Җиңү көненә багышланган “Җиңү тәрәзәләре” акциясенә без дә кушылдык. Укучылар гимназиядә, өйләрендә, матур итеп, тәрәзәләрен бизәделәр, аны фотога төшерделәр.

Бүген бездә Бөек Ватан сугышында Җиңүгә 77 ел тулуга багышланган радиотапшыру үтте. Көн дәвамында радиода укучылар башкаруында сугыш чоры җырлары һәм Җиңү көненә багышланган җырлар, шигырьләр яңгырады.

Гимназиябездә һөнәри юнәлеш бирү эшенә зур игътибар бирелә. Бүген 9 нчы сыйныф укучылары һөнәри юнәлеш бирү буенча тест сорауларына җавап бирделәр. Тест укучыларның нинди һөнәри юнәлешне өстен күрүләрен ачыклауга юнәлдерелгән иде.

Бүген гимназиядә Бөтенроссия Җиңү дәресләре узды. Әлеге дәреснең  максаты-1941-1945 еллардагы Бөек Ватан сугышында халыкның героик батырлыгы мисалында укучыларда патриотизм хисе тәрбияләү. Дәрес барышында укучылар күгәрченнәрне ни өчен тынычлык кошы дип атаулары, Ленинград халкының һәм Сталинградны саклаучыларның батырлыгы, Бөек Ватан сугышында һәлак булган каһарманнар һәм үз Ватанының данын яклаган солдатлар истәлеген мәңгеләштерү максатында эшләүче "Хәтер бакчасы" халыкара акциясе турында белделәр.

Гимназия укучылары "Җиңү җырлары" флешмобында катнаштылар. Алар "Катюша" җырын татар телендә башкардылар.

Сыйныфларда Бөек Җиңү көненә карата чаралар дәвам итә. 2 нче В сыйныфында “Без Бөек Җиңү варислары” дип аталган күргәзмә оештырылды. Күргәзмәдә укучыларның сугыш каһарманнары турында язмалары урын алды.

Гимназиядә Бөек Җиңүнең 77 еллыгына багышланган “Тыныч күгебез өчен рәхмәт” дип исемләнгән бәйге үтте. Бәйге кысаларында укучылар рәсемнәр һәм котлау открыткалары ясадылар. Укучыларның кул эшләреннән күргәзмә оештырылды.

Укучыларда патриотик тәрбия үстерү максатыннан, гимназия китапханәсендә Җиңү көненә багышланган күргәзмә оештырылды. Күргәзмәдә укучылар ул елларның тарихы һәм сугыш турында хикәяләр белән таныша алалар.

Бүген гимназиябез укучылары данлыклы очучы, Советлар Союзы Герое Михаил Девятаевның Казан шәһәре Елга портында урнашкан стелласы янында булып кайттылар. Биредә укучылар М. Девятаевның батырлыгы турында сөйләделәр һәм стелла янына чәчәкләр салдылар.

Бик тиздән илебез  иң зур, иң дулкынландыргыч бәйрәмебез – Җиңү көнен билгеләп үтәчәк. Шул уңайдан гимназиядә күптөрле чаралар үтә. Бүген 2 нче Б сыйныфында батырлык дәресе үтте. Дәрес барышында укучылар Бөек Ватан сугышында  илебез азатлыгы өчен көрәшкән якыннары турында сөйләделәр һәм Җиңү көненә багышланган рәсемнәр ясадылар.