Беренче сентябрь... Көзнең беренче көне... Беренче кыңгырау... Беренче укытучы... Белем иленә беренче адымнар...

Чәчәкләр тотып, матур итеп киенеп, ярым куркып, ярым кызыксынып һәм күпмедер дәрәҗәдә горурланып мәктәпкә таба атлаган адымнар. Әлеге олы юлга кереп китү нәкъ менә шушы беренче адымнардан тора. Мондый адымнар әле безнең тормышта еш кабатланыр. Көн арты көн үтелер, китап арты китап укылыр, белем өстенә белем, тәҗрибә өстенә тәҗрибә өстәлер.

Әлеге көн һәр кешенең дә диярлек күңелендә сакланадыр. Мәктәптә уку еллары безнең тормышыбызда зур урын алып тора. Мәктәпне тәмамлаган чакта без инде тагын да зуррак юлга адым атлар кешеләр булып тәрбияләнеп чыгабыз. Әлеге юллар безне дөньяның төрле төбәкләренә алып китәргә сәләтле.

Әмма, кайда гына китсәк тә, без үзебезнең кем булып чыгуыбызга әти-әниләребез белән беррәттән мәктәпкә һәм анда белем биргән беренче укытучыларыбызга рәхмәтле булачакбыз.

Тагын шуны әйтергә кирәк - адымнар бары тик үз көчеңә ышанганда һәм белемнәрең ышанычлы булганда гына ныклы булалар. Кайда гына барсагыз да һәрвакыт белемнәрегез күп һәм ышанычлы, атлар адымнарыгыз ныклы булсын! Аеруча - белем ачкычын алырга дип мәктәпкә барган беренче адымнар!

Укучыларны һәм студентларны, аларның әти-әниләрен һәм укытучыларын чын күңелдән бүгенге Белем бәйрәме белән тәбрик итәбез! Укуыгызда уңышлар, ныклы сәламәтлек, яңа белемнәр алган вакытта күзләрегездә очкыннар ялтырап торуын телибез!

Өстә әйтелгән теләкләргә өстәп тагын шуны әйтәсебез килә. Иң ныклы, иң яхшы, иң истә кала торган белемнәр - үз туган телеңдә алынган белемнәр! Без моны бик яхшы беләбез, күп еллык тәҗрибәбез моңа дәлил булып тора!

1.09.13. Белем бәйрәме белән!

Мәктәптә Белем бәйрәме үтте. Укучылар үсеп, ныгып яңадан мәктәпкә белем алырга килделәр. Быел 1нче сыйныфка дүрт кыз килде. Укытучылары – Хакимова Мөнирә Рәфхәт кызы аларны җылы каршылады. Хәерле сәгатьтә, укучылар.  

2.07.2013. “Чыгарылыш кичәсе – 2013”

Мәктәптә гөрләп чыгарылыш кичәсе үтте. 6 кыз һәм 1 егет имтиханнарны яхшы гына тапшырып, кулларына урта белем турында өлгергәнлек аттестаты алдылар. Ак юл сезгә, укучылар!

18.05.2013.  “Урманнар шауласын” акциясе.

Экология елы уңаеннан мәктәптә табигатьне саклау буенча күп төрле чаралар үткәрелә. Укучылар авылдашыбыз Ибраһимов Фарук абый белән авылыбызның яр кырларына, чишмә буйларына 120 дән артык агач утырттылар.

18.05.2013. “Балаларны яклау көне”

“Балаларны яклау көне” уңаеннан мәктәп укучылары җәйге аҗаган уеннарында катнаштылар. Командалар төрле ярышларда көчләрен сынадылар, маршрут буенча йөреп, каршылыкларны үтеп, укучылар ярышларда яхшы нәтиҗәләр күрсәттеләр.

17.05.2013.  Изге Болгар җиренә сәяхәт

Мәктәп укытучылары Изге Болгар шәһәр-тыюлыгына  экскурсиягә бардылар. Бу җирдәге матурлыкка сокланып, музейларда йөреп, күңелле ял итеп кайттылар.

9.05.2013. Бөек Җиңү көне.

8 май көнне бөтен мәктәп коллективы белән Бөек Җиңүнең 68 еллыгына багышланган митингка чыктык. 6 сыйныф укучылары матур шигырьләр һәм җырлар белән митингны ачып җибәрделәр. Укучылар сугыш кырында ятып калган сугышчылар истәлегенә чәчәкләр куйдылар. Митингка район вәкилләре дә килеп, чыгыш ясадылар.

11.05.2013. “Дөньякүләм балалар ышаныч телефоны” көне

2009 нчы елдан башлап һәр елның 17 май көнендә 8–800–2000–122 номерлы “Дөньякүләм балалар ышаныч телефоны” көне билгеләнеп үтелә. Нәрсә соң ул – “ышаныч телефоны”? Бу психологик ярдәмгә мохтаҗ булган кешеләргә ярдәмнең бер төре. Һәрбер кешенең күңелендә авыртойгылар, күңелсез хис – кичерешләр булырга мөмкин. Яныңда ышанычлы дустың булганда, борчу – кайгыларыңны аның белән уртаклашырга була. Безнең районыбызда да “Наз” халыкка социаль ярдәм күрсәтү үзәгендә мондый ышаныч телефоны эшләп килә. 2–65–05 номерына шалтыратып, яшүсмерләрдә, олылар да үзләрен борчыган мәсьәләләр буенча ярдәм ала алалар. Безнең белгечләр сезнең сорауларыгызга атнаның биш көнендә 8.00 дән 17.00 гә кадәр җавап бирерләр.