26 нчы гыйнвар көнне башлангыч сыйныф укытучысы Яббарова Әлфирә Мансур кызы татар теленнән ачык дәрес күрсәтте. 3 нче сыйныф укучылары фигыль турында булган белемнәрен төрле алымнар аша күрсәтә алдылар. Укытучы балаларга карточкалар ярдәмендә фигыль төрләрен билгеләтте, ял минутында да фигыльнең заманнарын аердылар. Укучылар актив катнашты, дәрес файдалы үтте. 

“Һөнәрләр күп, теләгәнеңне сайлап ал!” исеме астында үткән сыйныф сәгатендә 9 нчы сыйныф укучыларын һөнәрләр дөньясына алып керү, аларда теге яки бу һөнәргә кызыксыну уяту; теләк – омтылышларын ачыкклау һәм эш дәвамында һөнәр иясенә кирәкле күнекмәләр булдыру өстендә эшләү барды.
Сатучы булу – мактаулы һәм игелекле һөнәр. Бу бик җаваплы һәм шул ук вакытта кызыклы эш. Аның бурычы кешеләргә теге яки бу товарны тәкъдим итү генә түгел, ә бу төр товар турында төгәл мәгълүмат та бирү. Ул ихтирамлы, игелекле, сатып алучылар белән яхшы мөгамәләдә булырга тиеш. Сатучылар арасында да төрле кеше очрый. Кешелекле, игътибарлы, түзем, сабыр холыклыбулырга кирәк - дип, сөйләде очрашуга килгән Рәмзия ханым.

25 нче гыйнвар көнне мәктәбебез укучылары Татарстанның халык ансамбле җитәкчесе Солтан Шигапов белән очрашты. Солтан абыйлары төрле халыкларның уен коралларында уйнап укучыларны таң калдырды.Бу очрашу укучыларыбыз өчен бик файдалы үтте.

Сәламәтлек- кеше бәхетенең нигезе. Исәнлек булганда гына кеше үзенең теләк-омтылышларына ирешә, тирә-юньне танып белә, җәмгыять тормышында актив катнаша, хезмәттән, уеннан, биюдән, физик күнегүләрдән ямь таба. Бу сүзләрне дәлилләп, 9 сыйныф укучылары дәресләрдән соң чаңгы шуарга чыктылар. Кышкы табигатькә сокланып, тән сихәте алып, күңел ачып кайттылар. 

26 нчы гыйнвар көнне 9 сыйныф укучылары математика фәненнән сынау имтиханы тапшырдылар.

24 нче гыйнвар көнне 5 классларда “Сәламәтлек иленә сәяхәт” дип исемләнгән тәрбия сәгатә үткәрелде. Укучылар үзләренең активлыкларын, белемнәрен күрсәттеләр. Укытучы Венера Надиловна бик күп эш алымнары кулланып укучыларны кызыксындыра алды. Укучылар сәламәтлекне саклау буенча күп мәгълүмат тупладылар. Алга таба да 5 нче сыйныфларга уңышлар телибез..

17 нче гыйнвар көнне Арча районы Ашытбаш урта мәктәбендә “Арча хәбәрләре” призына шахмат ярышлары булып узды. Безнең мәктәптән бер төркем укучылар катнаштып призлы урыннар яулап грамота, медальләр, бүләкләр белән кайттылар. Мәктәп командасы 1 урында, 5 нче сыйныф укучысы Базагутинова Диния 1 урында, 9 нчы сыйныф укучысы Нурмөхәммәтов Солтан 2 урында, 7 нче сыйныф укучысы Шарипова Фәйрүзә 3 урында калдылар. Укучыларыбызны бу җиңүләре белән чын күңелдән котлыйбыз, зур уңышлар телибез. 

21 нче гыйнвар көнне Балтач спорткомплексында бертуган Әхмадиевлар призына татарча көрәш ярышлары уздырылды. Безнең мәктәптән бер төркем егетләребез катнашты.6 нчы сыйныф укучысы Аухадиев Ленар 1 урында калып грамота, медаль белән бүләкләнде. Ленарга бары тик уңышлар теләп калабыз. Афәрин!!!

Иртәнге линейкада дежур торган 7 нче сыйныф укучылары атналык эшкә нәтиҗә ясады. Нәтиҗәләргә килгәндә, “Иң яхшы укучы класс” – 11, 4 нче сыйныф танылды.”Иң чиста класс”-8 нче сыйныф, “Иң тәртипле укучылар ” - 10 нчы сыйныф билгеләнде, “Шәфкатьле класс”-11 нче сыйныф, “Спорт сөюче класс”-6 нчы сыйныф билгеләнде.

Һөнәр сайлау – кеше тормышында иң әһәмиятле мәсьәләләрнең берсе. Заман үзгәрә барган саен, тормыш яңа һөнәрләр таләп итә. Гомерлек юлны сайлау бик авыр. Бу хакта 15 - 16 яшьтән үк уйлана башларга кирәк. Тора-бара яңа теләк-хыяллар барлыкка килергә мөмкин. Ә инде югары сыйныфларда укыганда үзеңә кирәкле профиль буенча белемнәрне арттыра алу мөмкинлеге булганда 9 нчы класста дөрес профиль сайлау – иң мөһим мәсьәлә. 19 нчы гыйнварь көнне тәрбия сәгате “Социаль хезмәткәр һөнәре”темасына узды. Укучыларга үз профессиясе турында сөйләргә Сагатдинова Лилия килде.