысы Мәхмүтова Камилә җиңде! Камиләне чын күңелебездән котлыйбыз!
Камилә, җаваплы вазифаңда сиңа уңышлар телибез! Урынбасарың Мәликә белән һәрвакыт шулай бер дулкында булып, бердәм команда туплап яңа үрләр яуларга язсын!

Видеога сылтама: https://vk.com/club216931602?from=groups&z=video-216931602_456239435%2F8883876d0ec31cd1f2%2Fpl_wall_-216931602