Татарстан Республикасы мәгариф министрлыгы тарафыннан дару үләннәре җыю каралган иде. Безнең мәктәбебез укучылары да беренче эшләрен башлап җибәрделәр. Каен бөреләре җыюда һәр сыйныф актив катнашты.

Бу атнада да ГТО нормативлары тапшырулары бара.Турникта тартылу, идәннәң этелү, аяклар туры хәлдә бармаклар яки уч төбе белән идәнгә орыну кебек төрләрне укучылар бик зур торышлык һәм теләп башкардылар

Атна саен, җомга көнне үткәрелә торган радио тапшыруда укучыларыбыз ,Бөек Җиңүнең 70 еллыгына әзерлек максатыннан, һәркайсы үзләренең сугышта катнашкан туганнары, әби – бабайлары хакында таныштырып баруны дәвам итәләр. Алар шулай “Үлемсез полк” акциясенә әзерлек эшләре алып баралар. 

Урманчылар көне уңаеннан мәктәбебездә 21 нче март көнне Хадыев Фәргат Фатих улы белән очрашу булды. Аның белән укучыларыбыз бик теләп әңгәмә кордылар, үзләрен кызыксындырган сорауларга җаваплар алдылар.

Биология фәне укытучысы Сибагатуллин Мәлик Тимерханович 8 нче сыйныфларда ачык дәрес үткәрде. Дәрес бик эчтәлекле һәм файдалы үтте. Укучылар үзләре өчен бай эчтәлекле һәм тормышта кирәкле булган мәгълүматлар ала алдылар.

19 март көнне мәктәбебезнең сөйкемле , чибәр кызлары белән бик матур бәйрәм булып үтте. Нәүрүз бәйрәме уңаеннан үткән әлеге бәйге 8 - 11 сыйныф кызлары арасында бәйге рәвешендә алып барылды. Кызлар үзләрен әлеге бәйгедә төрле яктан - кул эшләре , пешерү осталары, татар халкының җырларын, биюләрен башкару осталары , бишек җырлары җырлау буенча сынап карадылар. Берсен дә аерып алып була торган түгел , һәркайсы үзенчә завыклы, үзенчә матур итеп, тырышып әзерләнгән. Тамашачылар булып, карап утырган укучыларыбыз да шундый фикердә булдылар. Аларның һәммәсе дә мәктәбебезнең чибәр, тыйнак , сөйкемле “Яз гүзәлләре” исеменә лаек булдылар. Бик күңелле, үзенчәлекле, тәрбияви бәйрәм кичәсе булды ул. Әфәрин кызлар, рәхмәт! 

“Изгелек атнасы” кысаларында аерым план төзелде мәктәбебездә. Шул уңайдан һәр класс төрле – төрле эшләрдә аерым активлык күрсәтте. Классларда “Яхшылык җирдә ятмас” темасы астында тәрбия сәгатьләре үтте. Укучылар китапханәдә искергән китапларны да рәтләп куйдылар, канатлы дусларыбызга сыерчык оялары да ясадылар, тимурчылык эшен дә онытмадылар. Менә шулай һәркем изгелек кылырга омтылды . Бездә гомумән әнә шундый матур эшләрдә укучыларыбыз һәрвакыт изге күңелле һәм активлар. Әфәрин, укучыларыбыз!

14 нче март көнне авылдашыбыз Фидаил Шакиров призына көрәш ярышлары үткәрелде. Безнең мәктәбебездән Нуретдинов Нияз, Сәләхетдинов Рәдис, Шәйхетдинов Фәннүр, Галимов Әлфис, Шакиров Әмир, Шакиров Рәмзилләр катнашты. 

Фидаил Шакиров призына үткәрелгән көрәш ярышларында мәктәбебез укучылары да бик теләп катнаштылар һәм төрле дәрәҗәдәге урыннар яуладылар. Сәләхетдинов Рәдис һәм Шакиров Әмир 3 нче урынны алсалар, Галимов Әлфис 2 нче урынга лаек булды. Укучыларыбызны уңышлары белән котлыйбыз!!!

15 нче март көнне мәктәбебез укучылары һәм авылыбыз халкы өчен бик күңелле бәйрәм оештырылды авылыбыз җирлегендә. Ул көнне авылдашыбыз, данлыклы көрәшче Фидаил Шакиров истәлегенә зур көрәш бәйгесе дә үтте. Нәүрүз – яз бәйрәме уңаеннан төрле кызыклы уен – ярышларда катнаштылар укучыларыбыз. Аннан һәркем рәхәтләнеп “Карга боткасы” белән сыйланды, самоварда кайнап торган тәмле чәй эчте. Бик матур, күңелле бәйрәм булды ул . Язгы кояш та күңелләргә җылы нурларын күбрәк өләште ахры ул көнне, чөнки һәркем шат йөзле, күтәренке рухлы иде.