Бүген бакчабызда табигатьтәге чисталыкны саклау буенча шөгыльләр үткәрелде. Балалар тыюлыклар, "Кызыл китап", саф һава, чиста су һәм башка төшенчәләрне бүген тагын бер тапкыр искә төшерделәр. Тәрбияче апаларының "Урмандагы гөмбәчеләр" сценариясе аша нәтиҗә ясап, нәрсә эшләргә ярый һәм ни өчен алай эшләргә ярамаганлыгы турында фикер йөрттеләр, кагыйдәләр чыгардылар. Соңыннан төрле тәрбияви  уеннар уйнадылар. Төрле сорауларга җавап бирделәр. Дөрес җаваплардан күренгәнчә, үткәрелгән шөгыльләр нәтиҗәле булган дигән фикер калабыз.

Матур бәйрәм җырыбыз яңгырагач еракка,

Кыш бабабыз ишетеп килде безгә кунакка.

Елмаеп, ул эндәшә: "Исәнмесез, дусларым!

Ямьле бәйрәм кичендә яусын сезгә котлавым.

Нинди әйбәт уйныйсыз яшел чыршы янында.

Бүләк биреп, мин сезне шатландырыйм тагын да."

  Бакчабызда " Яңа ел" бәйрәмнәре гөрләп үтте. Барлык 3 төркемдә дә балалар әти-әниләре, апа-абыйлары һәм дәү әни, дәү әтиләре белән Кыш бабайның килүен каршы алдылар. Балалар сөенешеп Кыш бабайга һөнәрләрен күрсәттеләр: җырладылар, биеделәр, шигырьләрен кат-кат сөйләделәр. Бәйрәмгә барлык урман җанварлары да килде, Кыш бабай белән Карчәчәккә ияреп, ярдәм итеп йөрделәр. Карчәчәкнең дуслары 7 гном да бүләкләр белән килгән иделәр. Башка елларны бәйрәмне бозарга теләгән Убырлы карчык та, быел бик юмарт булып, өенә бүләкләр тутырып килде.Балалар чыршы тирәсендә әйлән-бәйлән җырладылар, төрле кызыклы уеннар уйнадылар. Күңелле бәйрәм Кыш бабай белән Карчәчәкнең бүләкләр таратуы белән төгәлләнде.

Кыш бабайдан быел бүләк

күп булды.

Тәмле-тәмле конфет белән

кесәләр тулды.

  Яңа ел чыршысы ачылышы көнне Саба районы башлыгы Рәис Миннеханов еллык эшләргә нәтиҗәләр ясады һәм шул ук вакытта кар сыннары бәйгесенә дә йомгак ясап җиңүчеләрне тәбрикләде. Безнең "Саф чишмә" балалар бакчасына, авыл бакчалары арасыннан, өченче урын бирелде. Саба районы башлыгы Рәис Миннеханов "Саф чишмә" балалар бакчасы коллективына бүләк тапшырды һәм гомумиләштереп, барлык балалар бакчасын да мактап, җылы теләкләрен, рәхмәтләрен белдерде. 

Кыш килде, кыш килде, безгә яңа эш килде.

Мамык карлар көрибез, матур сыннар ясыйбыз.

  Менә быел да ак кардан бакчабыз бинасы каршына төрле матур сыннар ясадык. 2013 ел темасын сыннар ярдәмендә күрсәтергә тырыштык. Кайбер әти-әниләр дә битараф калмыйча, үз көчләреннән килгән кадәр ярдәм иттеләр. Аларга да зур рәхмәтләребезне җиткерәбез. Гел шулай бергәләп яшәргә язсын!   

-Бәйрәм бүген, бәйрәм! - диеп, бар дөнья көлеп торсын.

Әни бәйрәме икәнен барсы да белеп торсын,

Барсы да көлеп торсын! 

  Бүген бакчабызда кадерле әниләребез белән берлектә "Әниләр бәйрәме"н билгеләп үттек. Балалар әниләренә багышлап һәм рәхмәтләрен җиткереп матур, эчтәлекле шигырьләр сөйләделәр. Бергәләшеп җырладылар, биеделәр, әниләр белән күңелле уеннар уйнадылар. Уеннар ахырында кайсы әни" Җитез", кайсысы "Уңган", кайсысы "Тапкыр", кайсысы һәр яклап "Булган" икәнлекләре ачыкланды.  Бәйрәм кичәсе ахырында балалар үз куллары белән ясаган бүләкләрен әниләренә тапшырдылар. Бәйрәмдә катнашкан һәр кеше күңелле мизгелләрне күңелендә бик озак саклар әле.  

29 нчы октябрь көнне бакчабызда Корбан гаетен билгеләп үттек. Кунагыбыз Рушан мулланың вәгазьләрен, догаларын тыңладык; балалар да үзләренең белгән догаларын әйттеләр; соңыннан корбан итеннән пешерелгән аш ашадылды. Бәйрәмебез бик күңелле һәм эчтәлекле булды.

Сары, сары, сап-сары агачның яфраклары.

Җил исә, ява яфрак-көзнең матур чаклары.

                                Оча яфрак, уйный яфрак, һаваларда әйләнеп.

                               Бүген, бүген, бүген, бүген яфракларның бәйрәме!

    Бар җиһан төрле төсле матурлыкка чумган, кояш та әле үзенең җылы нурларын кызганмыйча сипкән, бакчаларыбыздан мул итеп уңыш җыеп алынган һәм табигать ниндидер бер сихри тынлыкка чумган вакытта "Саф чишмә" балалар  бакчасында Сөмбелә бәйрәме булып үтте. Уртанчы һәм зурлар төркемендәге балалар үзләренең һөнәрләрен күрсәттеләр. Бәйрәм кичәсе җырлар, шигырьләр, бию, такмак, табышмак һәм мәкаль-әйтемнәр әйтү белән бергә үрелеп барды. Бәйрәмнән балалар да, кунакка килгән әти-әниләр дә, шул исәптән тәрбияче апалар да бик канәгать булдылар.