Бүген – 20 март көнне, гимназиябездә "Разговоры о важном – Мөһим темага сөйләшү" сыйныф дәресләре "Кырымның Россия белән берләшү көне" темасына багышланды. Бүген гимназиябез укучылары дәресләрдә легендар тарихы һәм данлы батырлыклары булган Кырым турында киңкырлы мәгълүмат алдылар. Кырым тарихы Россия тарихы белән тыгыз бәйләнгән. 2014 елның 18 мартында Россия составына ике яңа РФ субъекты – Кырым Республикасы һәм федераль әһәмияттәге Севастополь шәһәре керү турында килешү имзаланды.
Әлеге фотода 9Б сыйныфы укучылары класс җитәкчесе Земфия Гыйльфан кызы Вәлиева белән дәрес вакытында.

Гимназиябездә эшләп киткән укытучылар белән элемтәдә тору һәм аралашып яшәү белем бирү барышында ике як өчен дә отышлы.
Хәзерге вакытта Мисырда яшәүче, гимназиябездә инглиз теле укыткан Рамил Марат улы Гарипов белән дә бүген кабаттан теле-күпер аша күрештек. География укытучысы Рөстәм Уел улы Фәйзуллин 10 сыйныфлар белән Африка һәм аның икътисадын өйрәнгәндә Рамил Марат улына мөрәҗәгать итте. Әлеге материкта - Мисырда яшәүче буларак, аның онлайн-дәресе укучылар өчен аеруча да мавыктыргыч һәм эчтәлекле булды.

Гимназиябездә узган ата-аналар комитеты җыелышында бүген әти-әниләрне дә, укытучыларны да борчыган көнүзәк мәсьәләләр, укыту-тәрбия барышындагы яңалыклар, рәсәйкүләм мәгариф системасына кертелгән агымдагы үзгәрешләр уртага салып сөйләшенде. Әти-әниләрнең дә, укытучыларның да фикерләре тыңланды.
Гимназиябез директоры Венера Хәмәтнәсыйх кызы Хәева-Хәмитҗанова катнашында узган Әтиләр советында һәм ата-аналар комитеты җыелышларында һәр фикер дә шулай уртага салып сөйләшенә, эшлекле карарлар кабул ителә. Гимназиябезнең гаилә советы дияргә дә була аларны.
Бүгенге сөйләшүдә дә гаиләдәге һәм гимназиядәге, интернаттагы эчке тәртип кагыйдәләре турында да ачык сөйләшү барды. Җәмәгать урыннарында, интернетта, социаль челтәрләрдә үзеңне тоту кагыйдәләре, хокукый җавапчылык та аңлатылды.
Һәм, әлбәттә инде, һәр кешене берләштерә торган милли бәйрәмнәребезне үткәрү турында да фикерләштек. Яңа елны каршы алу - "Нәүрүз" бәйрәмен үткәрү буенча да фикерләштек, 25 март көнне гимназиякүләмендә үтәчәк ул.

Гимназиябезнең тәрбия эшләре буенча директор урынбасары Ленар Зөфәк улы Шәвәлиев, тарих һәм җәмгыять белеме укытучысы Марат Илсур улы Гыйльметдинов, башлангыч сыйныфлар укытучылары Сөмәя Тәлгать кызы Муллаярова, Светлана Риф кызы Шәйхуллина "Адымнар-Әлмәт" күптелле гимназиясендә узучы “Инновацион педагогик технологияләр” семинарында катнашалар.

Гимназиябез интернатында "Табигать язмышы - безнең язмыш" исемле экологик КВН үткәрелде. Ярыш бик кызык, мавыктыргыч барды. Командалар табышмакларга җаваплар эзләде,  плакатлар ясады, пантомималар күрсәтте, төрле ситуацияләрнең чишелешен эзләде. Тәрбияче - Алия Вил кызы Шәрифуллина.

1А сыйныф укучылары, озынайтылган көн төркеме җитәкчесе Гафурова Алсу Илгиз кызы белән,  гимназиябезнең "Адымнар" комплексы  китапханәсенә экскурсиягә керделәр. Китап укуга кызыксыну уятуда һәм сакчыл караш тәрбияләүдә  педагог-китапханәче Исламова Эльвира Мәүлетдин кызының "Китаплар илендә" видеопрезентациясе бик эчтәлекле булды.
Укучылар  балалар өчен чыга торган газета-журналлар белән таныштылар,  үзләренә укыр өчен әдәби китаплар алдылар.

Гимназиябезнең 11 сыйныф укучылары ГТО нормаларын тапшыра.

Бүген Актаныш муниципаль районында чыгарылыш укучыларының әти-әниләре БДИ тапшырды. Ел саен үткәрелә торган «Бергә тапшырабыз " Бөтенроссия акциясе кысаларында унберенче сыйныф укучысы ролен үз өсләренә алып карадылар. Бердәм БДИда 18 ата-ана катнашты. Ата — аналар БДИ процедурасы белән эчтән - имтихан пунктына керүдән алып нәтиҗәләр алуга кадәр таныштылар. Быел катнашучылар рус теле буенча биремнәр үтәделәр.

"Мәгариф" милли проектының "Һәр бала уңышы" федераль проекты кысаларында "Кванториум" мобиль технопаркы гимназиябездә 13 марттан чираттагы укуларны башлап җибәрде.
1-2, 5-8 сыйныф укучылары IT тармагында эшләүче белгечләр хезмәте белән танышалар. Технопарк укытучылары быел гимназиябезгә икенче тапкыр килделәр, әлеге проект сәләтле балаларга дөрес профориентация бирүгә юнәлдерелгән.

Ир-ат ашарга пешергәндә фәрештәләр канат кагып торыр, диләр. Чынлап та, гимназиябез интернатында егетләр пешергән аш-су ризыклары аеруча тәмле була. Атна кич тәрбияче апалары Ләйсән Рафис кызы Латыйпова белән татар халкының милли ризыгы – тәбикмәк пешерде алар! Телеңне йотмалы икәне фотодан ук күренеп тора.