23 сентябрь көнне 8 нче сыйныфта Фирдания Габделхаковна «Кош та үз оясын пычратмый» дигән темага класс сәгате үткәрде. Максат : Укучыларда әйләнә – тирә мохитне саклауга игътибарны арттыру. Үз  сәламәтлекләрен ныгыту буенча белем – күнекмәләр бирү.

VII сыйныф укучылары класс җитәкчесе Галимуллина Дания Гайфетдин кызы белән табигатькә экскурсиягә чыктылар.Алтын көздәге төсләрнең күплегенә, тулышып пешкән миләш - баланнарга  һәркем сокланды. Туган якның гүзәл табигате һәр балада горурлану хисләре уятты.

Балаларның иминлеге айлыгы кысаларында янгын куркынычы янаган вакытта тиз арада эвакуацияләү буенча мәктәп күләм тренировка оешкан төстә үтте. Тренировка вакытында укучылар мамык-марля повязкалардан булдылар һәм эвакуация планы нигезендә хәрәкәт иттеләр. Җитешсезлекләр, кимчелекләр күрсәтелеп аларны төзәтергә күрсәтмә бирелде.

17 сентябрь көнне Саба гимназиясе стадионында үткәрелгән «Көзге кросс»та  200 метрга йөгерүдә 4 нче сыйныф укучысы Гайфуллина Альбина  II урынга лаек булды, 11 нче сыйныф укучысы Фатхриева Альбина 100 метрлы дистанциядә I урынны алды, ә 1000 метрга йөгерүдә 4 нче күрсәткечкә иреште.

Аларны уңышлары белән котлыйбыз!

Мәктәбебездә эшчәнлек динамик паузалардан башлана. Гимнастика вакытында төп игътибар балаларның гәүдә торышындагы кимчелекләрне кисәтүгә юнәлдерелә.

Мәктәп буенча “Балаларның иминлеген саклау” айлыгы бара. 3 нче һәм 4 нче сыйныф укучылары, класс җитәкчеләре Галимҗанова Л.Г. һәм Фәләхова Г.М.белән берлектә “Без- кечкенә пассажирлар” – дигән темага сыйныф сәгате үткәрделәр. Укучылар бу уенда бик теләп катнаштылар. Бирелгән сорауларга төгәл, дөрес җаваплар алынды. Сыйныф сәгате “Зәңгәр вагон” җыры белән тәмамланды. Укучылар үткән сыйныф сәгатеннән кәнәгать калдылар.

15 сентябрь Татарстан варислары туган көне уңаеннан "Шатлык" балалар оешмасында "Зур уен" уздырылды. Тантаналы төстә 6 нчы сыйныф укучылары варислар сафына алынды.

Мәктәптә  “Балалар иминлеге айлыгы” дәвам итә. Шул уңайдан 1 сыйныфта “Сәламәт булыйм дисәң, зарядкага бас иртән” дип аталган сыйныф сәгате, шулай ук “Юлың хәерле булсын, минем кечкенә дустым” дип аталган бәйге үткәрелде. Нәни дусларыбыз әлеге чаралардан кәнагать булып таралды.

15 сентябрь Татарстан варислары туган көне уңаеннан "Саба дулкыннары" радиосында бәйрәм чыгышлары булды. Анда районыбызның бер төркем активистлары балалар оешмалары эшчәнлеге, җәйге ялларын ничек уздырулары турында чыгыш ясадылар. Мәктәбебездән Резеда Рахимуллина, Фәридә Фәләхова "Сәләт-Саба" лагерында күңелле һәм файдалы ял итүләре, яңа дуслар табулары турында сөйләделәр. Гөлсинә Раяновна, ветеран остаз буларак, районыбызның барлык остазларын, ветеран вожатыйларны бәйрәм белән  тәбрик итеп, иң изге теләкләрен юллады.

   Мәктәптә республика һәм район нигезләмәләре (“Ватан” , “ Все краски мира-2011” конкурслары) буенча эш алып барыла. Конкурсларда һәр класс укучылары катнашулары  турында  фикерләрен җиткерделәр. Әлеге чаралар сыйныф җитәкчеләре белән берлектә алып барыла.

Укучыларыбызга уңышлар теләп калабыз!