Бүген безнең гимназиядә күңелле мөхит хөкем сөрә. Укучыларыбыз ел буе укуда, төрле бәйгеләрдә, чараларда, спорт ярышларында, гомумән, мәктәп тормышында актив катнаштылар. Бүген әлеге тырыш укучыларыбыз кулларына мактау кәгазьләре алдылар. Укучыларыбыз шулай ук район, шәһәр күләмендә узган чараларда да катнаштылар һәм призлы урыннарга ия булдылар. Без укучыларыбыз белән горурланабыз! Киләсе уку елында да уңышлар теләп калабыз!

Чәчәк тотып әле бүген генә

Килгән кебек сиңа, мәктәбем.

Инде менә сезгә, укытучылар,

Сау булыгыз, диеп әйтәмен.

Алда безне күпме юллар көтә

Бәхетләргә, диләр, юл урау.

Шул турыда искә төшергәндәй

Яңгырады соңгы кыңгырау.

Бүген гимназиядә “Соңгы кыңгырау” бәйрәме үтте. Бәйрәмдә күп матур җырлар, шигырьләр, котлау сүзләре яңгырады. Чыгарылыш сыйныф укучыларын котларга зур кунак Татарстан Республикасы мәгариф һәм фән министры урынбасары Закирова Минзәлия Заһриевна килгән иде. Ул укучыларга үзенең җылы котлау сүзләрен җиткерде.

Соңгы кыңгырау, урта мәктәпне тәмамлап, зур тормышка, олы юлга чакырган беренче кыңгырау ул. Хөрмәтле чыгарылыш сыйныф укучылары, укытучылар һәм әти-әниләр! Сезне бүгенге бәйрәм белән чын күңелдән тәбрик итәбез. Кадерле укучылар, киләчәктә сезне мәктәптә сыналган ныклы дуслык озата барсын, остазларыгызның файдалы һәм акыллы киңәшләре ярдәм итсен, барлык уй-хыялларыгыз һәм омтылышларыгыз чынга ашсын!  Ак юл сезгә, чыгарылыш сыйныф укучылары! Хәерле сәгатьтә!

“Язгы игелек атнасы” акциясе гимназиядә үткәрелгән “Хәйрия ярминкәсе” белән төгәлләнде. Әлеге игелекле чарада барлык укытучылар һәм укучылар да актив катнаштылар. Ярминкәдә төрле кул эшләнмәләре, сувенирлар алырга мөмкин иде.

Балалар “игелек”, “игелекле эшләр” төшенчәсе белән кече яшьтән үк танышып үсәргә тиеш. “Игелек атналыгы” әлеге максатка ирешүдә төп чараларның берсе булып тора.

16 нчы майдан 21 нче майга кадәр гимназиядә “Язгы игелек атнасы” акциясе узды. Атналык кысаларында укучылар өчен төрле чаралар оештырылды. Бер атна дәвамында, һәр көн укучылар игелек турында презентацияләр карадылар, “Игелек дәресе”, “Әдәплелек көне”, “Игелекле эшләр” акцияләрендә актив катнаштылар, яхшылык һәм начарлык темасына карата рәсемнәр ясадылар.

Шушы көннәрдә шәһәребезнең Вахитов районы беренчелегенә футбол уеннары башланды. Әлеге уеннарда гимназиябезнең футбол командасы зур уңышка иреште. Уеннарның нәтиҗәсе түбәндәгечә: 98 нче номерлы мәктәп - 1 нче гимназия (0:3);
27 нче гимназия - 1 нче гимназия (0:2). Финал уенында безнең команда 0:2 исәбе белән 12 нче мәктәп командасын җиңүгә иреште һәм Вахитов районында 1 нче урынны яулап, шәһәр этабына чыкты.

Бүген гимназиядә "Язгы игелек атналыгы" башланып китте. Атналык кысаларында 1 нче сыйныф укучылары арасында "Игелеклелек көндәлеге"  проектына нәтиҗә ясалды. Барлык таләпләргә туры килгән көндәлек дип 1 нче А сыйныфы укучысы Сәгъдиева Чулпанның көндәлеге табылды.

8-10 нчы сыйныф укучылары шәһәребезнең Габдулла Тукай исемендәге татар дәүләт филармониясендә "Пушкин картасы" буенча "Хәрәкәттә бәрәкәт" концертын карап кайттылар.

Халкыбызның тарихи үткәненә, мәдәниятенә карата кызыксыну һәм хөрмәт хисе тәрбияләү максатыннан,  5 “Б”  сыйныфы укучылары К.Насыйриның музеенда булдылар. Гөлфия Нәбиулловна үзенең акыллы сүзләре, матур сөйләме белән очрашуны ачып җибәрде. Укучылар аны тын да алмыйча тыңлап утырдылар. Бу экскурсия укучыларга, ата-бабаларыбызның гомерләрен аямыйча көрәшеп, безгә бүләк итеп калдырган тыныч тормышның кадерен белергә, халкыбызның тарихын өйрәнеп, киләчәген кадерләп саклау өчен, тырышып укырга этәргеч булып тора.

Республикабызда елның иң зур вакыйгаларының берсе — Идел буе Болгар дәүләтендә Ислам динен кабул итүгә 1 100 ел тулуга багышланган чаралар уза. Шул уңайдан гимназия китапханәсендә китап күргәзмәсе оештырылды. 

Бүген, Бөек Җиңү көнендә, гимназиябез укучылары "Үлемсез полк" акциясендә катнаштылар. Алар, Бөек Ватан сугышында катнашкан туганнарының фотосурәтләрен күтәреп,  шәһәребезнең үзәк урамнары буйлап үттеләр. Беркем дә, бернәрсә дә онытылмый!