6 сыйныф укучылары әтиләрен, абыйларын мәктәптә кунакка чакырдылар. Әтиләре һәм абыйлары турында язган иншаларын укыдылар, матур җырлар һәм шигырьләр бүләк иттеләр. Баянда , синтезаторда  уйнап күрсәттеләр. Кунаклар укучыларның  Бөек Җиңүнең 70 еллыгы уңаеннан ясаган рәсемнәрен карадылар, педагогик ситуациядән чыгу юлларын эзләделәр.  Бәйрәм бик күңелле үтте.

Бүген, ягъни 24 нче февраль көнне, мәктәбебездә  традициягә кергән строй һәм җыр конкурсы булды. Әлеге бәйгегә һәр класс бик яхшы әзерләнгән: җырлар өйрәнгән, киемнәрен әзерләгән, эмблемаларын булдырган. Быел бәяләр түбәндәгечә булды: башлангыч класслар арасында1-3, 2-4 классларга  - 1 урын, урта звенода 1 урын - 8 класс, 2 урын - 7 класс, 3 урынны 5 һәм 6 класслар бүлеште; югары сыйныф укучылары арасында 1 урын 9 һәм 10 сыйныфларда, 2 урын - 11 классларга. Әфәрин, егетләр һәм кызлар!

23 февраль - Ватанны саклаучылар көне уңаеннан һәр класс стена газеталары чыгарды.

Туган оясыннан аерылган кош

Канатына мәңге ял тапмый,

Туган телен яратмаган кеше

Башкаларның телен яратмый.

Халкым теле миңа – хаклык теле.

Аннан башка минең телем юк.

Илен сөймәс кенә телен сөймәс,

Иле юкның гына теле юк.

21 нче февраль - Халыкара Туган тел көне. Бу көнне билгеләп үтү инициативасы белән Бангладеш Республикасы чыга. Анда 1957 нче елның 21нче  февралендә, туган телдә белем алу хокукын даулап, биш студент һәлак була. Бу көн 2000 нче елдан башлап ЮНЕСКО карары нигезендә билгеләп үтелә башлады.

     Туган телебезнең нәфислеген саклау өчен , мөгаен, иң әүвәл аның гаять үзенчәлекле, бәллүр шикелле уалырга гына торуын чынлап торып аңларга, маңгай күзе белән генә түгел, күңел күзе белән дә күрә белергә кирәктер. Шунсыз аның башка телләрдән аермасын да барча байлыгын да, яңгырашын да аңлап булмый. Әйе, теле барның – юлы бар. Туган телен кадерләгән халык кадерле булыр! Газиз туган телебез– татар телен кадерлик, яклыйк, саклыйк, чарлыйк, сөеп үстерик. Туган теле барның – милли юлы бар, милли йөзе бар, шәхес буларак үзе бар, кеше буларак абруе, кадер-бәясе, хөрмәте бар.

     Шушы уңайдан 10 нчы сыйныф укучылар Масалимова Назлыгөл һәм Мортазина Гөлүсә классларда информацион минутлар үткәрделәр. Укучыларга туган тел турында сөйләделәр, үзләренең шигырьләрен укыдылар.

   23 февраль… Бу  көнне инде 97 ел бәйрәм итәбез. 97 ел кешелек дөньясынын көчле яртысы көч, түземлелек, чыдамлылык, патриотлылык, шәфкатьлелек бәйрәмен билгеләп үтә. Немец басып алучыларын Нарва һэм Псков астындагы җиңү хөрмәтенә 1918 елның 23 февралендә Кызыл Армия көнен бәйрәм итү турында декрет игълан ителә. Соңрак ул Совет Армиясе һәм Хәрби диңгез флоты көне итеп үзгәртелә, ә соңгы елларда Ватанны саклаучылар көне буларак билгеләп үтелә. Ватанны саклау ул – тыныч халыкның гомерен, Туган илнең намусын, горурлыгын, ныклыгын, бердәмлеген саклау.

      Сезне 23 февраль - Ватанны саклаучылар көне белән чын күңелдән тәбрик итәбез! Сезгә ныклы сәламәтлек, күңел көрлеге, эшегездә,  укуыгызда зур уңышлар, шатлык - куанычлар, озын гомер телибез! 

Сез булганга имин булып ата таңнар,

Тыныч-матур тормыш белән үтә айлар.

Бәйрәмегез котлы булсын, ир-егетләр.

Мәңге тыныч, имин торсын безнең җирләр.

19 нчы февраль көнне 10 нчы сыйныф укучылары Масалимова Назлыгөл һәм Мортазина Гөлүсә Арча укучылар сарае каршында эшләп килүче "Порыв" түгәрәге җитәкчесе Бәйрәмова Э.Р. җитәкчелегендә Әлмәт шәһәренә бардылар. Кызларбыз студентларның  С.Сөләйманова исемендәге "Тормыш, исәнме!" - "Здравствуй, жизнь!"  VII Республика фестиваленең бүләкләү тантанасында катнаштылар. Масалимова Назлыгөл II дәрәҗә Диплом, Мортазина Гөлүсә III дәрәҗә Диплом белән бүләкләнгән. Шулай ук Назлыгөлнең  тагын бер уңышы бар. Яр Чаллы шәһәренең 15 нче Балалар иҗат йорты үткәргән "Гасырлар кайтавазы" ачык регионкүләм эзләнүле эшләр бәйгесенең "Ил язмышы - гаиләм язмышы" номинациясендә ул III дәрәҗә Диплом белән бүләкләнде. Кызлар, котлыйбыз!

18 нче февраль көнне Бөек Җиңүнең 70 еллыгы, хәрби-патриотик айлык, бердәмлек һәм дуслык хисләре тәрбияләү максатыннан мәктәбебезнең 9,10,11 класс егетләре арасында "Ягез әле, егетләр" бәйгесе үткәрелде. Әлеге бәйгене ТИН укытучысы Ахунов А. В. һәм физкультура укытучысы Хасанов Х.Х. оештырды. Бәйге 7 этаптан торды: чаңгы буенча эстафта (җиңүче - 10 класс егетләре, иң җитезе -  Яруллин Илназ), турникта күтәрелү (иң яхшы нәтиҗә 9 класста, Һадиев Рәмзил 40 тапкыр күтәрелде), йөгерү эстафетасы (9 класс егетләре беренче булды), скакалкада сикерү (10 класс егетләренә тиңнәр булмады), гер күтәрү (16 кглы бер кулда 11 класс укучысы Шарафиев Фирдүс һәм 10 класс укучысы Яруллин Илназ 51әр тапкыр күтәрделәр), сорауларга җавап (10 класслар төгәл һәм тиз җавап бирделәр), аркан тарту (иң көчлеләре -  10 класс егетләре). Барлык төр ярышлар буенча I урында 10 класс, II урында 11 класс,  III урында 9 класс укучылары  командасы җиңү яулады. Иң яхшы күрсәткечкә ирешкән укучылар һәм командалар Грамота һәм медальләр белән бүләкләнделәр.

18 нче февраль көнне татар теле һәм әдәбияты укытучысы Зарипова Л.Р. Бөек Җиңүнең 70 еллыгы, патриотик тәрбия бирү һәм Муса Җәлилнең туган көне уңаеннан әдәби-музыкаль кичә үткәрде. 8 нче сыйныф укучылары герой-шагыйрьнең шигырьләрен укыдылар, 5 һәм 6 нчы сыйныф укучылары, 2 командага бүленеп, М.Җәлилнең биографиясе буенча төрле биремнәр башкардылар, шигырьләрен сәхнәләштерделәр.