7-8 нче декабрь көнне Такталачык төп гомуми белем бирү мәктәбендә “Россиядә код сәгате” акциясе уздырылды.Шул уңайдан шул көнне тематик дәресләр уздырылды. Укучыларга информацион технологияләр, информатика фәнен өйрәнү һәм программалаштыруны ни өчен белергә кирәклеген аңлатылды. Дәрес ахырында һәр укучыга да бу акциядә катнашу максат итеп куелды. Укучыларыбыз акциядә актив катнашырлар дип ышанып калабыз!

9 нчы декабрь көнне Яңа Әлем төп гомуми белем бирү мәктәбендә "Федераль дәүләт белем бирү стандартлары нигезендә башлангыч сыйныфларны укытуда эшчәнлекле юнәлешне оештыру"темасы буенча башлангыч сыйныф укытучыларының район семинары үтте. Семинарда башлангыч сыйныф укытучысы Исламова А.Ф. катнашты

  Югары Гәрәй авылыннан Такталачык төп гомуми белем бирү мәктәбенең 8 нче классында ике бала укый.     Кышкы шартларда  кечкенә авылларда юлларның торышы, балаларның көнкүреше белән якыннан танышу максатыннан, класс җитәкчесе Фазылов А.М.һәм тәрбия эшләре буенча директор урынбасары Нуриева Ә.Г., Югары Гәрәйгә барып,  балаларның өйләрендә булдылар. Өлкәннәр белән тиздән башланачак кышкы каникуллар чорында  иминлекне тәэмин итү, төрле  бәла- казалардан саклану, уяулыкны арттыру турында сөйләштеләр.

 Яңа ел бәйрәмнәре алдыннан, кардан төрле сыннар ясап, ишегалдын бизәү  мәктәбебездә традициягә  әйләнде.   Технология укытучысы Нуриев Ф.Ш. җитәкчелегендә,  сын өю өчен,  укучыларыбыз берничә постамент ясап куярга өлгерделәр инде.

 Әле кайчан гына уку елы башлануны хәбәр итеп тәүге кыңгырау чыңлаган  иде. Бүген инде    уку елының беренче яртыеллыгы тәмамлануга  санаулы көннәр калып бара. Шул уңайдан укучыларыбыз төрле фәннәрдән контроль эшләр башкара.  10-11 декабрьдә 5, 7 класс укучылары- татар теленнән, башлангыч класс укучылары рус теле, татар теле, математикадан район мәгариф бүлеге тарафыннан җибәрелгән контроль  биремнәрне үтәделәр.

Такталачык төп гомуми белем бирү мәктәбенең 9 нчы класс укучысы Габдуллина Энҗе географиядән үткәрелгән бөтенрәсәй олимпиадасының район этабында 4 нче урынны яулады.(беренче өч урын билгеләнмәде). (Җитәкчесе: Хаҗиева Н.Х.)

 Инвалидлар декадасы кысаларында, 5-9 класс укучылары класс  җитәкчеләре белән берлектә, мәктәптә эшләп лаеклы ялга чыккан инвалидларның өйләрендә булып, хәлләрен белделәр, күчтәнәч каплары тапшырдылар

 Такталачык төп гомуми белем бирү мәктәбенең 9 нчы класс укучылары  Харисова Сөмбел һәм Газетдинова Гүзәл,  "Туган телем - шагыйрьләр теле"-гомуми белем бирү йортлары укучыларының   3 нче республика фәнни- эзләнү конференциясендә уңышлы чыгыш ясап,  икенче урынга лаек булдылар  ( фәнни җитәкче: Шәемова А.М)

Такталачык төп гомуми белем бирү мәктәбе башлангыч укытучылары белән балалар бакчасы тыгыз элемтәдә эшлиләр. Район күләмендә үткәрелгән бакча мөдирләре семинарында башлангыч класс укытучысы Шаемова З.Ф.катнашты.