15 апрель көнне мәктәбебездә 7-8 сыйныф укучылары арасында география фәненнән “Тамчы-шоу” интеллектуаль уены булды. Интеллектуаль уен 3 тур буенча үткәрелде. Командаларга 1 турда 10ар сорау бирелде, 2 турда командалар тест биремнәрен үтәделәр, 3 тур тел турында мәкаль һәм әйтемнәргә багышланган иде. Нәтиҗәдә “Меркурий” командасы (8 сыйныф) - 1 урынга, “Җир” командасы (7 сыйныф) - 2 урынга лаек дип табылды. “Тамчы-шоу” интеллектуаль уенын югары квалификация категорияле география укытучысы Гыйльфанов Фидус Нәрфис улы үткәрде.

Биология атналыгы кысаларында, Рәсәйдә киң колач алган “Үсеш ноктасы” үзәгенә нигезләнеп, мәктәбебездә 13 апрель көнне күргәзмә оештырылды. Күргәзмәдә гербарийлар, юеш препаратлар, җимеш һәм орлыкларның коллекцияләре һәм башкалар бар иде. Укучылар күргәзмәдән күп кенә кызыклы мәгълүматлар алдылар, укытучы сөйләгәнне кызыксынып тыңладылар.

Укучыларыбыз әтиләре белән бергәләп сыерчык оялары эшләгәннәр!

12 апрель көнне, ата-аналар комитетыннан Әхмәтова Гүзәл укучыларның ашханәдә туклануына күзәтү ясаган. Журналга искәрмә дә язып калдырган: "Ашханәдә ризык туклыклы. Ашханә чиста. Пешекчеләр ачык, ягымлы. Ашның тозы җитәрлек. Дежур укучылар үзләре артыннан өстәлләрне җыештырып сөртеп чыктылар".

Балалар бакчасында тәрбияләнүче, быел мәктәпкә укырга керүче балалар бүген мәктәпкә экскурсиягә керделәр. Беренче укытучылары, укыйсы кабинетлары, музейдагы экспонатлар белән таныштылар. Авылыбызның мәдәният хезмәткәрләре һәм укучыларыбыз тарафыннан курчаклар белән сәхнәләштерелгән, Туфан Миңнуллинның "Кәрлә - мәктәп баласы" спектаклен бик яратып тамаша кылдылар.

12 апрель - Космонавтика көне, кешелек тарихының истәлекле датасы. 1961 елның бу көнендә космоска беренче тапкыр кеше очыш ясый. Ул Юрий Гагарин - беренче космонавт, космосның батыр йөрәкле рыцаре, илебезнең данлыклы улы! Мәктәбебездә ел саен бу шатлыклы вакыйга балаларга аңлатыла.

11 апрель көнне мәктәбебездә биология-химия атналыгы кысаларында 5-6 сыйныф укучылары арасында “Кошлар - безнең дусларыбыз” дигән темага КВН булды. КВН барышында укучыларга кошларга багышланган викторина һәм тест сораулары, төрле кызыклы биремнәр тәкъдим ителде. Укучылар бу бәйгедә кошлар турында белемнәрен тагын да ныгыттылар, күп мәгълүматлар алдылар. 

Безнекеләр - авылыбыз яшьләре һәм укучыларыбыз Яр Чаллыда уздырылган «Рәсәйнең киләчәге» бөтенрәсәй иҗат бәйгесеннән җиңүләр яулап кайтты! Җитәкчеләре Ленара Фәвәдис кызы! Котлыйбыз, без сезнең белән горурланабыз!

Агымдагы уку елында, башлангыч сыйныф укучылары тарафыннан сәхнәләштерелгән «Əтәч - кызыл кәпәч» әкияте, «Сәйяр» балалар һәм яшүсмерләрнең республика театр фестивалендә катнашып, иң яхшы 10лыкка керде һәм сертификат белән бүләкләнде.

Быел 90 еллык юбилеен каршы алачак "Актаныш таңнары" газетасын Яңа Әлем авылы элек-электән яратып укый. Почта элемтәсе үзәгендә эшләүчеләрнең тырыш хезмәте нәтиҗәсендә газета-журналлар, шул исәптән "Актаныш таңнары" газетасы халыкка вакытында барып ирешә. Подписка да елның елында уңышлы оештырыла. Халыкның хәбәрдарлыкка мөкиббәнлеге авылның мәгариф оешмасыннан башлана. Яңа Әлем мәктәбе директоры Илназ Шәрипов җитәкчелегендәге укытучылар коллективы 2022 елның икенче яртыеллыгына "Актаныш таңнары"на 100 процент язылган.