8 нче көннең темасы- "Татарстан-минем Республикам" дип аталды. Иртәнге аштан соң балалар төркемнәргә бүленеп, "Мәдәният дөньясында" интеллектуаль уенында,  "Дәүләт символларын саклау-безнең бурыч" әңгәмәсендә һәм рәсем конкурсында катнаштылар. "Җәй-2014" мода күрсәтү дә аларга бик ошады. "Авылым: бүген һәм иртәгә" проектын төзү һәм яклауда актив булдылар."Татарстан дигән Ватаным бар, татар дигән бөек халкым бар" викторинасында көч сынаштылар. Көн күңелле үтте.

Милли бәйрәм - Сабантуеннан алган күңел күтәренкелеге белән балалар лагерьның 7 нче көненә җыелдылар.  Авылыбыз фельдшеры Яхина Л.С.ның эчтәлекле чыгышы алар өчен бик файдалы булды. Көн дәвамында авыл музеенды булып, бик күп мәгълүмат тупладылар.Төрле-төрле уеннарда актив катнаштылар.

6 нчы көнебезне иртәнге зарядка белән башлап, өстәл уеннары белән дәвам иттек. Бу уеннар балаларның фикерләү сәләтләрен үстерә, башны эшләтә. Шулай ук компьютерда презентация эшләү алымнарын да яңадан искә төшерделәр. Көннең икенче яртысында "Озын толым" бәйгесе узды. Кызларыбызның берсеннән-берсе озын чәчләренә карап сокландык.

5 көн-чәчәкләр көне дип аталды. Шат күңелле балалар, шау чәчәкле болынга барып, чәчәкләр җыйдылар, "Иң матур букет", "Иң матур экибано" конкурсларында катнаштылар. Аларның болындагы тәэсирләре "Җәйге чәчәкләр" рәсем конкурсында чагылды. Бантиклар бәйрәмендә 19, 21 бантик таккан кызлар үзләре дә чәчәкләрдән ким түгел иде.

Лагерьның  4 нче көнен балалар зур түземсезлек белән көтеп алдылар. Чөнки бүген балыкчылар көне итеп игълан ителде.  Иртәнге аштан соң кармакларны алып алар ямьле Мишә буена юл алдылар. "Иң беренче балык тотучы" Зиннатов Айзат; "Иң зур балык тотучы"- Яруллин Әлфис, "Иң кечкенә балык тотучы"- Галимов Айтуган, "Иң күп балык тотучы"-Закиров Зәнил булды.

Лагерьның өченче көне дә бик кызыклы үтте. Балалар табигатьтә экскурсиядә булып, безнең як үсемлекләре белән таныштылар, табигать турында шигырьләр укыдылар. Көннең икенче яртысында ТИН укытучысы Гатиятов Р.Р. белән "Фаҗигадән саклана бел" темасына очрашу узды. Ул презентация аша аңлаешты итеп чыгыш ясады. Көн "Җырлыйк әле" җыр бәйгесе белән төгәлләнде.

Лагерьның икенче көне җыелу, иртәнге линейка белән башланды. Иртәнге аштан соң  "Торнадо" һәм "Чупа-чупс" отрядлары үзләренең отряд почмакларын ясадылар. "Без наркотикларга каршы!"  конкурсында балалар һәрберсе эчтәлекле плакатлар иҗат иттеләр. Лагерь тирәсенә табигатькә экскурсиядән дә алар кәнагать калдылар. Туклыклы, тәмле аштан соң "Яшь чагыңда биеп кал" бәйгесе  игълан ителде. Күңелле музыкага төрле милләт биюләрен биеделәр. Линейкада бәйгеләрдә актив катнашкан һәр укучыга бүләкләр тапшырылды.

Ниһаять балаларның күптән көтелгән җәйге яллары башланды. Бүген мәктәбебезнең 30 укучысы "Кыңгырау" мәктәп яны сәламәтләндерү лагерена ял итү өчен җыелды. Саф һавада, музыка астында зарядка ясаганнан соң, балаларга инструктажлар үткәрелеп, эчке тәртип кагыйдәләре аңлатылды.  1 июнь-балаларны яклау көне уңаеннан Шекше мәдәният йорты хезмәткәрләре белән берлектә үткән мәдәни-спорт бәйрәмендә күңелле ял иттеләр. Мәктәп каршында асфальтка рәсем ясау конкурсы оештырылды.

24 май көнне мәктәбебезне 2004 елда тәмамлаган укучылар очрашуга җыелды. Алар укытучылар коллективына ихлас теләкләрен, рәхмәтләрен җиткерделәр. Башлангыч класс укытучылары Мусина Гөлфинур Фәрхетдиновна һәм Гарифуллина Зөбәрҗәт Хуҗәхмәтовна белән берлектә, классташлары Гыйбадуллин Нурсил тәкъдиме белән мәктәп территориясенә 10 агач үсентесе утырттылар.

29 май көнне Шекше урта мәктәбендә "Наркотикларсыз тормыш” акциясе кысаларында участок вәкаләтлеләре, прокуратура хезмәткәрләре, авыл советы җитәкчеләре катнашында ата-аналар җыелышы үтте.