Хәерле иртә, дуслар! Бүген безне "Ак инеш" ансамбле егет-кызлары сәламли. "Созвездие-Йолдызлык 2022" фестивалендә Гран-при яулады алар! "Ак инеш" ансамбле белән без һәрвакыт иҗади хезмәттәшлектә. Молодцы, егет-кызлар! Без сезнең өчен ихлас сөенәбез!

Гимназиябез укучылары Яр Чаллы шәһәрендә - "Мин татарча сөйләшәм" фестивалендә!

Сәнгать (МХК) буенча Бөтенроссия олимпиадасының йомгаклау этабында катнашып, 10 а сыйныфы укучысы Динара Камильянова призер булды. Укытучысы - Миләүшә Мәгъсүм кызы Абдуллина. Котлыйбыз!!!

Интернатта яшәүче кызлар "Татарстан белгечләре" дигән уенны аеруча да ошаттылар. Белемнәрен дә сынадылар, Татарстан тарихы, аның мәдәнияте һәм традицияләре белән кызыксынулары да артты. Укучылар өчен тәрбияче Резеда Шамил кызы Рафикова әзерләгән биремнәр мавыктыргыч булды. Һәр биремне бик теләп үтәделәр, үзләренә күп мәгълүмат алдылар.

Татарстан мөфтие Камил хәзрәт Сәмигуллин 20 апрельдә - Рамазан аеның 19 нчы көнендә гимназиябезгә килде. Камил хәзрәт укучыларны, укытучыларны, әти-әниләрне, дәү әти-дәү әниләрне Рамазан ае белән тәбрикләде һәм кыскача вәгазь сөйләде, ураза тотуның шартлары, ураза төрләре һәм дәрәҗәләре, Рамазан аенда Коръән укуның фазыйләтләре турында аңлатып узды, ислам динендә гасырлар дәвамында дөньяның төрле илләрендә дини һәм дөньяви гыйлем биргән татар галимнәре, аларның хезмәтләре турында сөйләде. Вәгазь кичәсе Коръән аятьләре уку һәм дога кылу белән тәмамланды.

Гимназиябезнең 10 сыйныф укучысы Әмирсалих Анамов "Газпром" олимпиадасында катнашып, химия профиле буенча җиңү яулады - III дәрәҗә дипломга лаек булды. Укытучысы Рузилә Ильдар кызы Гарипова. Котлыйбыз!

Укучылар! Әти-әниләр! Дәү әти-дәү әниләр! 27 апрель көнне гимназиябездә авыз ачтыру - ифтар мәҗлесе. Сезне 18.00 сәгатькә көтеп калабыз.

Апрель ае - шигърият ае. Гимназиябездә шигъри кичәләр дәвам итә. Район үзәк балалар китапханәсе китапханәчеләре Резеда Әхмәтова, Ильмира Фәрхтдинова I сыйныф укучылары белән, Йолдыз Шәрапова иҗаты буенча, кичә бик күңелле, җылы очрашу оештырдылар. Укучылар озынайтылган көн төркемендә шагыйрәнең иҗаты белән таныштылар, үзләренең күңелләренә хуш килгән шигырьләрне яттан сөйләделәр. Балалар үзләре ясаган рәсемнәрдән күргәзмә дә оештырылды. Очрашуда китапханәчеләр укучыларга шәхси бердәм уку билетлары тапшырды. Китапханәдә һәр укучыны да көтеп калуларын белдерделәр. 

Гимназиябезнең "Ялкын" балалар оешмасының "Светофорик" отряды бүген "Куркынычсыз тәгәрмәч - 2022" район бәйгесендә катнаша. Уңышлар сезгә, балалар!

Якташыбыз -Татарстан Республикасының Дәүләт Киңәшчесе Минтимер Шәймиев мәдәниятебез турында: «Мәдәният – халыкның җаны, ул буыннарны бәйләп тора торган зирәклек һәм гореф-гадәтләр. Без үз мәдәниятебез белән көчле. Ул безне бердәм халык һәм бердәм ил итеп саклый. Күпмилләтле мәдәниятебезне үстергәндә һәм саклаганда гына, аны беркем дә юкка чыгара алмаячак».