Мәктәптә "Иң яхшы су ресурслары макеты" конкурсына әзерлек эшләре бара.

21 март көнне Казан шәһәренең Киров районында урнашкан “ Аерым фәннәрне тирәнтен үзләштерүче №81" мәктәбендә төбәкара XIV Каюм Насыйри исемендә укучыларның фәнни практик укулары үткәрелеп, география секциясендә 8 класс укучысы Авзалова Нәфисә уңышлы чыгыш ясап, III дәрәҗә Диплом белән бүләкләнде. Фәнни җитәкчесе география укытучысы Гильманова Илүзә Рәхим кызы. Афәрин, Нәфисә!

21-24 март көннәрендә 9 класс укучылары өчен имтиханнарга әзерләү максатыннан укулар оештырыла. Бүген укуны рус теленнән Нагимова З.Ө. үткәреде.

19 март көнне Әлмәт шәһәрендә узган авыл хуҗалыгының РТ һәм РФ атказанган хезмәткәре Шайдуллин Зөфәр Газиз улы истәлегенә багышланган XI Бөтенроссия көрәш турнирында 6 класс укучысы Харисов Нәркиз үз үлчәү авырлыгында 4 урын алды.Котлыйбыз!

21 март көнне кышны озату, язны каршылау бәйрәме - Нәүрүз булды. Кыш бабайны озатып, яз кызы - Нәүрүзбикәне каршы алганнан соң, уеннар башланып китте. Уеннарда актив катнашкан укучыларга Нәүрүзбикә бүләкләрне мулдан өләште. Бәйрәм җыр-биюләр белән үрелеп барды.

Бүген барлык классларда да өченче чирек нәтиҗәләре буенча класс җыелышлары үткәрелде, язгы каникул чорына куркынычсызлык кагыйдәләрен үтәү буенча инструктаж үткәрелеп, имзалар алынды.

18 март көнне Яңа Әлем мәктәбендә Республикакүләм “Шәп әйдаман” бәйгесенең район туры үткәрелде. 7 нче сыйныф укучысы Солтанова Альбина уңышлы чыгыш ясап, "Иң җитди әйдәман" номинациясендә җиңүче булды. Киләчәктә зур уңышларга ирешүен телибез.

18 нче март көнне тәрбия эшләре буенча директор урынбасары Мусина Д.Т. Яңа Әлем төп гомуми белем бирү мәктәбендә “2015 – 2025 елларга кабул ителгән тәрбия үсеше стратегиясен тормышка ашыру кысаларында укучыларга әдәп – әхлак тәрбиясе бирү” темасы буенча семинар - практикумда катнашты. Семинарда “Яхшы сүз – җан азыгы” дигән темага әхлак дәресе, “Матурлык илендә” дигән темага дәрестән тыш чара, “Шәҗәрәләр – күңел көзгесе” темасына мастер - класслар каралды. Соңыннан алда торган бурычлар буенча киңәшмә булды.

17 март көнне гомуми ата-аналар җыелышы үткәрелде. Җыелышта 3 чирек нәтиҗәләре, ТДИга әзерлек, "Йолдызлык-2016"фестивале нәтиҗәләре турында аңлатылды, төрле сорауларга җавап бирелде һәм алда торган бурычлар билгеләнде.

16 март көнне Иске Кормаш төп гомуми белем бирү мәктәбендә тарих һәм җәмгыять белеме укытучыларының район семинары үткәрелде. Семинарда 5 класста җәмгыять белеменнән ачык дәрес, Бөек Җиңүнең 71 еллыгына карата интеллектуаль уен (Г.Ф.Газизов), "Йолдызлык-2016" фестивале җиңүчеләре чыгышы (Ә.Ә.Марданова) күрсәтелде. Соңыннан мәгълүмати-методик үзәк планы нигезендә эшлекле сөйләшү булды. Семинарда тарих укытучысы Мусина Д.Т. катнашты.