Хәзерге балалар компьютер уеннары белән бик күп мавыга. Аларның кирәгеннән артык компьютер артында утырулары өлкәннәрне хафага сала. Укучыларны компьютерга бәйлелектән кисәтү максаты белән, гимназиядә “Компьютерга бәйлелек проблемалары” дип аталган темага сыйныф сәгате үтте. Укучылар интернет челтәренең файдалы һәм тискәре яклары турында фикер алыштылар. Шулай ук укучыларга компьютер, интернет һәм аннан алган мәгълүмәт белән дөрес куллану буенча киңәшләр бирелде.

9 нчы Б сыйныфында “Киләчәккә караш яки нинди һөнәр сайларга?” дип аталган түгәрәк өстәл узды. Түгәрәк өстәл укучыларда тормышка җаваплы караш формалаштыру, яңа төр һөнәрләр белән таныштыру, заманча һөнәр белгечләре ия булырга тиешле сыйфатлар белән таныштыру, һөнәр сайлауның уңай мотивациясен булдыруга юнәлдерелгән иде. Түгәрәк өстәл нәтиҗәле һәм файдалы үтте.

Бүген 2 нче В сыйныфында “Психологка ышаныч сәламләүдән башлана” дип аталган сыйныфтан тыш чара узды. Укучылар алдан әзерләнгән тамгалар ярдәмендә исәнләшү чарасын сайладылар һәм йә биеп, йә кул биреп яки матур сүзләр әйтеп исәнләшеп күрсәттеләр. Чара бик кызыклы үтте, барлык укучылар да чарада актив катнаштылар.

Милли каһарманыбыз Муса Җәлилнең туган көненә багышланган чаралар дәвам итә. 4 нче Б сыйныфында “Йолдызлы сәгать” уены үтте. Укучылар герой-шагыйрьнең тормыш юлына бәйле кызыклы сорауларга җавап биреп, яхшы нәтиҗәләр күрсәттеләр.

2 нче А сыйныфында Муса Җәлил иҗатына багышланган викторина үтте. Укучылар шагыйрьнең иҗат юлына бәйле кызыклы биремнәр үтәделәр.

Психологик сәламәтлек атналыгы кысаларында урта сыйныфларда “сәламәтлек көне” узды. Укучылар матур көйләр яңгыратып, күңелле һәм дәртле итеп иртәнге зарядка һәм көн дәвамында физкультминуткалар оештырдылар.

15 февральдә, Россиядә, Ватаныбыздан читтә хезмәт бурычын үтәгән ватандашларыбызны искә алу көне билгеләп үтелә. Бу истәлекле датаның 15 февральгә туры килүе юкка гына түгел, чөнки нәкъ шушы көнне 1989 елда Әфганстаннан совет гаскәрләрен чыгару тәмамлана. Шул уңайдан гимназиядә радиотапшыру узды. Тапшыру “кайнар нокталарда” батырлык күрсәтеп һәлак булган, армия сафларында хезмәт иткәндә яшь гомерләре вакытсыз өзелгән Татарстан улларының якты истәлегенә багышланган иде.

Бүген гимназиядә Советлар Союзы Герое, Ленин премиясе лауреаты, патриотик шагыйрь Муса Җәлилнең туган көненә багышланган радиотапшыру узды. Муса Җәлил – татар халкының горурлыгы, йөз аклыгы һәм намусы. Радиодан, көн дәвамында, Муса Җәлилнең шигырьләре,  җырлары яңгырады.

Бүгенге көндә аралашуның төрле формалары, алымнары бар. Психологик сәламәтлек атналыгы кысаларында, башлангыч сыйныфларда “Аралашу көне” узды. Гимназия психологы укучыларны коллективта аралашу кагыйдәләре белән таныштырды һәм алар бергәләп кул эшләнмәләре ясадылар.

15 нче февраль көнне татар халкы сөекле улы, герой-шагыйрь Муса Җәлилнең туган көнен билгеләп үтә. Шул уңайдан гимназиядә кызыклы чаралар уза. 4 нче Б сыйныфында Муса Җәлилнең туган көненә багышланган шигырь бәйгесе үтте. Укучылар бик теләп шагыйрьнең балалар өчен язылган шигырьләрен сөйләделәр.