Әхмәтшин И.И. җитәкләгән "Мини-футбол" түгәрәгенә йөрүче егетләр командасы бүген район күләмендә оештырылган мини-футбол ярышында 3 нче урынны яулап кайттылар.Молодцы,егетләр!

Бүген лагерьның  һәм 2013 нче елның соңгы көне. Лагерьнең санаулы көннәре бик тиз үтеп киттеләр. Җиде көн дәвамында укучылар күп нәрсәләргә өйрәнделәр. Иң мөһиме - дус-тату, сәламәт яшәделәр. Лагерьны ябу тантанасында укучылар үзләренә аеруча ошаган кичә-бәйгеләрне санап үттеләр, җәйге лагерьга планнар кордылар. Тантаналы төстә лагерь тәмамланды. Бүген 2013 нче елның соңгы көне. Алда 2014 нче ел!

Яңа еллар килсен бәхет алып,

Яңа еллар килсен елмаеп.

Күңелләрдә һәрчак шатлык булсын,

Яшәмәгез, дуслар, моңаеп!

Бүген 1-4 нче сыйныф укучылары "Нарат" боз сараена тимераякта шуарга бардылар. Апалары белән берлектә 1 сәгать дәвамында рәхәтләнеп тимераякта шуып, сәламәтлекләрен ныгытып кайтты укучылар. Күңелләре күтәренке, бит алмалары алсуланган укучылар каникулны файдалы һәм күңелле үткәрәләр.  

Лагерь тормышы иртәнге линейка, отрядларның бер-берсен сәламләве белән башланып китте. Бүген аларны кызыклы һәм файдалы кичә-бәйгеләр көтә иде. Чаңгыда шуу, "Оста куллар" түгәрәгендә шөгыльләнү, "Витаминнар-сәламәтлек дуслары" дип исемләнгән кичә, авылыбыз фельдшеры Зарипова Э. белән очрашу, "Юл йөрү кагыйдәләрен белик" дип исемләнгән кичәләрдә укучылар активлык күрсәттеләр, белемнәрен ныгыттылар. Көндәлек эшкә йомгак ясалып, актив укучыларга рәхмәт хатлары һәм бүләкләр таратылып, өйләренә озатылды.

Бүген 8.00-12.00 гә кадәр 1-7 нче сыйныф укучылары өчен Яңа ел тамашасы булып узды. Укучылар  көче белән "Яңа ел гаугасы" дип исемләнгән тамаша әзерләнде, стена газеталары чыгарылды, рәсемнәр конкурсы оештырылды, маскалар парады әзерләнде. Укучыларга Кыш бабай һәм Кар кызы алып килгән сюрприз-бүләкләр бик ошады. Тамашадан укучылар да, килгән эти-эниләр дә, эби-бабайлар да бик канәгать калдылар.

15.00-18.00гә кадәр 8-11 нче сыйныфлар өчен балмаскарад оештырылды. Укучылар 2014 нче елны күтәренке рухта каршылыйлар. Бәйрәмгә ныклы әзерлек алып барылган. Театрәлләштерелгән тамаша, берсеннән-берсе матур концерт номерлары, татар халкының җырлы-биюле уеннары шул хакта сөйли. Бәйрәмгә ямь өстәп Кыш бабай, Кар кызы, Яңа ел үз теләкләрен җиткерделәр. Тамаша күңелле биюләр белән тәмамланды.

Лагерьда ял итүче укучыларны бүген танырлык түгел! Барысы да маскалардан. Чөнки бүген алар Сатыш мәдәният йортында бизәлгән чыршы янында тамаша күрсәтәләр. Тамашалары бик уңышлы чыкты. Кыш бабай, Кар кызыннан бик күп бүләкләр алып, көндезге ашка дулкынлану белән кайттылар. Көндезге аштан соң инглиз телендә шигырьләр-җырлар конкурсында катнаштылар, чаңгыда шуып ял иттеләр.  

Бүген лагерьда ял итүче укучылар иртәнге аштан соң рәхәтләнеп чаңгыда шудылар, хореография түгәрәгендә матур биюләр өйрәнделәр, "Без зарядка ясадык, сикердек һәм йөгердек" спорт бәйгесендә көч сынаштылар. Көндезге аштан соң "Егет солтаны" бәйгесендә егетләр көч сынаштылар. Әлеге бәйгедә Шайхетдинов Алмаз җиңүче дип табылды. 13.15-13.50 гә кадәр татар халкының җырлы-биюле уеннарын  уйнап, күңел ачтылар. Лагерьнең дүртенче көне дә файдалы һәм күңелле узды.

Бүген "Кояшкай" ял лагереның өченче көне.  Иртәнге аштан соң, "Иң яхшы отряд" бәйгесе үтте. Иң оста скакалкада сикерүче, иң төз атучы, ераклыкка иң озын сикерүче, иң җитез йөгерүче билгеләнде. Җиңүче укучылар бүләкләнде. Бәйгедән соң укучылар "Туган ягымда умартачылык" түгәрәгенә керделәр. Түгәрәктән соң "Бөекбританиягә рәхим итегез!"  исеме астында кичә үтте. Укучылар Англия, аның башкаласы Лондон шәһәре, кызыклы урыннары, биналары белән танышты. Әлеге илдә виртуаль сәяхәттә булдылар. Көндезге аштан соң укучылар бассейн "Саба"га сәяхәткә  юнәлделәр. Суда йөзү балаларга бик ошады. Көндәлек эшкә йомгак ясап, кәеф күтәренкелеге белән өйләргә таралыштык.

Бүген "Кояшкай" ял лагереның икенче көне. Әлеге көн балалар өчен бигрәк тә кызыклы булды. Чөнки бүген лагерьда ял итүчеләр "Нарат" боз сараена экскурсиягә бардылар. Тимераякта шуу, кайтышлый район үзәгендәге чыршыны күрү, чаңгыда шуу, Кыш бабайга хат язу балаларның күңелендә бик яхшы хатирәләр калдырды. Укучылар көндәлек эшкә йомгак ясап, бүләкләр алып  күтәренке кәеф белән өйләренә таралышты.