Бүген гимназиядә, укучыларга гражданнар оборонасы, янгын куркынычсызлыгы һәм су объектларында кешеләр куркынычсызлыгы кагыйдәләрен җиткерү максатында, “Балаларны гадәттән тыш хәлләрдән яклау көне” үтте. Сыйныфларда “Гадәттән тыш хәлләрдә кеше иминлеге һәм  аны яклау”, “Юлларда, су объектларында  куркынычсызлык” дигән темаларга ачык дәресләр үтте.

 Бүген 9 нчы сыйныфларда “буктрейлерлар” бәйгесе үтте. Укучылар татар әдәбияты әсәрләренә китапнамәләр әзерләделәр.

Бүген гимназиядә террорга каршы уку-укыту тренировкасы узды. Тренировкалар кабинет ишекләрен бикләү  һәм баррикадлау, укучыларны үз-үзләрен тоту кагыйдәләренә өйрәтүдән гыйбарәт иде.

Бөек Җиңү көнен бәйрәм итү алдыннан, 27 нче апрельдән башлап, Казан шәһәрендә “Георгий лентасы” акциясе старт алды. Әлеге акциягә кушылып, 2 нче В сыйныфында дәрес үтте. Укучылар “Георгий лентасы” тарихы белән таныштылар, аны ничек дөрес итеп тагырга икәнен белделәр. Дәрес ахырында бергәләп кул эшләре башкардылар. Алар кәгазьләрдән тынычлык күгәрчене һәм  “Георгй лентасы” ясадылар.

Бүген гимназиядә бөек шагыйребез Г.Тукайның туган көненә багышланган радиоэфир оештырылды. Биредә көн дәвамында  укучылар Г.Тукайның иҗаты турында сөйләделәр, җырлар-шигырьләр башкардылар.

Гимназиядә Г.Тукайның туган көненә багышланган күптөрле чаралар узды. Шуларның берсе - шагыйрьнең әсәрләре буенча ясалган рәсемнәр бәйгесе. Иң яхшы дип табылган рәсемнәр 26 нчы апрельдә, шагыйрьнең туган көнендә, Г.Тукай исемен йөртүче метро станциясен бизәде. Шул уңайдан “Метроэлектротранс” предприятиесе гимназия укучылары һәм укытучыларына рәхмәт сүзләре җиткерде.

25 нче апрель РФ Дәүләт флагын күтәрүнең бердәм көне дип игълан ителде. Шул уңайдан гимназиядә РФ һәм ТР Дәүләт флаглары күтәрелде, укучылар ил һәм республика гимннарын башкардылар.

Һәр елны 26 апрель көнне без татар шигърияте күгендә балкып янган иң зур йолдыз - бөек шагыйребез Габдулла Тукайның туган көнен билгеләп үтәбез. Габдулла Тукай – ул милләтебезнең горурлыгы, аның шигырьләре үлемсез. Бүген бездә сөекле шагыйребезнең туган көненә багышланган бәйрәм кичәсе үтте. Укучылар Габдулла Тукайның әсәрләрен сәхнәләштерделәр, шагыйрьнең тормышын, иҗатын данлап шигырьләр сөйләделәр. Бәйрәм милләтебезнең гимнына әйләнгән “Туган тел” җыры белән тәмамланды.

Идел буе Болгарында Ислам динен кабул итүгә 1100 ел тулу уңаеннан, бүген гимназиядә “Ислам нуры” дип аталган чара үтте. Чара барышында укучылар татар халкының Ислам динен кабул иткән мизгелдән безнең көннәргә кадәр тарих юлы турында сөйләделәр һәм кайбер мизгелләрне сәхнәләштереп күрсәттеләр.

Гимназиябез укучылары бүген Казан шәһәренең “Тел. Мәдәният. XXI гасыр” VII фәнни-тикшеренү конференциясендә катнаштылар. Чарада уңышлы чыгыш ясап, 10 нчы сыйныф укучысы Сөләйманова София I нче дәрәҗә диплом, 8 нче Б сыйныфы укучысы Рахматова Мәдинә II нче дәрәҗә диплом белән бүләкләнделәр. Укучы кызларыбызны котлыйбыз һәм киләчәктә дә уңышлар теләп калабыз.