1 октябрь - Өлкәннәр көне уңаеннан акция узырылды. Укучыларыбыз мәктәптә эшләп лаеклы ялга чыккан техник хезмәткәрләрне, укытучыларны өйләренә барып бәйрәм белән котладылар, аларга чәчәк букетлары, открыткалар бүләк иттеләр һәм мәктәпкә бәйрәмгә чакырдылар. Укучыларның игътибарын күреп өлкәннәрнең күзләре яшьләнде. Алар укучыларны тәртипле булырга, тырышып укырга өндәделәр.

Мәктәптә эшләп лаеклы ялга чыккан өлкәннәр өчен “Картаямыни соң йөрәк” исемле очрашу-кичә уздырылды. Бәйрәмгә килгән өлкәннәр мәктәп музеенда булдылар, директорыбыз аларны мәктәп тормышы белән таныштырды. Ә укучыларыбыз өлкәннәр өчен бик матур концерт куйдылар, өлкәннәр балаларга үзләренең яшьлек еллары турында сөйләп уздылар. Бәйрәм чәй табыны артында дәвам итте. Биредә алар үзләре эшләгән чордагы кызыклы вакыйгаларны исләренә төшерделәр, рәхәтләнеп ял иттеләр.

Бүген мәктәбебезгә 9-11 сыйныф укучылары белән очрашуга Казаннан районның халыкны эш белән тәэмин итү үзәге белән берлектә эшчәнлек алып баручы психология фәннәре кандидаты Трифонова Татьяна Александровна килде. Ул югары сыйныф укучылары белән  профориентация эше алып барды. Татьяна Александровна укучыларга  профессия сайлау, һәр профессиянең үзенчәлеге турында сөйләде. Үзеңә профессия сайлаганда барлыкка килергә мөмкин булган ялгышлар турында аңлатып китте һәм укучыларга тест эшләтте. Очрашу эшлекле формада үтте.

25-27 сентябрьдә Алабуга шәһәрендә 1996-1997нче елгы яшүсмерләр арасында татар-башкорт милли көрәше буенча Татарстан беренчелегенә ярыш булып узды. Әлеге ярышта мәктәбебездән Ахматханов Ильдан катнашты. Ул 60 кг. үлчәү авырлыгында Республика күләмендә 3нче урынны яулады.

Мәктәп  күләмендә башлангыч сыйныфлар айлыгы бара

“Хыял” балалар оешмасында үзидарә җыены уздырылды. Әлеге җыенда үзидарә членнары эш бүлештеләр, яңа уку елына төзелгән план белән таныштылар. План буенча фикер алышулар булды һәм кайбер өстәмәләр белән план бертавыштан кабул ителде.

Һәр фән буенча олимпиадаларның мәктәп туры башланып китте.

Район мәдәният йортында Минзәлә Дәүләт драма театры артистлары тарафыннан   Гаяз Исхакыйның “Сөннәтче бабай” хикәясе сәхнәләштерелде. Әлеге чарада мәктәбебездән бер төркем укучылар катнашты. Спектакль  укучыларга бик охшады.

Уку елы яңа гына башланып китүгә карамастан район күләмендә уза торган ярышлар оешкан төстә башланып китте. Арбор авылында, ООО “Арбор” призына, татар – башкорт көрәше буенча ярыш оештырылды. Көрәшчеләребез әлеге ярыштан зур уңышлар белән кайттылар.

Бүген дәресләрдән соң мәктәп бакчасында үстерелгән яшелчәләрне җыю оештырылды. Әлеге чарада һәр укучы актив катнашты. Җәй буе тырышып эшләү нәтиҗәсендә мул уңыш җыеп алынды.