Хөрмәтле хезмәттәшебез Валиев Рөстәм Шәйдулла улының 1 нче октябрь көнне 50 яшьлек олуг юбилее. Сезне туган көнегез белән чын күңелдән котлыйбыз! Сезгә бәхетнең ин зурысын, шатлыкларның иң олысын юллыйбыз. Күңел тынычлыгы, чиксез бәхетләр, яхшы күтәренке кәеф юлдаш булсын сезгә. Киләчәктә дә эшегездә уңышлар, корычтай ныклы сәламәтлек, гаилә иминлеге, якыннарның кадер-хөрмәтенә төренеп, озын-озак бәхетле гомер кичерүегезне телибез.
Илленче көз сезнең бусагада
Илленчесе, түгел йөзенче
Узсын әйдә, картайсыннар еллар
Картайтмагыз бары күңелеңне.
Һәрчак шулай яшьлек дәрте сездә
Янып торсын җәйге учактай
Саулык, байлык, күп шатлыклар
Чиксез булсын язгы офыктай.
Иң изге теләкләр белән Бөрбаш урта мәктәбе коллективы 

Буген Бөрбаш авылында Балтач районының лаеклы ялдагы мәгариф хезмәткәрләренең очрашуы булды. Алар башта мәдәният йортына җыйналдылар, аннан соң гүзәл чишмәләрне, сокландыргыч сабантуй урыннарын йөреп чыктылар. Бәйрәм мул табыннар артында тәмамланды. Очрашуга килгән һәммә кеше үзенең олы рәхмәтләрен әйтеп таралышты.

27 нче сентябрь көнне Бөтендөнья туризм көне уңаеннан башлангыч сыйныф укучылары Бөрбаш Сәрдегәне авылына экскурсиягә бардылар. Алар Сәрдегән авылының берсеннән берсе матур чишмәләрен күзәтеп, аның табигатен өйрәнеп кайттылар. Укучылар экскурсиядән бик канәгать булдылар.

“Мәрхәмәтле Татарстан” акциясе кысаларында һәр сыйныфта план нигезендә тәрбияви әңгәмәләр, тәрбияви чаралар, тимурчылык эше башкарыла.

Мәктәбебездә Бөтенрәсәй фән олимпиадаларының мәктәп туры башланып китте. Укучыларыбызга уңышлар телибез.

27 нче сентябрь тәрбиячеләрнең һөнәри бәйрәмнәре. Безнең укучыларыбыз да үзләрен кечкенәдән тәрбияләгән тәрбиячеләрен котлау өчен балалар бакчасына бардылар. Аларга чәчәк бәйләмнәре, матур шигырь юллары аша үзләренең рәхмәтләрен җиткерделәр.

6-27 сентябрь кысаларында “Изгелек энергиясе” акциясе үтте. Әлеге акция вакытында төрле тәрбияви чаралар үтте.

26 нчы сентябрь көнне Балтач мәктәбендә Татарстан Республикасы яшь гражданнарының форумы булды. Анда безнең мәктәптән Г.Шакирова, Ч.Корбанова, Ф.Гыйльмуллин, К.Газизуллин, З.Хөсәенова катнашты. Бу укучылар форумнан катнашу турындагы сертификатлар белән кайттылар. Ә К.Газизуллин актив эшчәнлек өчен диплом белән бүләкләнде. Афәрин, укучылар!

Иртәнге линейкада дежур торган 9нчы сыйныф укучылары атналык эшкә нәтиҗә ясады. Нәтиҗәләргә килгәндә, “Иң яхшы укучы класс” - 11 нче сыйныф танылды.”Иң чиста класс”-10 нчы сыйныф билгеләнде.

Көз. Бакчада уңыш өлгерде. Бүген, ягъни 25 нче сентябрь көнне, мәктәп укучылары, җәй буе уз көчләре белән үстерелгән яшелчәләрне җыеп алдылар. Уңышыбыз бик мулдан булды. Укучылар бик тырышып эшләделәр. Аларга олы рәхмәтебезне җиткерәбез.