1 нче июнь көнне мәктәбебездә “Кояшкай” ял лагере эшли башлады. Укучыларыбызны лагерьдә кызыклы чаралар , очрашулар көтә. Лагерьнең беренче көнендә укучыларыбыз рәхәтләнеп бәйрәм иттеләр..

31 нче май көнне һәр сыйныфта эш гөрләде. Укучыларыбыз китаплар тапшыралар, класс бүлмәләрен җыештырып, тәртипләп озын җәйге ялларга таралалар. Каникулда рәхәтләнеп ял итеп, көч җыеп килерләр дип ышанып калабыз.

Кадерле дуслар! Хөрмәтле әти-әниләр һәм хезмәттәшләр!
Ихлас күңелдән сезне әлеге матур бәйрәм – Халыкара балаларны яклау көне белән котлыйм!
Сез бу дөньяга бәхетле булыр өчен туасыз. Ә без, олылар, сезгә игътибарыбызны, мәхәббәтебезне бүләк итәбез, һәрчак ярдәм кулын сузарга әзер торабыз.
Республикабыз данын төрле бәйгеләрдә һәм ярышларда яклаган укучыларыбызның уңышлары белән горурланабыз. Дүрт ел рәттән егерме дүрт фән буенча үткәрелеп килүче Бөтенроссия мәктәп укучылары олимпиадалары нәтиҗәләре буенча Татарстан Республикасы Мәскәү һәм Санкт-Петербург командаларыннан соң өченче урында. Шушы көннәрдә генә республикабыз егет-кызлары WorldSkills Russia “Яшь профессионаллар” Милли чемпионатында 64 регион арасында өченче урынга лаек булды.
Сезгә белем, күңел җылысы бүләк итүче мөгаллимнәргә рәхмәт сүзләре җиткерәсе килә. Татарстан мәгарифенең көндәшлеккә сәләтлелеге үсүе - укытучыларыбызның тырышлыгы һәм нәтиҗәле хезмәте.
Язмышын авыр тормыш хәлендә һәм әти-әни назыннан мәхрүм калган балалар белән эшләүгә багышлаган педагогларга, шулай ук гаиләләрендә уллыкка яки кызлыкка алган һәм сәламәтлекләре чикләнгән балалар тәрбияләүче әти-әниләргә аерым рәхмәт әйтәсе килә. Сез әлеге балалар бәхетле булсын, мәхәббәт һәм игътибар тоеп яшәсен өчен барысын да эшлисез, аларның җиңүләренә сөенәсез һәм уңышсызлыклары өчен борчыласыз.
Бүген – җәйнең һәм көтеп алган каникулларның беренче көнендә республикабызның барлык төп мәйданнарында фестивальләр, театраль тамашалар, концерт программалары, спорт ярышлары һәм конкурслар уза. Бу көнне балаларыбызга бүләк иткән игътибар һәм күңел җылылыгы һәрчак аларны озата барсын, аларга акыллы, тәүфыйклы һәм игелекле кешеләр булып үсәргә ярдәм итсен иде.
Чын күңелдән һәммәгезгә дә тынычлык, изгелек, иминлек, бәхет һәм шатлык телим!
Ә укучылар җәйге ялларын файдалы һәм күңелле үткәрсен!

Татарстан Республикасы Премьер-министры урынбасары –
Татарстан Республикасы мәгариф һәм фән министры Э.Н. Фәттахов

Бүген 11 сыйныф укучылары рус теленнән имтихан тапшыра

27 нче май көнне һәр сыйныфта әти-әниләр җыелышы булып узды. Һәр сыйныф җитәкчесе укучыларның билгеләре, практика графигы белән таныштырды.

26 нчы май көнне 9 нчы сыйныф укучылары җәмгыять, информатика, химия фәннәреннән сайлап алу имтиханнары бирделәр. Алдагы экзаменнарында аларга зур уңышлар теләп калабыз.

27-28 нче май көннәрендә Балтачта укучылар өчен туризм ярышлары булып узды. Безнең мәктәптән7, 8, 10 нчы сыйныф укучылары катнашты.Укучылар үзләренең көчләрен төрле ярышларда сыный алдылар.

25, 27 нче май көннәрендә мәктәбебездә әти-әниләр җыелышлары булып узды.

24 нче май көнне укучыларның чираттагы гомуми җыелышы булды. Җыелышта укучылар 4 нче чиректә эшләнгән эшләргә нәтиҗә ясадылар, җәйге каникул планы белән таныштылар. Җыелышка Балтач районы полиция хезмәткәрләре дә чакырылган иде. Алар укучыларга җәйге чорда үз-үзләрен тоту, куркынычсызлык кагыйдәләрен үтәргә кирәклеге турында аңлаттылар.

25 нче май көнне мәктәбебездә “Соңгы кыңгырау” бәйрәме булып узды.Бәйрәмне 11 нче сыйныф укучылары алып барды. Чыгарылыш сыйныф укучыларын котларга ЮХИДИ җитәкчесе Шәймөхәммәтов Рафил Равил улы, мәгариф идарәсе методисты Нәбиева Резеда Рифовна, авыл советы җитәкчесе Сәйдәш Шәмсиевич һәм Җәлил хәзрәт килгән иделәр. Бәйрәмдә ветеран укытучыларыбыз да катнашты.