Кечкенә генә булсалар да 1 нче кечкенәләр төркеме балалары  борчакның ничек үскәне белән гел кызыксынып торалар. Менә бүген борчак шау чәчәктә утыра, тиздән яшел кузаклары барлыкка килер. Бу бит табигать могҗизасы!

Бу атналыкны без "Күңелле уеннар" атналыгы дип атадык. Уеннарның нинди төрләре генә юк - кагыйдәле уеннар, спорт уеннары, өстәл уеннары һ.б.  Күп төрле уеннар арасында безнең иң яраткан спорт уеннары - туп белән. Баскетбол, футбол, хәрәкәтле уеннар "Кем күбрәк туп тота?", "Кайсы команда туплардан тизрәк арына?" һ.б. Спорт белән мавыгу җинү генә китерми, ул кәефне күтәрә, сәламәтлекне ныгыта,төрле әхлакый сыйфатлар формалаштыра. Менә шуңа да без спортны бик яратабыз!

Кулыбызда ук һәм җәя

Төбибез нәкъ уртага.

Хәрәмзәли белмибез без

Угыбыз читкә китсә дә.

Бик тә төгәл атырбыз без

Зур булып үсик кенә.

"Зебра" юлыннан чыгабыз

Урам юлы аркылы.

Моны истә тоткан бала

Булыр һәрчак акыллы.

Самокатта күбрәк кызлар йөрергә яратса, без малайлар, рәхәтләнеп велосипедта элдерттек.

Аяклары түгәрәк,

Куышалар тәгәрәп,

Үзем утырам, үзем чабам.

Әй, чабабыз, бергәләп !

Балтач  бистәсенең  үзәк ял паркында рәхәтләнеп ял иттек. Кызлар самокатта  бик  оста йөриләр, артларыннан куып та җитеп булмый. Җылы кояш астында саф һавада йөрү кәефләребезне күтәрде, хәрәкәт активлыгын төрләндерергә ярдәм итте.Тикмәгә генә олылар "Хәрәкәттә - бәрәкәт" димәгәннәр шул.

Зурлар төркеменә йөрүче Камалов Сәйдәшнең иң яраткан спорт төре - шахмат.  Нәни генә булса да бу өлкәдә уңышлары да шактый саллы. Сәйдәшне әлеге уңышлары белән котлыйбыз, аның белән без дә горурланабыз һәм киләчәктә дә үзенә зур җиңүләр юлдаш булуын телибе.

Аркага астык рюкзак,

Җыендык без походка.

Барыйк әле, бергә-бергә

Бир, дускаем, кулыңны.

      Яшел чирәмле болыннар,

      Көтәләр безне күптән.

      Хәрәкәттә - бәрәкәт бит,

      Җәйне үткәрмик  бушка.

Җәйнең иң тәмле чоры җитте. Бакчаларда  җиләк-җимеш өлгерә.

Кызарып пешкән чияләр

Мине ал, ал дияләр!

Кем генә хыялланырга яратмый соң?  Бу сүзләр зурлар төркеменә йөрүче кызларга бигрәк тә туры килә. Алар үрмәле үсемлекләрдән зәвыклы костюмнар иҗат иттеләр һәм безгә дә тәкъдим итәләр. Рәхим итеп карагыз.