Мәктәбебез базасында авылдашыбыз Габделфәрт Рафиков истәлегенә 1996 елгы һәм яшьрәк укучылар арасында  татар-башкорт милли спорт көрәше ярышы булып узды. Әлеге ярышта мәктәбебезнең көрәшчеләр командасы уңышлы чыгыш ясады һәм 1 урынга лаек булды.

Мәктәп укучылары һәм студентларның V Бөтенроссия фәнни-гамәли конференциясендә, “Татар лингвокультурологиясе:проблемалар һәм перспективалар” дигән доклад белән, 10 сыйныф укучысы Хәкимуллина Иркә чыгыш ясады. Ул әлеге конференциядән, яхшы докладчы буларак, диплом алып кайтты. Иркәне һәм аның җитәкчесе, татар теле һәм әдәбияты укытучысы, Роза Александровнаны уңышлары белән котлыйбыз.

Сәлимә Зиннәтовна җитәкчелегендә “Радуга” бию төркеме кызлары ТНВ телеканалында, “Ива- мебель” фабрикасы данын яклап, “Башваткыч” тапшыруында катнаштылар. Әлеге уңайдан телекомпания җиәкчелеге тарафыннан бию төркеме исеменә рәхмәт хаты алынды.

Республика күләмендә узучы “Мы ценим- мы дорожим” дип исемләнгән открыткалар конкурсының район турында катнашып, 3 класс укучысы Ибрагимова Гүзәл 3 урынны яулады. Безнең Гүзәл рәсем конкурсларында бик теләп катнаша һәм призлы урыннар да яулый. Киләчәктә Гүзәлгә иҗатында тагын да зурырак уңышларга ирешергә насыйп булсын.

5-8 класс укучылары өчен  8 март бәйрәме уңаеннан “Бәйрәм белән, кызлар”! дип исемләнгән кичә оештырылды. Әлеге бәйрәмдә малайлар көче белән концерт күрсәтелде. Шулай ук кызлар өчен кызыклы сораулар да әзерләнгән иде. Әлеге сорауларга төгәл җавап биргән 7 класс кызларына “Иң зирәк кызлар” исемле диплом тапшырылды. Бәйрәм чәй табыны артында дәвам итте.

8 март – халыкара хатын-кызлар көне уңаеннан 9-11 класс укучылары өчен бәйрәм кичәсе үткәрелде. Кичәне 10 класс егетләре алып барды. Кызлар “Ландышлар” һәм “Пупсики” командаларына бүленеп ярыштылар.

1-4 сыйныф укучылары өчен 8 март һәм 23 февраль бәйрәмнәре уңаеннан “дуслык” бәйрәме уздырылды. Әлеге бәйрәмдә кызлар һәм малайлардан торган 3 команда ярышты. Ярышта табышмаклар әйтешү, төшермичә шар йөртү, тизлеккә кызлар киендерү, сазлык аша йөрү, эстафета, каршылыклар аша узу кебек күңелле уеннар булды.

Бүген беренче сыйныф укучылары әлифба китабын уңышлы тәмамлауларын бәйрәм иттеләр. Бу- гаилә бәйрәме. Укытучы, укучы, әти-әнинең тырышлыгы нәтиҗәсендә зур җиңү яуланды. Беренчеләр укырга, язарга өйрәнделәр.

Район күләмендә татарча көрәш буенча ярышлар еш уздырыла. Әлеге ярышларда мәктәбебез көрәшчеләре актив катнаша һәм призлы урыннар яулыйлар. Шундый ярышларның чираттагысы Бөрбаш авылы җирлегендә, Фидаил Шакиров истәлегенә, уздырылды. Әлеге ярышта көрәшчеләребез командасы беренче урынны яулады һәм кубокны үзебездә калдырды.

Оборона-масса  һәм спорт айлыгы планы нигезендә һәр класс кышкы табигатькә  чыгарга тиеш. Башлангыч сыйныф укучылары әлеге экскурсияне беренчеләрдән булып башлап җибәрделәр. Алар класслары белән тау шуарга бардылар, табигатьтә рәхәтләнеп күңел ачтылар.