Бүген укучыларыбызның хәрәкәт активлыгын үстерү максатыннан, табигатьтә хәрәкәтле уеннар уйналды.

   Безнең туган авылыбызның табигате бик бай. Урманнары, таулары дисеңме, инешләре, чишмәләре дисеңме-барысы да авылыбыз янәшәсендә генә. Бүген без, ягъни, “Кояшкай” лагеренда ял итүчеләр, урманга сәяхәткә бардык. Урман һавасының сафлыгы, кошлар сайравы, андагы чәчәкләрнең матурлыгы – нәкъ әкияттәгечә. Без табигатьнең матурлыгына сокланып, саф һавада булып, көч туплап кайттык.

    Менә көтеп алынган көн дә килеп җитте. Бүген без иртәнге аштан соң, зур, уңайлы автобуска утырып, Казан шәһәренә сәяхәткә кузгалдык. Казаныбыз белән танышып, аның истәлекле, тарихи урыннарында булып, хозурланып кайттык. Безгә шундый мөмкинлек тудырганнары өчен барлык җитәкчеләребезгә укучылар һәм әти-әниләр исеменнән олы рәхмәтебезне җиткерәбез. Рәхмәт Сезгә!

    Күптән көтелгән “Баллы көн” дә килеп җитте. Иртәнге аштан соң барыбыз да “Баллы аланлык”ка йөгердек. Анда безне кызыклы сюрпризлар көткән икән. Яшерелеп куелган татлы ризыкларны һәркем тырышып эзләде.”Баллы көн”нең җиңүчеләре булып Айгиз, Айзилә һәм Диана танылды. Көндезге аштан соң авылыбызның моңлы сандугачы - Ринат абый Шамилов белән очрашу кичәсе үтте. Ринат абый үзенең моңлы матур җырларын башкарды, ә укучылар аны алкышларга күмделәр.  

    Һава торышы начар булуга карамастан, лагерьның җанлы тормышы үз тәртибе белән бара. Иртәнге линейкадан соң укучыларыбыз авылыбыз янәшәсендәге чишмәләрне чистартырга бардылар, табигатьтә булуларыннан файдаланып, “Иң матур букет” конкурсы үткәрделәр. Төшке аштан соң “Рус теле көне”нә багышланган брейн-рингта катнаштылар. Көнебез искиткеч күңелле һәм файдалы үтте.

   Бүген укучыларыбыз иртәнге аштан соң Мишә буена экскурсиягә бардылар. Туган ягыбызның табигате белән таныштылар, “Кызыл китап”ка кертелгән үсемлекләрне таптылар, алар турында күп мәгълүматлар белделәр. Ә соңыннан, балыкчылар ярышы үткәрелде. Укучылар барысы да тырышып балык тоттылар. Кемнең күпме балык тотканын исәпләгәннән соң, балыкларны яңадан суга җибәрделәр.