Хезмәт лагерена йөрүче укучылар мәктәп бакчасында эшләгәннән соң, китапханәдә вакытлы матбугат белән таныштылар, китапханә сәгате үткәрделәр.

     Көнебез иртәнге зарядка белән башланып китте. Тәмле итеп иртәнге ашны ашаганнан соң, барлык малайлар һәм кызлар “Бантиклар бәйрәме”нә ашыкты. Тиздән җиңүчеләр дә билгеле булды. I урынны Акбирова Динара, II урынны  Яруллина Алисә, III урынны  Галиева Айзилә яулады. Аннан соң табигатькә экскурсиягә чыктык, хәрәкәтле уеннар уйнадык. Уеннардан соң, мәдәният йорты белән берлектә, авылыбызның мөхтәрәм кешесе Дәүләтова Сәлимә апа белән “Иман нуры иңсен күңелгә” исемле очрашу кичәсе булды. Көнебез бик күңелле һәм файдалы үтте.  

   “Эш сөйгәнне, ил сөяр” ди, халык мәкале. Хезмәт лагерена йөрүче укучыларыбыз да мәктәп бакчасын ямьләндерү өчен үзләренең тырыш хезмәтләрен куялар. Бүген үсентеләр күчерү өчен түтәлләр, чәчәк клумбалары ясалды.

   Бүген лагерьны ачу тантанасы булды. Укучыларыбыз чарада бик актив катнаштылар. Аларның матур җырлары, дәртле биюләре, күңелле скетчлары барыбызга да бик ошады.

  Авылыбыз фельдшеры Вәлиева Ризидә Самат кызы катнашында үткән “Сәламәтлегең үз кулыңда” исемле әңгәмә укучыларыбыз өчен бик файдалы һәм үтемле булды.

     31 нче май көнне  мәктәбебездә 4 нче сыйныф укучылары өчен “Без инде зур үстек, бишенчегә үк күчтек!” дип исемләнгән, башлангыч мәктәп белән хушлашу кичәсе үткәрелде.  Укучылар, 4 ел буена шатлыклары да , борчулары да уртак булган сыйныф җитәкчеләре – Шәймуллина Ләйлә апаларына чиксез зур рәхмәтләрен җиткерделәр. Ә укытучылары үз чиратында аларга изге теләкләрен теләде: 

   “Кадерле укучыларым! 4 ел сизелми дә үтеп  китте. Бүген сезнең өчен башлангыч мәктәп белән саубуллашу кыңгыравы чыңлады. Сезне чын күңелемнән шушы иң истәлекле, шатлыклы көнегез белән тәбрик итәм. Инде сез горурланып, “Без инде зур үстек, бишенчегә үк күчтек!” дип әйтә аласыз. Сезне бу зур уңышыгыз белән чын күңелемнән котлыйм. Сез һәрвакыт минем ышанычымны акладыгыз. Киләчәктә сезгә тагын да зур уңышлар телим. Үзегезне һәр җирдә үрнәк тотыгыз, укыткан укытучыларыгызны беркайчан да онытмагыз!”

Бик зур бәйрәм безнең өчен бүген, 

Ләкин саубуллашу түгел, газиз мәктәбем. 

Көзләр җитү белән кулга чәчәк тотып, 

Килеп тә җитәрбез без тагын!" - дип, җавап бирделәр укучылар. 

   Бүген Явлаштау урта мәктәбе базасында “Кояшкай” ял, сәламәтләндерү һәм хезмәт лагере эшли башлады. Балалар лагерьга бик теләп, шатланып килделәр. Башлангыч сыйныфтан 30 укучы ял лагерена йөрсәләр, 11 укучыбыз хезмәт лагерена йөриячәкләр. Балаларны лагерьга кабул иткәннән соң, аларга көн тәртибе һәм көндәлек режим аңлатылды, инструктажлар үткәрелде.

    “Кояшкай” мәктәп яны ял лагеренда көн “Әйдәгез, танышыйк!” дигән чара белән башланып китте. “Хәрәкәттә-бәрәкәт” исеме астында хәрәкәтле уеннар уйналды, отряд газеталары чыгарылды. Көндезге аштан соң Халыкара балаларны яклау көне уңаеннан, “Матур безнең балачак, мәңге истә калачак!”  дип исемләнгән бәйрәм чарасы үтте. Кызыклы уеннар уйналды, ярышлар үткәрелде. Укучылар барысы да бүләкләргә ия булып, шатланып өйләренә таралдылар.