2 нче декабрь көнне авылыбызда олы бәйрәм, әллә кайлардан балкып торган мәчетебезнең 25 еллыгы үткәрелде. Шулай ук Мәүлет бәйрәме дә булды. Бирегә Рәсәйнең төрле почмакларыннан кунаклар килгәннәр иде. Бәйрәм тантанасы мәдәният йортында башланып, табын артында дәвам итте.

1 нче декабрь көнне Чепья урта мәктәбендә ООО “Труд” призына көрәш уздырылды. Анда мәктәбебездән Авхадиев Ленар 1 нче, Галимов Әлфис һәм Авхадиев Раниль 2 нче урынга лаек булдылар. Афәрин, егетләр! Алга табада уңышлар юлдаш булсын!

1 декабрь СПИДка каршы көрәш көне. Шул максаттан 30 нчы ноябрьдә һәр тәрбия сәгате үткәрелде. Биредә СПИДның нинди куркыныч чир икәне, кешегә иярү юллары һәм профилактик чаралар аңлатылды.Тәрбия сәгате видеороликлар, презентацияләр белән үрелеп барылды.

Бөтенрәсәй олимпиадасының муниципаль этабында катнашып, 7 нче сыйныф укучысы Газизуллин Кәрим тарих фәненнән җиңүче, ә 8 нче сыйныфтан Гыйльмуллин Фәнис инглиз теленнән призер булды. Аларны бу уңышлары белән котлыйбыз. Алга таба да зур үрләр, җиңүләр телибез!

28 нче ноябрь көнне 7 класс укучылары комплекслы эш эшләделәр. Биредә җәмәгать күзәтүчесе буларак, 6 нчы сыйныф укучысы Галиуллина Айгөлнең әнисе Ләйсән катнашты.

28 нче ноябрь көнне Казан инновация университеты вәкилләре 9 -11 нче класс укучылары белән очраштылар. Алар КИУ ның факультетлары, керү имтиханнары белән таныштырдылар.

3 нче сыйныф укучысы Загидуллина Галия Балтач районының "Факел" яшүсмерләр клубы призына үткәрелгән шашка ярышында, 2007-2008 нче елгы кызлар арасында, беренче урынны яулады. Галиягә алга таба да уңышлар теләп калабыз.

8 нче сыйныф укучысы Гафурова Әминә "Иделем акчарлагы" яшь язучылар бәйгесендә катнашып кайтты. Әминә шушы бәйгенең "Поэзия" номинациясендә актив катнашучы буларак кызыксындыру бүләгенә ия булды. Аның тагын да зуррак үрләр яулавын теләп калабыз.

25 нче ноябрь көнне әниләргә карата “Әнкәйләрнең белик кадерен” исемле концерт булды. Ул 7 нче һәм 10 нчы сыйныф укучыларының көче белән әзерләнгән иде. Концерт укучыларның үз куллары белән ясалган чәчәкләрен әниләренә бүләк итүләре белән башланды. Бәйрәмне матур шигырьләр, җыр- биюләр тагын да ямьләндерде. Афәрин, укучылар!

27 нче ноябрь көнне иртәнге линейкада дежур торган 7нче сыйныф укучылары узган атнадагы эшләргэ йомгак ясадылар. "Иң яхшы укучы сыйныф" исеменә 11 һәм 2 нче сыйныф, “Иң чиста класс” – 7 класс, “Спорт сөюче класс” исеменә 8 нче сыйныф укучылары ия булды.