Бүген республикабыз олуг датаны билгеләп үтә."Милләтебезнең йөзек кашы" булган Тукаебызның тууына  130 ел. Инде бу дөньядан киткәненә дә тиздән 1 гасыр булса да,әдипнең  исеме буыннан-буынга тапшырылып килә.Г.Тукайга багышланган чараларда безнең мәктәп укучылары да актив катнаштылар. 

Табигатьтә яз хөкемлек итсә дә, 9 сыйныф укучылары өчен "урак өсте" башланды.Алар бүген татар теленнән бердәм республика тесты тапшырдылар. Инде имтиханы артта булса да, укучылар әле тынычлана алмый:  алар түземсезлек белән нәтиҗәләрен көтәләр.Ә нәтиҗәләр май ахырларында билгеле  булыр диеп көтелә. 

23 апрельгә планлаштырылган шимбә  өмәсе идарә боерыгы  нигезендә җомгага күчерелде.Иртәнге яктан көн болытлы булуга карамастан, барлык укучылар да эш кораллары белән килгәннәр. Һәр көн диярлек чистарту эшләре алып барылса да, әле эш һәркемгә җитәрлек иде.Мәктәп укучылары, техник хезмәткәрләр һәм укытучылар җиң сызганып эшләделәр.Артыбыздан яктырып һәм чистарып калган территориядә үз хезмәт нәтиҗәләрен күрү укучыларга көч һәм куәт өстәде.

Тормыш ,кызганычка каршы, гел ак төсләрдән генә тормый. Һәркемнең төшенкелеккә бирелгән, серен сөйләрдәй ышанычлы кеше тапмаган, чыгып булмаслык булып тоелган киртәләргә очраган вакытлары булырга мөмкин. Киңәш бирердәй дустың булмаса, әти-әниеңә сөйләргә курыксаң да , син ялгыз түгел! Син тәүлек әйләнә бу телефонга шылтыратып, үзеңне борчыган мәсьәләләрне чишә, төпле киңәш ала аласың. Монда синең кем булуың, исемең,яшәү урының  турында сорамаячаклар да.Чишә алмастай проблема була алмый.Һәрвакытта да чыгу юлын табарга була.

Татарстан Республикасы мәгариф һәм фән министрлыгы тарафыннан оештырылган татар теле һәм әдәбияты буенча IY Халыкара олимпиаданың финал ярышлары 19-22 нче апрель көнне Казан шәһәренең  Универсиада авылында  булып узды. Олимпиаданың беренче турында 12 меңгә якын укучы туган телләреннән үз белемнәрен сынап карады. Ә финал ярышларында исә Рәсәй Федерациясенең төрле төбәгеннән һәм 12 чит илдән (Япония, Төркия, Кытай, Бельгия, Финляндия, Канада, Казахстан, һ. б.илләрдән) 500 укучы һәм студент катнашты. Бу зур чарага  районыбыздан бердәнбер мәктәп-Аксар мәктәбе укучылары  катнашуга бәхетенә ирештеләр..8 нче сыйныф кызлары  Нургалина Динара һәм Хабибуллина Айсылу,финал өлешендә   Татарстан Республикасы Премьер-министр урынбасары -мәгариф һәм фән министры Дипломы белән бүләкләнүгә лаек булдылар.

    Бүләкләү тантанасы 22нче апрель көнне Муса Җәлил исемендәге опера һәм балет театрында булды. Укучыларны Татарстан Республикасы премьер-министр урынбасары-мәгариф һәм фән министры Э. Н. Фәттахов, Бөтендөнья татар конгрессы башкарма комитеты җитәкчесе Р. Закиров, Дәүләт Советы рәисенең урынбасары Р. Ратникова котлады. Әфарин,кызлар! Булдырасыз!!!

"Бердәм Россия"  инициативасы белән уздырылган  "Дети рисуют страну" рәсем конкурсында катнашып  безнең мәктәптән 3 сыйныф укучысы Иванова Татьяна  2 нче урынны алды. Аңа истәлекле бүләк һәм диплом тапшырылды.

24 .04-30.04гә кадәр Европа иммунизация атналыгы бара. Әлеге чара кысаларында  сәламәтлек турында сыйныф сәгатьләре уза.Бүген мәктәпкә авылыбызның ФАП хезмәткәрләре чакырылды.Алар укучыларга  прививкаларның кирәклеге,сәламәтлекне кайгырту зарурлыгы, урман бетләренең  куркыныч нәтиҗәләргә китерергә мөмкинлеген  сөйләделәр.

"Язгы мәрхәмәтлелек" акциясе планы нигезендә бүген  иртәнге гимнастика  күңел күтәрә торган, бию элементлы гимнастика белән башланып китте.Тәнәфесләрдә дә  укучылар флеш-моб бию оештырдылар.Әлеге чара укучыларда бер-берләренә карата булган игътибарлылыкны,мәрхәмәтлелекне арттырырга ярдәм итте.Бер-беребезгә,тирә-ягыбыздагы кешеләргә һәрвакытта да изге  теләктә  булсак иде!

Бүген балигъ булмаган  балалар белән эшләүче комиссиясенең баш  белгече Галләмова А.Г.белән Форпост җитәкчесе Алексеев  мәктәптә  укучылар белән очрашуга килделәр.Очрашу  вакытында һәр балага аңлаешлы телдә шәһәр һәр районыбыз  яшүсмерләренең җинаять кылулары һәм әлеге җинаятьләр өчен җәзага тарту чаралары турында сөйләделәр.Үзләренең акыллы киңәшләрен биреп, укучыларны тайгак юлга кереп китмәскә чакырдылар.Соңыннан укучылар үзләрен кызыксындырган сорауларын бирделәр.Укучыларга уйланырлык җирлек бар иде...