6 июнь – бөек рус шагыйре Александр Сергеевич Пушкинның туган көне, быел аның тууына 223 ел тулды. Һәр елны бу көн Русиядә Рус теле көне буларак билгеләп үтелә. Бүген мәктәп лагеренда А.С.Пушкинның туган көненә һәм Рус теле көненә багышланган чаралар узды. Укучылар шагыйрьнең тормыш юлы һәм иҗатына багышланган әңгәмәдә катнаштылар, презентацияләр карадылар, кызыклы ребуслар чиштеләр.

Гимназиябез укучылары “Сәләтле буын” шәһәр бәйгесендә катнашып, зур уңышларга ирештеләр. 5 нче сыйныф укучысы Муллагалиева Зилә “Яшь шагыйрь” номинациясендә 2  нче дәрәҗә дипломант, ә 2 нче сыйныф укучысы Мальцев Данил “Сәхнә остасы” номинациясендә 2 нче дәрәҗә лауреат исеменә лаек булдылар.

Лагерь тормышы бик күңелле. Көн саен укучылар вакытларын файдалы һәм мавыктыргыч итеп үткәрәләр. Бүген, 3 июнь көнне, лагерьга йөрүче укучылар УНИКС концертлар залында   “Соня һәм Вованың виртуаль маҗаралары” спектаклен карадылар. Бу сәяхәт күңелле дә, файдалы да булды.

Җәйге лагерь үз эшчәнлеген дәвам итә. Бүген лагерьда ЮХИДИ хезмәткәрләре тарафыннан оештырылган «Куркынычсыз хәрәкәт автобусы» дип аталган чара үтте. Балалар мавыктыргыч уеннарда, кызыклы бәйгеләрдә катнаштылар, асфальтта юл билгеләрен ясадылар һәм шулай ук юл йөрү кагыйдәләрен дә искә төшерделәр. Чараның иң күңелле мизгеле ЮХИДИ инспекторларының укучыларга истәлекле бүләкләр тапшыруы булды.

Җәйнең беренче көнендә Җир шары иң матур һәм иң якты бәйрәмнәрнең берсе булган Халыкара балаларны яклау көнен билгеләп үтә. Балачак – һәркемнең тормышында иң гаҗәеп чор, якты буяулар һәм хыяллар белән тулы бер дөнья. Кадерле балалар, сәламәт, акыллы, белемле һәм игелекле булып үсегез! Сез – безнең киләчәгебез, якты өметебез!

Лагерьда ял итүче балалар бүген Кремль буйлап экскурсиядә булып кайттылар. Алар биредә узган бәйрәм чараларында да катнаштылар.

Бүген, 31 май көнне, лагерьга йөрүче укучылар “Зөбәрҗәт шәһәр”  театрында “Маша өчен могҗиза” спектаклен карадылар. Бу сәяхәт балаларга бик ошады.

Гимназиябезнең футбол командасы, Казан шәһәре Вахитов районының балалар-яшүсмерләр коллективлары арасында “Кожаный мяч” футбол буенча ярышларда, 1 урын яулаганы өчен бүләкләнде. Укучы егетләрне җиңүләре белән котлыйбыз!

Бүген гимназиядә җәйге лагерь эшчәнлеген башлап җибәрде. Балалар отрядларга бүленеп, аларга исем, девиз уйлады, плакатлар ясадылар һәм куркынычсызлык кагыйдәләре белән таныштылар. Алар шулай ук “Калейдоскоп” балалар ял паркында булып кайттылар. Балалар биредә күңелле ял итә.

Гимназиябез укучылары бүген шәһәребезнең Теннис Академиясендә кунакта булып кайттылар. Укучылар өчен биредә, бина буйлап, экскурсия оештырылган иде. Шулай ук зур теннис кырында үзләре дә теннис уйнап карадылар. Укучылар вакытларын кызыклы һәм файдалы итеп үткәрделәр. 

Быел пионерлар оешмасы төзелүгә 100 ел тулды. Шул уңайдан район күләмендә төрле бәйгеләр оештырылды. Безнең гимназия дә әлеге бәйгеләрдән читтә калмады. “Пионериягә – 100 ел” район бәйгесенең “Буыннар бәйләнеше” видео-ролик номинациясендә гимназиябез 1 нче урынга лаек булды. Әлеге җиңү белән чын күңелдән котлыйбыз һәм киләчәктә дә зур җиңүләр насыйп булсын дигән теләктә калабыз!