Укучыларыбыз өлкәннәргә ярдәм итүләрен дәвам итәләр. 

18 нче апрель көнне  - мәктәптә рус теленнән 4-5 нче, 20 нче апрельдә 4 нчедә - рус теленнән, 5 нче классларда математикадан  Бөтенрәсәй тикшерү эше үткәрелде. Укучылар эшне уңышлы башкардылар. Укытучылары: Ч.Р.Шәвәлиева, Р.С.Галимҗанова, Э.Х.Садыйкова. Алдагы язма эшләрендә дә уңышлар телибез.

19 нчы апрельдә 2 нче санлы Актаныш урта мәктәбендә уздырылган Г.Тукай исемендәге шигырь укучылар конкурсында катнашып, А.Манихова, И.Яхин, С.Имамов уңышлы чыгыш ясадылар.

  20 нче апрельдә Күҗәкә төп гомуми белем бирү мәктәбендә уздырылган рус теле һәм әдәбияты укытучыларының семинарында безнең мәктәптән Р.С.Галимҗанова катнашты. Алган тәэсирләрен педколлективны да таныштырды.

   Республикакүләм "Язгы мәрхәмәтлелек атнасы" ациясенә кушылып, укучыларыбыз тыл ветераннарына, ялгыз яшәүче өлкәннәргә ярдәм иттеләр. 

    Арча районы Яңа Кырлай урта мәктәбендә уздырылган Габдулла Тукайның мирасын өйрәнүгә багышланган  "Без Тукайлы халык" VI Республикакүләм Габдулла Тукай укуларының "Табигать - тиңсез хәзинә" секциясендә катнашып, С.В.Имамов III нче Дәрәҗәдәге Дипломга һәм кыйммәтле бүләккә лаек булды. Җитәкче укытучысы: Ә.Р.Исрафилова. Аларны җиңүләре белән котлыйбыз һәм киләчәктә дә уңышлар телибез.

  15 нче апрель көнне 2 нче санлы Актаныш урта мәктәбендә 9 нчы класс укучылары математикадан имтихан биреп карадылар. Анда безнең мәктәп укучылары да катнашты.

   Хөрмәтле хезмәттәшебез, Дилүсә Мәхиян кызы! 

   Сезне 55 яшьлек юбилеегыз белән чын күңелдән котлыйбыз! Табигать язгы ямьгә төренгән, сыерчыклар сайраган, челтерәп гөрләвекләр аккан вакытта тугансыз. Гомерегезне балаларга белем һәм тәрбия бирүгә багышлаган мөгаллимә генә түгел, 2 балагызга газиз ана, тормыш иптәшегезгә киңәшче, оныкларыгызның яраткан дәү әниләре  дә Сез. 

  Алдагы гомер юлыгыз да яз кояшыдай матур, назлы, туар таңнарыгыз шатлыклы булсын.  Йөзегездән елмаю, күңелегездән наз балкып торсын иде.

                                                                                      Иң изге теләкләр белән мәктәп коллективы.

    Мәктәбебезнең 7 нче класс укучылары ата-аналар комитеты "Дус класс серләре" дигән республикакүләм бәйгенең район этабында катнаштылар. Ата-аналарга, класс җитәкчесе Ә.Р.Исрафиловага, аларны әзерләүдә катнашкан укытучыларга рәхмәтебезне белдерәбез! 

   12 апрель  көнне  9 сыйныф укучылары  Актанышның  технологик техникумында   үткәрелгән "Ачык ишекләр көне" нә бардылар. Укучылар монда класс-кабинетларда булдылар, электрон тренажерлар  карадылар; механиклар,механизаторлар, технологлар әзерли торган бүлекләр белән таныштылар.  Бу көн укучыларга профессия сайлау өчен бик яхшы этәргеч булды. Аннан барысы да РДК га  район администрациясе башлыгы белән очраштылар.