Бик тиздән илебез Бөек Җиңү бәйрәмен каршы алачак. Шул уңайдан гимназиядә чаралар үткәрелә башлады. Бүген урта сыйныфларда “Совет халкының Бөек Ватан сугышында җиңүе” дип аталган темага дәрес үтте. Дәрес барышында укучылар Бөек Ватан сугышының төп этаплары белән таныштылар. Шулай ук 1945 нче елның 24 июнендә узган Җиңү парады турында мәгълүмат алдылар. Дәрескә нәтиҗә ясап, укучылар викторина сорауларына җавап бирделәр.

7 нче апрель – Бөтендөнья сәламәтлек көне. Шул уңайдан, бездә “Иртәнге зарядка” флешмобы үтте. Күңелле музыка астында барлык укучылар физик күнегүләр ясадылар. Барыбыз да сәламәт булыйк!

Ел саен, Казан Дәүләт архитектура-төзелеш университеты, талантлы һәм креатив мәктәп укучылары арасында, рәсем һәм композицияләр буенча, “Яшь төзүче” олимпиадасы үткәрә. Әлеге олимпиада мәктәп укучыларының  иҗади сәләтләрен ачыклау һәм үстерүгә юнәлдерелгән. Гимназиябезнең 11 нче сыйныф укучысы Бодрова Камилла “Яшь төзүче” олимпиадасында катнашып, җиңүче булды. Укучы кызыбызны зур җиңүе белән чын күңелдән котлыйбыз! Киләчәктә дә укуында һәм иҗатында зур уңышлар теләп калабыз!

Язгы лагерьның бүгенге көне укучылар өчен бигрәк тә кызыклы булды. Укучылар Габдулла Тукай исемендәге әдәби музейда экскурсиядә булдылар. Биредә алар сөекле шагыйребез Габдулла Тукайның тормыш юлы белән таныштылар һәм татарча мультфильмнар карадылар. Экскурсиядән соң,"Черек күл" паркында саф һавада йөреп кайттылар. 

Укучыларның күңелле яллары дәвам итә. Лагерьга йөрүче укучылар бүген "Родина" кинотеатрында мультфильм карап кайттылар. Моннан тыш, гимназиядә дә балалар өчен файдалы чаралар оештырылды. Укучылар бик теләп рәсем бәйгесендә, "Күңелле стартлар"да катнаштылар.

29 нчы март көнне мәктәп яны лагерына йөрүче балалар "Пирамида" күңел ачу комплексында "Кызыл Калфак һәм чит планетадан килүчеләр" спектаклен карадылар. Әкият - тамаша хәзерге заманга яраклаштырып үзгәртелгән. Спектакль балаларга бик ошады.

Бүгеннән бездә, башлангыч сыйныф укучылары өчен, язгы лагерь үз эшчәнлеген башлады. Биредә укучылар вакытларын күңелле һәм файдалы итеп үткәрәләр. Бүген алар “Калейдоскоп” балалар паркында булып кайттылар.

Гимназиядә Бөтенроссия иреклелек дәресләре дәвам итә. Чираттагы дәрес 5 нче А сыйныфында узды. Дәрес барышында укучылар волонтерларның кемнәр икәнен һәм аларның эш юнәлешләре белән таныштылар. Дәрес ахырында, һәр укучы, кәгазь битләрендә, үтеп баручы атнада үзенең кылган яхшылыкларын, изге эшләре турында язды. Аннан соң, бергәләп, әлеге эшләре турында фикер алыштылар. Дәрес укучыларга бик ошады.

Бүген Татарстан Республикасы Фәннәр Академиясенең вице-президенты, икътисад фәннәре докторы, профессор Хоменко Вадим Васильевич безнең гимназиядә кунакта булды. Ул гимназия тормышы белән танышты һәм 7 нче сыйныф укучылары күрсәткән “Урок цифры” дәресен карады.

Бүген 8 нче Б сыйныфы укучылары Пушкин картасы буенча “Без кырык беренче ел балалары” спектаклен тамаша кылдылар.