Һәр атнаның дүшәмбесендә укучылар өчен махсус сыйныф сәгатьләре уздырыла. “Мөһим сөйләшү” дигән сыйныф сәгатьләрендә сүз җәмгыять һәм шул җәмгыятьне тәшкил итүче кешеләр тормышы турында бара.

Бу атнада укучылар “Интернет куркынычсызлык” дигән темага фикер алыштылар.

Укучылар интернетта нинди куркынычсызлык кагыйдәләрен үтәргә, шәхси сайт яки битеңне ничек сакларга кирәклеге турында сөйләштеләр.

Гимназиябездә традицияләр бик күп. Менә инде күп еллар мәктәп радиосы эшләп килә. Һәр атна дүшәмбе төрле сыйныф укучылары безне үткән атна яңалыклары һәм киләсе атнада булачак чаралар, истәлекле көннәр һәм сыйныфлар рейтингы белән таныштыралар.

Бу атнада гимназия радиосында 9б сыйныфы укучылары чыгыш ясадылар.

Театр – кешеләрне тормыш турында уйлану, үз-үзләренә эчтән карау өчен үз тирәсенә җыя торган тылсымлы учакка тиң ул.

Гимназиябез укучылары К. Тинчурин, Г. Камал исемендәге театрларда еш булалар, матур спектакльләр карыйлар.

Ә кайбер сыйныфлар, укытучы, әти-әниләр, укучылар, бергәләшеп спектакльләргә йөрергә яраталар.

Бүген 8б сыйныфы укучылары һәм әти-әниләре, сыйныф җитәкчесе белән берлектә Г. Камал театрында К. Тинчуринның “Сүнгән йолдызлар” спектаклен тамаша кылдылар.

Гимназиябез психологы укучылар белән эшләгәндә төрле методикалар куллана.

Бүген дә ул 4 нче в сыйныфында  “Кактус” проектив методикасын үткәрде.

Бүген  4 нче сыйныфларда “Күңелле стартлар” уеннары узды.  Алар бик теләп үзара көч сынаштылар. Нәни катнашучылар  финишка беренче булып килергә тырыштылар.

“Күңелле старт” уеннары дәвам итә. Бүген 3 нче сыйныф укучылары үзара көч сынаштылар. Командаларга йөгерү, сикерү, туплар белән эстафета, кыршау кебек кызыклы конкурслар тәкъдим ителде.

Һәр кешенең иң зур байлыгы-сәламәтлек. Күңелле стартлар – балаларны хәрәкәт активлыгына җәлеп итүнең иң кызыклы варианты. Шул уңайдан, спорт залында 2 нче сыйныфлар өчен «Күңелле стартлар» спорт уены оештырды. Уен программасы шактый бай эчтәлекле булды. Спорт бәйрәменең төп өлеше - эстафеталар. Командаларга йөгерү, сикерү, туплар белән эстафета, кыршау кебек кызыклы конкурслар тәкъдим ителде. "Күңелле стартлар" ның барлык этаплары киеренке көрәштә узды.

Бүген «Ел укытучысы – 2023» бөтенроссия һөнәри осталык бәйсенең шәһәр этабы тәмамланды. “Туган тел укытучысы” номинациясендә шәһәребезнең төрле районнарыннан 8 укытучы катнашты. Вахитов районы данын, гимназиябезнең туган (татар) теле һәм әдәбияты укытучысы, Җәләева Гөлүзә Азат кызы яклады. Ул, бәйгенең барлык этапларында да уңышлы чыгыш ясап, катнашучы дипломына лаек булды. 

Гөлүзә Азатовнага алга таба да иҗади, фәнни уңышлар телибез!

Укучының физик сәламәтлеге белән беррәттән психологик сәламәтлеге дә бик мөһим. Гимназиябез психологы укучылар белән һәрдаим бәйләнештә.

Бүген 4 нче в сыйныфында гимназия психологы “Кактус” проектив методикасын үткәрде.

Бу атнада гимназиябездә 1-5 нче сыйныфлар арасында «Күңелле стартлар» дигән ярышлар башланып китте.
Белгәнегезчә, «Күңелле стартлар» - бу спорт уены.Спорт һәркемгә дә бик кирәк,  чөнки спорт сәламәтлекне ныгыта. Юкка гына халкыбыз «Саулык- зур байлык” димәгән.
«Күңелле стартлар» атнасын 1нче сыйныфлар башлап җибәрде. Укучылар төрле эстафеталарда, скакалкада сикерү, туп  белән  йөгерү һәм  башка ярышларда үз көчләрен сынадылар.