Бүген 5 класста  Әниләр көне уңаеннан “Безнең кадерлеләребез”  дигән бәйрәм чарасы үтте.  Аның максаты: безнең иң кадерлеләребез булган әниләребезгә карата ихтирам, хөрмәт, көчле мәхәббәт тәрбияләү; укучыларда шәфкатьлелек, ягымлылык, җылы караш формалаштыру; сүз һәм эш белән өлкәннәрнең күңелләрен күрә, кәефләрен тоя белергә өйрәтү. Кичәдә укучылар әниләренә багышлап җырлар җырладылар, биюләр биеделәр, шигырьләр сөйләделәр, кадерлеләрен тапкырлыкта сынадылар. Бәйрәм бик күңелле үтте.

Бүген 21 ноябрь көнне мәктәпнең СМС проектында катнашучы “ЭRОN” отряды, педагог-организатор Шарафетдинова Г.Н. белән берлектә, “Сәламәт ана- сәламәт бала” акциясен уздырды. Алар әниләргә хөрмәт йөзеннән, сәламәтлек теләп үзләре ясаган кызыл йөрәк тапшырдылар һәм кояш, җылылык тосен белдергән кызгылт-сары тасма тактылар. Соңыннан начар гадәтләрдән баш тартырга чакырып, бер көнлек контрактка кул куйдырдылар.

    Бүген мәктәбебездә төгәл фәннәр атналыгы старт алды. Атналыкны линейкада 2 нче класс укучылары матур шигырьләр белән башлап җибәрделәр. 7 нче класс укучылары линейканы күңелле скетч белән ямьләндерделәр. Шулай ук 4-11 класс укучылары белән Бөтенроссия олимпиадасының муниципаль этабына соңгы әзерлек эшләре алып барылды. 

Бүген Г.Тукай әдәби-мемориаль музее хезмәткәрләре башлангыч класс укучыылары арасында "Без Тукай оныклары" дигән темага викторина уздырды. "Сандугач" һәм "Карлыгач" командалары үзара көч сынашты. Алар Г.Тукайның биографиясен, иҗат юлын, әсәрләрен яңадан искә төшерделәр. Укучылар бөек шагыйребезнең иҗатын яхшы беләләр икән. Ярышта дуслык җиңде.

20 ноябрь көнне Арчаның 5 гимназиясендә спартакиада кысаларында беренчел профсоюз оешмалары арасында ату һәм дартс буенча ярышлар булып узды. Ярышларда районыбызның 46 профсоз оешмасыннан 163 кеше катнашты. Мәктәбебез директоры Минҗанова Э.Ф. кызы дартс буенча 3 урынны яулады. Ә ату буенча командабыз 2 урынны алды. Чын күңелдән котлыйбыз! Барыгызга да уңышлар телибез. 

Бүген 9 класс укучылары сайлап алу фәннәреннән(биология,химия,җәмгыять белеме) белемнәрен барладылар.Бу аларга киләчәктә имтиханнарга ныклап әзерләнү өчен нык ярдәм итәчәк,чөнки биремнәрне башкарганда чыккан хаталарны анализлап , белемдәге җитешсезлекләрне чын имтиханнарга кадәр бетерергә кирәк булачак.

17 ноябрь көнне Татарстанда ата-аналар өчен интернет-җыелыш узачак. Интернет-җыелышны Мәгариф министрлыгының министр урынбасарлары үткәрәчәк. Җыелыш сәгать 12.00 дән 13.30 сәгатькә кадәр дәвам итә. Интернетта турыдан-туры барачак.

Бүген Арча шәһәренең 6 нчы номерлы мәктәбендә республикакүләм "Тату сыйныф серләре" ("Секреты дружного класса") бәйгесенең беренче көне узды. Бу конкурста безнең мәктәпнең укучылары, укытучылары, ата-аналар комитеты да катнашты. Алар мәктәпнең данын яклап бик матур чыгыш ясадылар. Әлеге конкурс иртәгә дә дәвам итәчәк. Нәтиҗәләр аннан соң билгеле булачак. Чыгыш ясаучыларга уңышлар теләп калабыз.

16 ноябрь — Халыкара толерантлык көне. Фәлсәфи энциклопедиядә бу сүзгә түбәндәге аңлатма бирелгән: толерантлык (латинча tolerantia — түземлелек) — икенче, башка төрле карашларга, холыкка, гореф-гадәтләргә түземлелек. Бу сүзнең мәгънәсе кешелек җәмгыятенең усеше өчен әһәмиятле булып тора, чөнки заманча мәдәниятле кеше — ул укымышлы гына түгел, ә башкалар тарафыннан хөрмәткә ия һәм үз-үзен ихтирам итүче кеше дә. Бүген 9 нчы сыйныфта үткән тәрбия сәгатендә кешеләргә карата түземле, кешелекле, шәф­катьле булу, икенче милләт вәкил­ләренә, чит дин кешелә­ренә хөрмәт белән карарга кирәклеге турында сүз барды.

Яңа Кырлай урта мәктәбе укучылары Арча урман хуҗалыгына 173 кг чыршы һәм нарат күркәсе җыеп тапшырды. Урманнар үстерүгә үзебездән дә өлеш кертик!