Узган атнада мәдәният йортында армиягә китүче егетләрне озату кичәсе булса, бу атнада мәктәбебездә армия сафларыннан кайтучы егетебезне каршылау  чарасы булып узды.  2 ел элек мәктәпне тәмамлаган укучыбыз , яңа мәктәп белән танышты, югары класс егетләренә үзенең “солдат”  киңәшләрен җиткерде

Мәктәбебез укучылары “һәр көнне изгелек кыл!” эшлекле уенында катнашып, очколар туплый. Һәр класс үз биләмәләрен тәртипкә китерә. Тимурчылык эшен дә аксатмый, ялгыз әби-бабайларга ярдәм итә.

Декабрьнең беренче көннәре үк кышның “эшле ай” булачагын кисәтте. Бүген 3- декабрь көнне биләмәләрдә эш гөрләде. 6 дәрестән соң һәр класс үзенә беркетелгән мәктәп территориясен, каток мәйданчыгын кардан чистартты. Укучылар авыр уку хезмәтеннән соң саф һавада сәламәтлекләрен ныгытты һәм көчләрен арттырдылар.

Мәктәбебездә зур кунакларны каршыларга әзерлек эшләре дәвам итә. Кабинетларда методик эшчәнлек папкалары, күргәзмә материаллары әзерләнде. Хоккей мәйданчыгына прожекторлар куелды

Мәктәбебез укучылары уку белән беррәттән спорт ярышларында да актив катнаша. 1 һәм 2 декабрь көннәрендә оештырылган волейбол ярышында 1999 һәм 2000 – елгы малайлар һәм кызлар ярым финалдан үтеп, финал ярышларында катнашу хокукын алды.

Авылыбызда патриотик тәрбиягә игътибар арта бара. Шушы көннәрдә мәдәният йортында армия сафларына алынучы 4 егетебезне озату кичәсе оештырылды. Әлеге кичәдә элекке солдатлар да, армиягә китүче егетләрнең әтиләре дә, классташлары да, аларның класс җитәкчеләре дә, авыл советы җитәкчесе дә матур теләкләрен җиткерде.

Ноябрь ае бәйрәмнәргә бигрәк бай булды, мәктәп ачылу тантанасы, укытучыларыбызның юбилейлары, бердәмлек көннәре. Ә бүген бездә “Әниләр бәйрәме”, кичектеререлүгә карамастан бәйрәмдә зал шыгрым тулы иде.

28 нче ноябрь көзнең соңгы бер көне. Ә менә безнең өчен, Бөрбаш авылы халкы өчен бу көн тарих битләрендә калачак. Безнең хыялларыбыз чынга ашты. Авылыбыз уртасында “үсеп чыккан” ике этажлы урта мәктәп бүген ишекләрен ачты. Укучылар да, укучыларның әти-әниләре һәм укытучылар да бу көнне түземсезлек белән көтте.

Мәктәбебезгә Гүзәл Галимулловна директор итеп билгеләнгәннән соң 50 яшен тутыручы хезмәттәшләребезнең юбилейларын тантаналы рәвештә үткәрү традициягә әверелде.

26 ноябрь көнне шундый бәйрәмнәрнең берсе: укытучыларның укытучысы, завучыбыз Әнисә Камиловнаның гомер бәйрәме белән котлау оештырылды.

Мәктәбебездә төзү эшләре тәмамланганга байтак вакыт үтсә дә, күзгә күренми торган, шул ук вакытта бик нык төгәллек, җаваплылык таләп ителә торган өлеше, документациясе,  барлык оешмалар: газ, электр, пожар куркынычсызлыгы, санитария кагыйдәләре комиссияләре  тарафыннан ныклы контроль чаралары төгәлләнеп килә.