“Татаркино”ның Яр Чаллы филиалы ярдәме белән, башлангыч һәм бишенче сыйныф укучылары бүген "Сеңелкәш" фильмын карады.
"Сеңелкәш"- "Сестренка" ажиотаж тудыра алган фильм.
Башкорт язучысы Мостай Кәримнең «Безнең өйнең яме» повесте буенча Россия режиссеры Александр Галибин төшергән «Сеңелкәш» («Сестренка») фильмы мәгънәле, күңелгә үтеп керә торган әсәрләрнең берсе.
Сугыш чоры авылы, анда яшәүче кешеләр һәм балалар язмышын тетрәнмичә карап булмый. Сез дә карагыз...

Беренче дәрес "Мөһим темага сөйләшү" "Халыклар бердәмлеге көне"нә багышланды бүген.
5В сыйныфы укучылары аны интерактив уен форматында үтте - белгәннәрен искә төшерделәр. Каникулда берничә көнгә генә аерылып торсалар да, бер-берсен сагынырга да өлгергәннәр. Күтәренке кәефләре, дустанә шаярулары укуда тагын да активрак булырга этәргеч булсын!

Бүген – 7 ноябрь көнне, гимназиябездә "Разговоры о важном – Мөһим темага сөйләшү" сыйныф дәресләре "Халыклар бердәмлеге көне"нә багышланды.
Әлеге фотода 2А сыйныфы укучылары класс җитәкчесе Сөмәя Тәлгать кызы Муллаярова белән дәрес вакытында.

Нефтекама шәһәренең полилингваль һәм күп профильле интернат мәктәбендә Башкортостан һәм Татарстан республикаларының милли инновацион мәктәпләр директорлары катнашында форум узды. Форум, интенсив уку "Заманча шартларда мәктәп һәм югары уку йортының үзара бәйләнеш формалары" темасына багышланды.
Әлеге форумда гимназиябез директоры Венера Хәмәтнәсыйх кызы Хәева да катнашты.

3 ноябрь көнне Дәүләт Советында Татарстан Республикасы Конституциясенең 30 еллыгы алдыннан яшь татарстанлыларга Россия Федерациясе паспортларын тапшыру тантанасы узды. Күптән түгел 14 яше тулган балаларга паспортны Дәүләт Советы Рәисе Фәрит Мөхәммәтшин тапшырды.
Әлеге күңелле һәм истәлекле чарада Актанышның "Сәләтле балалар өчен гуманитар гимназия-интернат" укучысы Сарварова Язилә Илшат кызы да катнашты.

5А сыйныф укучысы Мансур Шәрипов йөзү спортындагы уңышлары белән безне сөендерүен дәвам итә. Район һәм төбәкара ярышларда Актаныш һәм гимназиябез данын яклый ул!
Каникул көннәре дә Мансур өчен күнегүләр, ярышлар белән үрелеп барды. Спортта башкача була да алмый!
“Халыклар бердәмлеге көне”нә багышланган йөзү ярышларында Актанышта һәм Илеш районының Югары Яркәй авылында беренче урын яулады спортчы егетебез.
Котлыйбыз сине, Мансур!

Уку атнасы, гадәттәгечә, дәүләт флагларын күтәрү һәм тантаналы линейка белән башланды.

Каникул вакытында гимназиябездә фән олимпиадаларында катнашучы укучылар аерым фәннәр буенча белемнәрен тирәнәйтә.

3А сыйныфы укучылары каникул вакытларын файдалы да, күңелле дә үткәрә! Укучылар класс җитәкчесе Лилия Васик кызы Галләмова белән берлектә "Лачын" боз-спорт сараена тимераякта шуарга бардылар.

Гимназиябездә I чирек йомгакларына багышланган педагогик киңәшмә узды. Киңәшмә эшендә Актаныш районы башлыгы Ленар Рафак улы Зарипов катнашты. Гимназиянең республикада һәм районда әйдәп баручы уку йорты булуында укытучылар, тәрбиячеләр коллективының лаеклы эшчәнлегенә рәхмәт белдерде Ленар Рафак улы.
Үзенең фикерләре белән дә уртаклашты. Бүгенге вәзгыятькә нигезләнгән киңәшләрен дә бирде. Гимназиянең, коллективның, укучыларның куркынычсызлыгын тәэмин итүдә сизгер һәм уяу булырга чакырды. Укучылар белән алып барылган патриотик эшне дә уңай бәяләде. Туган илне, туган якны, әти-әни ярату, гаилә иминлеге һәм Ватанны саклау бүген гади генә төшенчәләр түгел. Халыкның, райондашларның бердәмлеге, ышанычы, үзара ярдәме бүгенге барган вакыйгаларда да ачык чагылыш таба.

Район мәгариф идарәсе җитәкчесе Раниза Митҗан кызы Шакирова гимназиябездә алып барылган укыту-тәрбия, I чирек нәтиҗәләренә, укытучыларның куелган хезмәтенә тирән анализ ясады. Коллективка, укытучылар, тәрбиячеләр эшчәнлегенә, укыту программасына кертелгән яңалыкларны гамәлгә кертүдә урынбасарлар һәм директорыбыз Венера Хәмәтнәсыйх кызы Хәеваның үрнәк башлангычына югары бәя бирде. Республика, район чараларының гимназиябездә киләчәктә дә югары әзерлек белән үтәчәгенә ышаныч белдерде.