Һәркем иҗат эше белән мавыга. Кемдер шигырь яза, кемдер оста итеп пешерә белә, кемдер оста бии, кемдер нәфис сүз сөйли... Шуңа да бүгенге көн "Иң оста" ны билгеләү көне булды. Бүгенге көннең иң остасы - Билалиев Айназ һәм Айнур. Алар кебек иҗат итә белүче бик сирәк. Рәсем дә ясыйлар, пластилиннан да оста итеп әвәлиләр, иң оста спортчылар да булып танылдылар алар бу көнне. 

Казан шәһәренә экскурсиягә баруны ишеткәч, шатлыгыбыз эчебезгә сыймады. Зоопаркка дигәч, тагын да куаныштык. Күбебезнең күптән анда барган юк. Андагы "дусларыбыз"ны күрү  - үзе зур бәхет. Алар белән фотога төшеп, өйдәгеләргә дә читтән сәяхәт ясадык. Көн яңгырлы булса да, кәефебез корылмады. Рәхмәт оештыручыларыбызга! 

Бүгенге көн Хәтер  көненә багышланган.  1941 елның 22 нче июне – һәммәбезгә дә таныш дата. Бу көнне, алсу таң атканда, туган илебезгә немец-илбасарлары һөҗүм иткән. Алсу таң канлы таңга әйләнгән. Авылыбыздагы барлык ир-егетләрне сугышка озатканнар. Бөек Ватан сугышына авылыбыздан 300 гә якын кеше киткән. Шулардан 108 е генә әйләнеп кайткан. Безнең якты тормышыбыз, бәхетле киләчәгебез өчен үзләрен аямыйча көрәшкән батыр якташларыбызны беркем дә, һичкайчан да онытырга тиеш түгел. 

"Хәтер шәме" акциясендә укучыларыбыз да катнашты. Тәрбияче Хасанова М.М. укучыларны әлеге акциянең нәрсә өчен үткәрелгәне белән таныштырды. Һәр укучы үз гаиләләреннән сугышта катнашучыларны барлады. Аларга баш иеп рәхмәт җиткерделәр. Шәмнәр кабыздылар. Тыныч, аяз күгебезне беркайчан да кара болыт капламасын!

Мәктәбебезнең музее бик бай. Музейда еш булырга туры килсә дә, кергән саен истәлекләр яңара гына бара. Бүген үз районыбызның геройлары белән якыннанрак таныштык. Без дә алар кебек булырбыз.

Бүгенге көн тагын да кызыклы булырга охшаган. Иртәнге аштан соң Миләүшә апабыз пластилиннан әвәләп ясау серләренә төшендерде. Һәркем иҗат эшенә чумды. Укучыларыбыз фантазиягә бик бай. Билалиевлар иҗаты бәяләп бетергесез. 

Сәламәтлек - зур байлык, - дип юкка әйтмәгән борынгылар. Бүгенге көнебез спорт уеннары белән тыгыз бәйләнештә булды. Көн дәвамында  саф һавада йөгереп кайттык, саф һавада төрле уеннар уйнадык, "Күңелле стартлар" уены һәркемгә дә ошады. Чөнки һәркем үз отрядының җиңүен теләде. 

Бәрле елгасына экскурсиягә барачагыбызны белгәч,  ничек шатланганыбызны белсәгез иде?!  Эле ничек бит, ҖӘЯҮ. Күптән ерак юлга җәяүләп барган юк. Җәяү сүзен ишеткәч азрак кәефсезләндек. Алсу апабыз безнең кәефне күтәрер өчен юл буе табигатьне күзәтергә өйрәтте. Ник алай да, ник болай? Ә ерак юл сизелмәде дә. Рәхмәт Алсу апабыз, әле кайчан табигатьнең һәр могҗизасын шулай күзәтер идек тә, кайчан ҖӘЯҮЛЕ ПОХОДка чыгар идек, Бәрледә үзебез ясаган көймәләр йөздерер идек?!

Юлда йөрү кагыйдәләрен белү өчен юл билгеләре турында даими кабатлап торырга кирәк. Безнең авылыбызның Үзәк урамында юл билгеләре куелган. Без бүген Үзәк урам буйлап сәяхәттә булып кайттык. Андагы юл билгеләренең нәрсә аңлатканын белү өчен һәр отрядка күп көч түгәргә туры килде. Шулай да Алсу апабызга сер бирмәдек. Барлык юл билгеләрен дә төгәл атап күрсәттек. Рәсемнәр ясадык, төрле уеннар уйнадык. 

 Тиешле күләмдә терлек азыгы җыеп тапшыруда Мөрәле мәктәбе коллективы да читтә калмады. Терлекләребез витаминлы азыклар белән туклансын да, сау гына булсыннар.