Бүген, 26 апрель көнне, мәктәбебезнең татар теле һәм әдәбияте укытучысы Галимулллина Дания Гайфетдиновна җитәкчелегендә  лекторлар 5-9 сыйныф укучыларын Габдулла Тукай музейлары белән таныштырды. Укучылар бөек шагыйрьнең Кушлавыч, Кырлай,  Җаек,  Казандагы музей-йортлары, шәхси әйберләре турында бик кызыксынып тыңладылар.Шулай ук Саба төбәгеннән чыккан танылган рәссамнар,язучылар,сынчылар  иҗатында Габдулла Тукай образы тасвирлануы укучыларда зур кызыксыну уятты. 

   Быел бөтен татар дөньясы бөек Тукаебызның 130 еллык юбилеен билгеләп үтә. 8 нче сыйныфта үткәрелгән сыйныф  сәгате дә Тукай иҗатына, аның әсәрләренең тәрбияви ролен күрсәтүгә  багышланган иде. Сыйныф җитәкчесе Фәһимә Гаптелфәтовна Тукайның балачак тормышына тукталды, аның балачак мизгелләрен, үсмер чорын, иҗат эшчәнлеген  слайдларда яктыртты.   Каюмова Ясминә үзенең “Тукай иҗатында тәрбия мәсьәләләренең чагылышы” дигән темага әзерләгән фәнни эше белән  чыгыш ясады. Әлеге эше белән Ясминә Шиһабетдин Мәрҗәни исемендәге республика фәнни-гамәли конференциясендә чыгыш ясап, 3 нче призлы урынга лаек булган иде.

6 класста Г.Тукайның  тууына 130  ел тулу уңаеннан  «Г.Тукайның яшьлек еллары»  темасына  сыйныф сәгате узды. Укучылар  Г.Тукайның  балачагын  искә төшерделәр. Хәзерге Уральск  шәһәреннән Казанга килгән чоры һәм иҗаты белән таныштылар. Г.Тукайга иҗат итү өчен язмыш тарафыннан бары сигез генә ел вакыт бирелүен,  1905 елда аеруча ялкынланып яза башлаган каләменең 1913 елның апрелендә туктап калуы, ләкин зур талантларның гомер озынлыгы еш кына аның ничә ел каләм тибрәтүе белән түгел, бәлки нинди әдәби мирас калдыруы белән билгеләнүен карап үттеләр. Укучылар дәрестә Тукайның замандашлары Г.Камал , Ф.Әмирхан белән аралашулары турында да мәгълүмат алдылар.Соңыннан Зәйтүнә белән Г.Тукай турында эшләнгән видеоязма  карадылар.

22 апрель көнне Юлбат төп мәктәбендә  тормыш  иминлеге нигезләре  укытучысы Мөбәрәкҗанов Р.Р. ачык дәрес үткәрде. Дәрескә  30 ел элек Чернобыль атом электр станциясендә  булган авария нәтиҗәләрен бетерүдә катнашкан авылдашларыбыз чакырылган иде.

23 апрель  көнне 7 сыйныф укучылары  Бөек Ватан сугышында һәлак булучыларга куелган  обелискка  өмә оештырдылар.

21 апрель - «Яхшылык эшләү көне». Шул максаттан, укучыларыбыз үзләренә билгеләнгән әби - бабайларда шефлыкта  булдылар. Аларның хәлләрен белделәр. Өй яннарын чистартуда булыштылар. 

Мәктәбебезнең  2-3 нче сыйныф укучыларын берләштергән “Модерн” бию төркеме “Сәләтле балачак  - өметле киләчәк” конкурс-фестивалендә катнаштылар. Алда аларны “Созвездие”  гала концертында, “Талант-шоу”   һәм  “Сәләтле балачак  - өметле киләчәк” гала концертларында чыгыш ясау көтә. Уңышлар сезгә, балалар! Сез булдырасыз!

Бөек шагыйребез Габдулла Тукайның  130 еллык юбилеена багышлап, 5 нче сыйныфта “Тукай моңнары” дигән исем астында дәрес-чара үткәрелде. Укучылар Тукайга багышланган һәм аның әсәрләренә иҗат ителгән җырлар тыңладылар, үзләре дә чыгыш ясадылар. Дәрестә баян һәм курай моңнары агылды. Укытучы Фәрит Мәҗитович үзе дә бик матур итеп укучылар алдында чыгыш ясады. Бик тәрбияви һәм файдалы чара булды.

“Язгы игелек атналыгы” дәвам итә. Шул уңайдан V - VI сыйныф укучылары белән  “Шәфкатьлелек бизи кешене” дип  аталган сбор  үткәрелде.  

Шушы уңайдан мәктәбебездә чаралар узып тора. 20 апрель көнне татар теле һәм әдәбияты укытучысы Дания Гайфетдиновна җитәкчелегендә бердәм дәрес үтте. Ул Тукайның мәгърифәткә карашы, аны үстерүдә шагыйрьнең роленә багышланган иде.