Бүгенге көндә кешелек тормышын интернет челтәреннән башка күз алдына китерү мөмкин түгел, дисәк, арттыру булмас.Җайлы, аз вакыт сарыф ителә, тиз башкарыла, күп чыгымнар сорамый, интернетка үзебезгә ышанган кебек ышанабыз, серләребез белән уртаклашабыз. Чынлыкта исә, интернет челтәренең дөрес кулланмаган очракта нинди куркыныч янаганын күз алдына да китермибез.Шул уңайдан барлык гомуми белем бирү учреждениеләрендә Интернет челтәрендә куркынычсызлык буенча Бердәм дәресләр үткәрелде. Мәктәбебезнең информатика укытучысы Зиганшин А.Р.  укучыларга киберкуркынычларның төп төрләре, таралу алымнары һәм аларга каршы көрәш чаралары турында сөйләде.Дәрес башында Куркынычсыз Интернет турында социаль видеоролик күрсәтелде. Аны тикшергәннән соң укытучы “Ничек үз иминлегең хуҗасы булырга” дигән төп сорау бирелде. Алга таба укучылар шуңа җавап эзләделәр,виртуаль музейга да сәяхәт иттеләр.Бөтендөнья пәрәвезе ятьмәсенә эләкмичә, кагыйдәләргә буйсынып сак эш итү - һәрберебезнең бурычы. "Сакланганны саклар" гыйбарәсенә таянып эш йөртү кирәклегенә укучыларыбыз тагын бер кат төшенделәр. Һәрвакыт эшчәнлегеңне үзең контрольдә тотып, интернетны тиешле очракта гына кулланырга кирәклекне бервакытта да хәтердән чыгармаска кирәк..

Йөзү бөтен кешегә дә файдалы. Ул - физик яктан үсәргә һәм терәк-хәрәкәт системасын ныгытырга ярдәм итүче иң яхшы күнекмәләрнең берсе. Су киеренкелекне киметә, стрессны бетерергә булыша.Сәламәт яшәү рәвешен алып бару максатыннан районыбызда 2018 елның 16 нчы ноябре Бердәм йөзү көне итеп билгеләп үтелде.Мәктәбебез укучылары да бу чарада зур теләк белән,кызыксынып катнаштылар.

Каникул көннәрен мәктәбебезнең тимераякта шуучы кыз һәм малайлары бушка уздырмадылар,көчләрен Мәскәү өлкәсенең Коломна шәһәрендә сынадылар.Физкультура укытучысы Зиганшин Фрат Гаделша улының максатчан эш алып баруы күренеп тора. Укучылар үзләренә разрядлар эшләгәннәр һәм Татарстан Республикасы буенча 2,3 урыннарны яулаганнар.Алга таба да аларга зур уңышлар телибез.

Бүген, район мәдәният йортында, районыбыз укучылары өчен, Россиянең атказанган артисты, Татарстанның халык артисты Айдар Фәйзрахманов җитәкчелегендәге Татарстан Республикасы фольклор музыкасы Дәүләт ансамбле концерты булды. Кечкенә тамашачылар кунакларны бик җылы кабул иттеләр, һәр номерны көчле алкышларга күмделәр. Концерт программасында татар халыкының  җырлары  яңгырады, биюләре тәкъдим ителде. Җырчыларның  матур тавышлары, искиткеч костюмнар, музыка уен коралларының күптөрлелеге, дәртле биюләр укучылар күңелендә матур тәэсирләр калдырды.

Маҗаралы һәм кызыклы мультфильмнарны барлык балалар да яратып карыйдыр,мөгаен.Шул уңайдан без дә мәктәп укучылары белән авыл мәдәният йортында әдәп,әхлак турында мультфильмнар карап кайттык.Мондый мәдәни чаралар барыбызга да ошый,әлбәттә. Татарстан Гербында сурәтләнгән Зилант турындагы мультфильм аеруча күңелгә хуш килде.

Бүген мәктәбебезнең Яшь армиячеләре гомерен яшь буынга багышлаган математика укытучысы Зиннатуллина Сания апаны 75 яшьлек гомер бәйрәме белән тәбрикләделәр һәм шулай ук техник хезмәткәр булып эшләгән Мозафарова Әлфия апаны 80 яшьлек юбилее белән котладылар.Мәктәп коллективы исеменнән юбилярларга озын,бәхетле картлык телибез,балалары,оныклары,оныкчыклары белән куанышып,саулык-сәламәтлек белән тагын бик күп еллар яшәсеннәр.

4 ноябрь - Халыклар бердәмлеге көне. Бу бәйрәмнең тарихы ерак гасырларга барып тоташа. Ул тынычлык, иминлек, бәйсезлек өчен бердәмлек символын чагылдыра. Әйе, уртак көч булып туплансак, авыр чакта бер-беребезгә ярдәм кулы сузсак, җәмгыятебездәге вакыйгаларга битарафлык күрсәтмәсәк, төрле дин һәм милләт халкына, аларның гореф-гадәтләренә хөрмәт белән карасак, без - көчле халык. Барыбызны да бәйрәм белән!

Бүген мәктәптә "Укучыларның иҗади сәләтләрен үстерү" дигән темага педагогик киңәшмә узды. Бүген укучының иҗади сәләтен үстерү – җәмгыятьнең мөһим проблемаларыннан берсе. Соңгы вакытта укытуда, федераль дәүләт белем бирү стандартларына күчү сәбәпле, әлеге проблема бигрәк тә актуаль. Яңача белем таләпләренә нигезләнеп, укучыларның иҗади активлыгын үстерү, белемнәрне мөстәкыйль рәвештә куллана белүче, заманга яраклашкан шәхесләр тәрбияләү –укытучылар алдында торган төп бурыч.Шулай ук педсоветта 1 нче чирек нәтиҗәләре анализланды һәм башка укытучыларны борчыган сорауларга да тукталып кителде.

1991 елдан башлап 30 октябрь - сәяси репрессия корбаннарын искә алу көне буларак билгеләп үтелә. 1921-1953 еллардагы репрессияләр вакытында СССРда барлыгы 6 миллионнан артык кеше зыян күргән дип санала.Төрле елларда илдә барган сәясәт нигезендә административ тәртиптә репрессияләнгәннәрне тагын бер кат искә алу көне бу. Мөлкәтеннән, йорт-җиреннән мәхрүм ителеп, илнең тормыш итү өчен шартлар булмаган ерак төньяк һәм көнчыгыш төбәкләренә сөрелгән миллионлаган корбаннарның язмышын хәтердә яңарту көне. Аларның саны да, исәбе дә төгәл генә билгеле түгел. 

Бүген шушы көн уңаеннан без дә мәктәбебездә укучылар белән авылыбызың репрессия корбаннарын искә алдык.Дәрес-әңгәмә вакытында яшь армиячеләр дә чыгыш ясадылар.

Бүген Бөтендөнья татарча диктант — 2018 акциясе узды.Аны 25 илнең 60 төбәгендә,шул исптән Татарстан Республикасының шәһәрләре һәм төбәкләре дә катнашты.Бу акциядән без дә читтә калмадык,үзебезнең орфографик,грамматик хаталарыбызны тикшерү максатыннан диктант яздык.Барлык катнашучыларга сертификатлар тапшырыла, ә хатасыз язучыларга аерым бүләкләр биреләчәк.