Һәр елны көзен уза торган ремонт эшләре тагын башланды. Бакчабызны тагын да яңартырга, матурларга теләп, тәрәзәләр, ишекләр, баскычлар, хәтта өч төркемнең уен бүлмәләренең диварлары да буялды. Чын-чынлап бакчабыз яңарып китте.

  Кечкенәләр төркемендә әкиятләрне менә шул рәвешле сәхнәләштереп уйныйлар. Эчтәлекләрен яхшылап өйрәнәләр, ахырдан нәтиҗәләр ясыйлар. Балалар бик теләп, ярышып рольләрне бүлешәләр. Әле генә телләре ачылып килгән сабыйлар рольгә кереп тырышып-тырышып сүзләрне әйтеп аңлаталар. 

    "Детству - безопасные дороги!" конкурсында катнашып, кызыксындыру бүләгенә лаек булган Шайдуллина Алиябез бүген район үзәгендә оештырылган бәйрәм карарга барды. Шул уңайдан, конкурска нәтиҗәләр ясап, үзен дә бүләкләгәннәр. Бакчабызда да бәйрәм рухы сизелеп торды. Тәрбияче апалар төрле кызыклы уеннар оештырдылар һм кызыксындыру йөзеннән ярышларда җиңүчеләргә төрле бүләкләр тапшырдылар. Бик зур рәхмәт әлеге бәйрәмнәрне оештырган апаларга! Бәйрәм белән барчагызны да!!!

   Быел Эзмә "Саф чишмә" балалар бакчасыннан мәктәпкә 10 бала керәчәк. Шул уңайдан бүген 31 нче май көнне бакчабызда әлеге балаларны озату кичәсе булды. Ак юллар, якты киләчәк, һәрвакыт шулай тырыш, актив булуларын, әти-әниләренә исәнлек-саулык, тигезлектә шул балаларның бары тик изгелекләрен, күркәм сыйфатларын гына күреп яшәүләрен теләп калабыз!!! 

 Озату кичәсендәистәлек өчен бергә төшкән фото...

 Универсиада була

 Казанда быел җәен.

 Сез дә килегез, дусларым,

 Табыгыз берәр җаен.

  Азат, Айдар, Дилүсләрнең

 Даны китте еракка.

 Спорт белән шөгыльләнеп,

 Без килербез алмашка.

   18 нче май музей көне буларак билгеләп үтелә. Шул уңайдан бакчабызда оештырылган музейга кереп балалар бик күп кызыклы мәгълүматлар алып чыктылар. Элеккеге акча, утүк, милли киемнәр, чабата, табагачларны кулдан-кулга күчереп тотып карадылар. Тәрбияче апалар әби-бабаларыбызның ни рәвешле яшәгәннәре турында балаларга музейда булган әйберләр ярдәмендә күрсәтеп, сөйләп күзалларга ярдәм иттеләр.

  Быел  Эзмә "Саф чишмә" балалар бакчасыннан 10 бала мәктәпкә укырга керәчәк. Шул сәбәпле, 17нче май көнне бакчабызга район вәкилләре килеп әлеге балаларның белемнәренә бәя биреп киттеләр. 

17 нче май көнен сынау көне дип атасак та була. Көннең беренче яртысында кыш буе алган белемнәр буенча мониторинг үткәрелсә, көннең икенче яртысынды Илнур абый Насыйбуллин килеп балалардан юл йөрү кагыйдәләре буенча белемнәрен сынады. Балаларын алырга килгән әти-әниләрнең машина эчендәге бала утыргычларын да барлады.

     15 нче май көнне балалар тәрбияче апалары белән берлектә су буена экскурсиягә бардылар. Агачлар, үсемлекләр тормышында кояшның әһәмияте, үсемлекләрнең үсеше, табигатьтәге үзгәрешләр һәва торышына бәйле булуы турында әңгәмә алып барылды. Балаларга агачларның, үсемлекләрнең кешеләр тормышындагы әһәмиятен турында сөйләнелде. Балаларның фикерләү сәләтен үстерү максатыннан сораулар да бирелде. Мәсәлән: Ни өчен кошлар агачка куналар? Әгәр бакчада агачлар булмаса кошлар булыр иде микән? Кешеләргә агачлар, кошлар, үсемлек, чәчәкләр кирәкме, ни өчен? Урманда нәрсәләр яши? Ул җәнлекләрдә ел фасылы үзгәрү белән нинди үзгәрешләр була? һ.б. Беренче чәчәкләргә игътибар юнәтелде. Күзәтү үги-ана яфрагының чәчәгеннән башланды. Сирәк очрый торган үсемлекләр белән дә таныштырылды. Аларны танып белү, исемнәрен әйтә белүләре, ни өчен чәчәк бәйләме итеп үсемлекләрне җыярга ярамаганлыгы турында тәрбияче апалар тарафыннан бик яхшылап аңлатылды. Бергәләп кагыйдәләр чыгардылар: Урманда, бакчада чәчәкләрне өзмәскә, аның матурлыгына сокланырга; агачларның, куакларның ботакларын сындырмаска, яфракларын өзмәскә! Кошлар һәм җәнлекләрне куркытмаска! Табигатьне пычратмаска! Әлеге чара белән тәрбиячеләр туган як табигатенә мәхәббәт тәрбияләүне дәвам иттеләр, табигать кочагында үзеңне дөрес тоту, җир-суны пычратмау, яшеллекне һәм җан ияләрен, кырмыска ояларын саклау кирәклеге турында искә төшерделәр һәм ныгыттылар. Соңыннан балалар су буендагы чүпләрне җыйдылар.