8-11 нче февраль көннәрендә Мәскәү шәһәрендә армспорт буенча Рәсәй беренчелегенә ярышлары булып узды. Безнең мәктәптән 10 нчы сыйныф укучысы Миннемуллин Фәнис әлге ярышта катнашып җиңү яулап 1 нче дәрәҗә диплом белән бүләкләнеп, спорт мастеры дәрәҗәсенә ия булды. Фәнисне бу зур җиңүе белән котлыйбыз, алдагы ярышта уңышлар теләп калабыз.

11 нче февраль көнне Чипья мәктәбендә Г.А.Сидоров истәлегенә багышланган ФОРПОСТ отрядларының ярышлары булып узды Безнең укучыларыбыз да бу ярышта сынатмадылар. Команда 3 урында калып грамота белән бүләкләнде. Аерым ярыш төрләре буенча Фәхретдинов Рүзәл 2, 3 урында, Кадыров Алмаз 3 урында, Нуретдинов Нияз 2 урында калып грамота , медальләр белән бүләкләнделәр. Укучыларыбызны җиңүләре белән чын күңелдән котлыйбыз

9-11 нче февраль көннәрендә Казан шәһәрендә татар теленнән Республикакүләм олимпиадасы узды. Мәктәбебезнең иң тырыш кызы 10 нчы сыйныф укучысы Латыпова Алсу призер булып диплом белән бүләкләнде. Алсуны һәм аны әзерләгән укытучылар Гүзәл Галимулловнаны һәм Зөлфирә Зөфәровнаны зур җиңүләре белән котлыйбыз.

11 нче февраль көнне мәктәбебездә Бөтенрәсәй чаңгы юлы ярышлары узды.Барлык укучыларыбыз һәм укытучыларыбыз актив катнаштылар.

11 нче февраль көнне очрашу кичәсе булып үтте. Әлеге очрашуга Бөрбаш урта мәктәбен 45, 40, 35, 30, 25, 20, 15,10 ел элек тәмамлаган шәхесләр чакырылды. Очрашу бәйрәме искиткеч күңелле һәм матур үтте. Килгән кунакларның барысы олы рәхмәтләрен белдереп, укыткан укытучыларына, мәктәпкә бүләкләр тапшырдылар. Һәр класс үзләренчә искә алды мәктәп елларын. Классташлары белән, укытучылар белән булган кызыклы, истәлекле мизгелләрен хәтерләренә төшерделәр. Очрашудан һәркем якты , матур хатирәләр белән таралды

8 нче февраль көнне мәктәбебезгә спорт һәм яшьләр бүлеге җитәкчесе Заһидуллин Рөстәм Рафис улы очрашуга килде. Ул башлангыч сыйныф укучылары белән кызыклы әңгәмә үткәрде, аларга төрле сораулар бирде. Ә укучыларыбызга авылыбызда яшәүче спортчылар турында мәгълүмат тупларга кушты һәм тагын очрашуга килергә сүз бирде. Алдагы атнага без Рөстәм Рафис улын көтеп калабыз

5 нче сыйныфларда “Дус сыйныф серләре” конкурсына әзерлек бара. Укучылар күңел җылысын салып әтиләргә истәлекле бүләк ясыйлар.

8 февраль көнне 10-11 нче сыйныфларда тарих укытучысы Гөбәйдуллин Ранил Мөнир улы “Татарстан-2030: Республика киләчәгенә минем өлешем” темасына парламент дәресе үткәрде. Укучыларның кызыксындырган сорауларына җавап бирде. Дәрес эшлекле, файдалы үтте.

8 нче февраль көнне 9 нчы классларда әти-әниләр җыелышы булып узды. Сыйныф җитәкчесе әти-әниләргә укучыларның сынау имтиханнарының нәтиҗәсе һәм укучыларның имтиханга әзерлекләре турында мәгълүмат бирде.

Мәктәптә «Иң тату һәм дус сыйныф” исеме астында 9 нчы классның әти-әниләр комитеты оештырган “Сәламәт тәндә – сәламәт акыл” спорт уеннары булып узды. Бу чарада укучылар әти-әниләргә каршы волейбол, теннис, батминтон уеннары уйнадылар, көч сынаштылар, күңел ачтылар һәм киләчәктә мондый очрашуларны ешрак кабатларга кирәк дигән фикердә калдылар.