18 февраль көнне "Яшьлек" яшьләр үзәгендә Актаныш районы һәм Казан "It-park"ы уздырган "TATAR HACK” хакатон бәйгесенең "Иң яхшы белем бирү проектлары" номинациясендә Яңа Əлем һәм Богады мәктәпләренең җыелма командасы җиңү яулады. Афәрин!

Башлангыч сыйныф укучыларының бушлай кайнар туклануы турындагы канун 2020 елның 1 маеннан үз көченә керде, мәктәпләр укучыларны кайнар ризык белән тәэмин итүгә 2020 елның 1 сентябреннән 2023 елның 1 сентябренә кадәр күчәргә тиеш иде. Мәктәбебездә әлеге канун тулысынча үтәлә, ата-аналар бушка кайнар туклануны һәрдаим күзәтеп торалар.

Җырларым, сез шытып йөрәгемдә
Ил кырында чәчәк атыгыз!
Күпме булса сездә көч һәм ялкын,
Шулкадәрле җирдә хаккыгыз!

Советлар Союзы Герое, Ленин премиясе лауреаты, герой-шагыйрь Муса Җәлилнең туган көне уңаеннан, укучылар шагыйрьнең шигырьләрен укыдылар.

Илһам Шакиров - татар халкының рухи көзгесе, гасырларга бер генә туа торган мәшһүр халык җырчысы. Илһам Гыйльметдин улы Шакиров - җырчы (баритон), Габдулла Тукай исемендәге Татар дәүләт филармониясенең сәнгать җитәкчесе (1992-2012). ТАССР (1969), Каракалпакстан АССР (1981), РСФСР (1983) халык артисты, Татарстан Республикасының Габдулла Тукай исемендәге дәүләт премиясе лауреаты (1970). Сарман районының, Казан шәһәренең шәрәфле ватандашы (2006).

Әфганчыларны искә алу көне уңаеннан, музейда аралашу сәгате узды. 1989 елда бу көнне совет гаскәрләре Әфганстаннан чыгарыла. Ун елга якын сузылган, унбиш мең совет кешесенең гомерен өзгән әфган сугышы тәмамланган көнне рәсми рәвештә Россиядә генә түгел, Белоруссия, Украинада да билгеләп үтәләр. Бу көнне иҗтимагый оешмалар Ватаннан читтә хәрби бурычын үтәгәндә һәлак булган солдат һәм офицерларны искә алу акцияләре уздыра.

Бүген районда «Ел укытучысы-2022» бәйгесенең муниципаль этабында җиңүчеләрне хөрмәтләү тантанасы уздырылды. «Иң яхшы татар теле һәм әдәбияты укытучысы» номинациясендә коллегабыз Сәлимҗанова Лилия Əхнәф кызы җиңүче, «Иң яхшы башлангыч сыйныф укытучысы» номинациясендә коллегабыз Нургалиева Лениза Зәки кызы 2 нче урынны яуладылар. Аларны җиңүләре белән ихлас котлыйбыз! Лилия Əхнәф кызы бәйгенең зона этабында катнашырга чакыру алды, анда да сынатмыйча уңышларга ирешүен теләп калабыз.

Актаныш районының 2009-2010 елгы яшь хоккейчылар командасы, авыл яшьләре арасында Салават шәһәрендә атна буена дәвам иткән "Алтын алка" бөтенрәсәй финал турнирында, 16 команда арасында мактаулы 3 нче урын яулады! Команда составында булган укучыларыбыз Фаррахов Мөнирне, Миннәхмәтов Альмирны һәм аларның тренерларын зур җиңүләре белән котлыйбыз!

Бүгенге көндә, тарихыбызны онытмыйча, киләчәкне күзаллап яшәргә кирәк. Яңа Əлем мәктәбе дә, 3 ел элек шушы принцип белән, математика фәненнән киләчәктә укытырга кайтару өчен, аерым фәннәрне тирәнтен үзләштерүле Актанышның 2 санлы урта гомуми белем бирү мәктәбен тәмамлаган укучы белән максатчан укыту юнәлешендә килешү төзегән иде. Əлеге егет - Исламов Зиннур Альберт улы, бүгенге көндә КФУның 3 нче курс студенты, Актаныш районы яшьләре арасында иң активларының берсе. Ул бүген мәктәптә кунакта булып, югары сыйныф укучылары белән очрашып, студент тормышы белән уртаклашты, "укытучы" һөнәренә карата балаларда мәхәббәт уятырга тырышты.

2022 ел - Татарстанда цифрлаштыру елы. Цифрлаштыру белем бирүдә дә чагылыш таба: планшетлар, электрон датчиклар, аларны эшләтү өчен приложениелар... Ə менә аларны куллануда кайбер укучы балалар өлкәнрәк буыннан ике адым алда баралар, дисәк тә ялгыш булмас. «Математика, физика, информатика» атналыгы кысаларында, 8-9 сыйныф укучылары «Үсеш ноктасы» үзәгенә кайтарылган цифрлы лабораторияләрне кулланып, төрле датчиклар белән тәҗрибәләр эшләп күрсәттеләр. Төркемнәргә бүленеп, чараны карарга кергән 4-5 сыйныф укучылары, апа-абыйларына яңа белемнәр белән уртаклашканнары өчен рәхмәтләрен дә җиткерделәр!

«Үсеш ноктасы» үзәгендә, «Математика, физика, информатика» атналыгы кысаларында, 8-9 сыйныф укучылары физика укытучысы Илназ Илшат улы белән берлектә, 4-5 сыйныф укучыларына физика фәненнән кызыклы экспериментлар тәкъдим иттеләр.