Район мәгариф бүлеге боерыгы нигезендә, укучыларның гражданлык оборонасы буенча әзерлекләрен тикшерү максатыннан мәктәптә "Балаларны яклау көне"  үтте. Укучылар гадәттән тыш хәлләрдә үз-үзләрен саклый белүләре буенча теоретик һәм практик биремнәргә җавап бирделәр.  Төрле ярыштыларда катнаштылар,кыен хәлләрдән чыгу юлларын эзләделәр.

Татар шигъриятендә Габдулла Тукай- иң якты йолдыз. Ул калдырган иҗат мирасы һәм рухи яктылык- безнең мактанычыбыз һәм горурлыгыбыз. Аның исеме татар мәдәниятенең үткәне, бүгенгесе һәм киләчәге белән мәңгегә бәйле.Ул «халкыбыз күңеленең һич тә тутыкмас вә күгәрмәс саф вә раушан көзгесе» булды, әле дә шулай һәм киләчәктә дә шулай булыр. 26 апрельдә татар халкы үзенең бөек шагыйре Габдулла Тукайның туган көнен билгеләп үтә. Тукай туган көн хәзер республикабызда Туган тел көне дип игълан ителде. Инде бик күп еллардан бирле халкыбызда матур традиция яши - шагыйрьнең туган көнендә Шигырь бәйрәме һәм башка бик күп чаралар үткәрелә.Шул уңайдан мәктәбебездә дә шигырь бәйрәме,шагыйрь әсәрләренә рәсемнәр ясау һәм башка чаралар үткәрелде.

Бөтенроссия тикшерү эшләрендә барлык укучылар да бердәм биремнәрне үтиләр.Ул укучыларның фәннәрне үзләштерү, әзерлек дәрәҗәсен бәяләү өчен дә файдалы.Бүген 5 нче сыйныф укучылары рус теленнән, 6 нчы сыйныфлар математика фәненнән тикшерү эшләре башкардылар.

“Язның бер көне ел туйдыра”, ди халык мәкале. Мөрәле мәктәбенең мәктәп яны бакчасында, һәр елдагыча, эшләр гөрләп бара. Укучылар көче белән түтәлләр ясалды, кишер утыртылды.Алдагы көннәрдә чөгендер,суган утырту эшләре дәвам итәчәк.

Язын якын тирәдә сыерчык тавышлары ишетелмәсә, яз килгәнен сизмисең дә... Мәктәбебездә яз килүен, кошлар кайтуын чын-чынлап каршы алу максатыннан, сыерчык ояларына бәйге игълан ителгән иде. 1 нчы сыйныф укучыcы Мифтахова Ильвина ясаган оя иң яхшысы дип табылды.

17 апрель көнне Кайбыч мәктәбе базасында Инглиз телендә «School theatre» мәктәп театр коллективларының Республика фестиваль-конкурсының муниципаль этабы үткәрелде. Әлеге конкурста 1-8 сыйныф укучылары катнашты. Конкурс белем  сыйфатын арттыру максатыннан уздырылды. Әлеге конкурс-фестивальдә мәктәбебез укучылары коллективы инглиз теле укытучысы Минһаҗева Лилия Тәлгать кызы җитәкчелегендә 3 урынны яуладылар.Афәрин!

Бүген 5 сыйныф укучылары тарих, 6 сыйныф укучылары биология фәннәреннән Бөтенроссия тикшерү эшләре башкардылыр.